Serlimar ta un compania di Pais Aruba, cu ta garantisa comunidad un medio ambiente limpi y saludabel pa biba aden dor di ehecuta actividad ariba tereno di  prevencion di desperdicio, recohemento y procesamento di desperdicio y cuido di mata na un manera responsabel, eficiente y servicial.

E maneho di Gobierno di Aruba tin atencion pa un isla na unda nos por biba. E maneho ta dirigi ariba un desaroyo duradero den cual e bienestar di e ciudadano ta central. Un isla unda nos por biba ta encera entre otro: un ambiente limpi, naturalesa den harmonia, beach y bocanan limpi, caya y parke publico limpi, na unda hende por cana, traha, recrea y sosega sin cu e ta core peliger pa su salud. E puntonan principal den e aspiracion pa un desaroyo duradero ta formalisa circuitonan, stimula maneho integral di cadena, uzo di tecnologia limpi y consumo conciente di medio ambiente. Den esaki ta tene cuenta cu otro(nan) p’asina no pasa e efecto negativo pa un otro hende, otro pais of e generacion cu ta bini.

Tarea di Serlimar ta entre otro:

  • Duna conseho (hunto cu otronan) tocante e maneho cu mester ehecuta relaciona cu hygiena ambiental y en particular pa loke ta encera desperdicio solido, desperdicio kimico, wacharaca di auto, asbest y otro desperdicio cu por ta un peliger pa e medio ambiente;
  • elimina (recohe, warda, transporta, procesa) desperdicio solido y kimico for di nos isla y comunidad;
  • mantencion di hofi di edificionan di gobierno y santana publico y ariba peticion mantencion di cura di scol, departamento/servicio of organisacionnan gubernamental;
  • maneho di atraccion recreativo publico manera formacion di piedranan di cual esun mas popular ta Ayo y Casibari y e beachnan publico;
  • supervisa y maneha personal y material como tur facilidad destina pa logra e metanan aki;
  • ariba termino introduci servicio nobo manera chica pos.