Na september 2005, e vision y e metanan principal di e plan a keda stipula durante e seminario "Luga pa Luga" y despues na mei 2006 Conseho di Minister a aproba esaki. Di e metanan principal a deriva tambe e sub-metanan, cu tin biaha si y tin biaha menos ta forma parti di e elaboracion di e ROP.

Desaroyo Teritorial di Aruba 2019 (ROP 2019) 

Riba 15 di januari 2019 a publica un concepto pa un Plan pa Desaroyo Teritorial di Aruba nobo. Te cu 15 di maart 2019 a brinda oportunidad pa entrega punto di bista (zienswijze). E concepto a wordo ahusta y contestacion riba tur punto di bista cu a entrega a keda incorpora den e Nota riba Punto di Bista (Nota Zienswijzen). Por medio di Decreto Nacional no. 1 di 17 di juli 2019 e Plan pa Desaroyo Teritorial di Aruba 2019 (ROP 2019) a keda ratifica.

Por download y tambe tuma nota di forma digital di e ROP 2019, e mapa, e Decreto Nacional no. 1 di 17 di juli 2019, e splicacion riba ROP 2019, e Nota riba Punto di Bista y un mapa di structura ecologico principal:

Por tuma nota di ROP 2019 na oficina di Departmento di Infrastructura y Planificacion (DIP) tambe. 

Siguientemente por haya informacion relaciona cu e prome ROP (bieu).

Vision di e plan:

“ Realisa un (re)desaroyo integral duradero y balansa di Aruba”

Pa un desaroyo duradero ta considera cambio den sociedad.”cu ta provee den necesidad di e generacion actual, sin cu door di esaki ta hinca den peligro e posibilidad di e futuro generacion pa tambe provee den nan necesidad”.

Mescos cu naturalesa, e area cu tin construccion, tambe ta pasa frecuentemente door di un periodo largo di desaroyo. Desaroyo duradero ta pidi pues pa un vision di termino largo. Pesey e ROP tin un duracion di dies aña.
E perspectiva riba termino largo ta pa balansa stabilidad di structura y sistema contra e necesidad di cambio y renobacion. Loke ta considera den termino corto por ta contrario na durabilidad riba termino largo.

Pa por realisa e vision integral pa Aruba, ta necesario pa diferente sector ta riba e mesun liña. Pesey, den consulta cu e sectornan concerni, a traha meta pa sector. Maneho economico y social implementa ta influencia al fin y al cabo desaroyo teritorial. E sectornan aki mes ta responsabel pa alcansa nan meta y sub meta. E ROP ta forma e structura teritorial den cua e metanan (sub) por keda realisa. Den proceso di diseño di e ROP a scoge pa basa e plan riba metanan saca for di tres enfoke principal.
E enfoke ta economico, social y teritorial.

E metanan fiha ta lo siguiente:

Meta principal economico

Meta principal economico ta lo siguiente:

“Un crecemento economico balansa manteniendo minimalmente e nivel actual di bienestar”

E meta principal economico ta specifica mas aleu den e siguiente sub metanan:

  • Diversificacion di economia. Aruba conoce turismo como su pilar economico principal y despues ta sigui servicio financiero. Pa distribui e risico ta boga pa mas diversificacion di nos economia.
  • Inverti den calidad di producto turistico. Ta duna preferencia na  inverti/upgrade un hotel existente prome cu construi mas camber di hotel.
  • E desaroyo economico mester ta mas miho sincronisa cu e mercado laboral.
  • Aumenta productividad laboral.
  • Desaroyo di salario mester ta cana pareu cu productividad.
  • Pone orden den financia publico.
  • Nivel di inflacion keda pareu cu e socionan comercial mas grandi.
  • Considera miho bentahanan economico versus e gastonan social.
  • Garantisa suficiente importacion di cuminda.
  • Mantene e sector agrario.
  • Percura pa establecimento adecua pa empresa.
  • Reparticion balansa di entrada.
  • Suficiente reserva di divisa

Meta principal riba tereno social    

E meta principal riba tereno social ta formula como lo siguiente:

“Alcansa un nivel di provision adecua cu ta sincronisa cu e bienestar y e necesidad di e comunidad”

E meta social  ta dividi den sectornan cu sub metanan di e desaroyo social: Salud, Educacion, Vivienda, Cultura y Recreacion.

Salud:

  • fortalece cuido preventivo y curativo;
  • cuido y yudansa accesibel;
  • mantene, mehora ambiente di biba;
  • stimula deporte.

Educacion:

  • realisa educacion duradero, ofrece enseñansa na diferente grupo meta unda tin necesidad pa esaki;
  • educacion pa tur;
  • aumenta grado di educacion riba nivel medio y halto;
  • garantisa enseñansa di bon calidad cu ta conecta cu e comunidad, enseñansa avansa y cu e economia y comercio;
  • na un forma flexibel anticipa e necesidad di capacitacion.

Vivienda:

  • provee suficiente vivienda adecua pa pueblo;
  • cultura y recreacion:
    • Mantene elementonan cultural, historico y natural
    • Mantene suficiente posibilidad di recreo di acuerdo cu crecemento den poblacion, desaroyo turistico y deseonan di pueblo

Meta principal pa desaroyo di teritorio

Meta principal pa teritorio:
“Desaroya un bon structura teritorial funcional cu ta haci realisacion di e metanan social y economico posibel y mehoracion di e calidad teritorial”

E meta principal pa teritorio ta parti den sub metanan relaciona cu e diferente capanan cu ta forma parti di e sistema teritorial

Capa di suela:

  • Naturalesa y paisahe:
  • Proteccion basico di areanan di naturalesa basa riba principio ecologico (funcion di “corridor” (paso) y balornan di paisahe (entre otro Parke Nacional Arikok, zona di conservacion, Spaans Lagoen, parke bou awa).
  • Proteccion basico di terenonan disponibel ainda pa agricultura y reserva tereno rond di tanki y dam pa agricultura.
  • Stop proceso di erosion.
  • Proteha islanan riba rif y rif di coral.
  • Maneho di awa
  • percura pa un bon drenahe;
  • stroba menos cu ta posibel paso natural di rooi
  • sigura y desaroya na forma dinamico e buffernan di awa (saliña, dam y tanki); 
  • mantene como tambe mehora e calidad di awa di lama.

Topografia:

  • topografia existente como punto di salida pa desaroyo;
  • mantene mas tanto posibel e sistema y structura di suela existente;
  • reduci cobamento (excavacion) y den un tempo determina stop nan por completo. Recupera paisahe di e areanan cu ta bira disponibel y destina nan pa funcionnan leve manera recreacion.

Capa di red:

  • mehora calidad di infrastructura (caminda & aeropuerto, waf);
  • optimalisa uzo di infrastructura (herarkia red di caminda);
  • mehora transporte publico colectivo (entre otro concentracion di funcion);
  • stimula uzo di medio di transporte cu ta bon pa medio ambiente (entre otro cana na pia, bicicleta, carpooling, auto cu ta eficiente den uzo di energia);
  • introduci y ehecuta maneho di staciona vehiculo unda e usuario ta paga y ta haci distincion entre staciona leu y cerca (parkeermeters);
  • por pensa pa traha garashi pa staciona rond di centro di ciudad pa alivia e problema di stacionamento den centro. Ademas di centro di ciudad, tambe mester tin mas atencion pa e problema di stacionamento na San Nicolas y e strip di hotel;
  • mantene y crea un drenahe di awa di riool y awasero bon planea (eventualmente extra purificacion di awa di riool); 
  • mantene suministro minimal di awa y coriente.

Capa di ocupacion:

  • separacion teritorial bon defini di actividad cu si of no ta causa molester;
  • stimula un herarkia den facilidadnan (no tur cos tur caminda);
  • facilidad den vecindario, den bario etc.;
  • mantene accesibilidad, establece negoshi cu ta emplea hopi hende y facilidadnan unda suficiente transporte publico ta pasa; establece negoshi cu ta emplea menos hende (distribucion y produccion) cerca di e red logistico mas cerca (waf, caminda principal);
  • stimula uzo eficiente di tereno (funcion corecto na e sitio corecto);
  • fortalece calidad teritorial, manera centro di Oranjestad;
  • mas variacion y regulacion den forma di vivienda (diferencia den tamaño di parcela y forma di construccion).

Den Capitulo 3 di Ruimtelijk ontwikkelingsplan beschrijving ta splica e puntonan di salida mas detaya.

Intencion

Basa riba punto di salida aki di grupo di apoyo (plataforma) social a traha e plan segun algun intencion y principio di diseño.

  • enfoke integral:
    • integracion entre sector social, economico y teritorial.;
  • crecemento balansa y desaroyo;:
  • balansa den ritmo di crecemento y relacion mutuo entre sectornan;
  • envolvi tur esnan interesa, pero mester laga suficiente espacio pa futuro generacion dicidi riba e topico aki.
  • plataforma social duradero:

·         Principio di diseño:

·         zonificacion di henter nos teritorio y costanan;

·         limita urbanisacion y uzo di tera;

·         concentra y intensifica uzo di tereno;

·         uni funcionnan cu ta complementa otro;

·         diferencia den grado di urbanisacion y densidad;

·         separa actividad comercial y funcion di vivienda miho;

·         mantene balornan natural maximalmente intacto.

Tambe, teniendo na cuenta e discusion den comunidad tocante crecemento y ritmo di desaroyo, Conseho di Ministro a determina cu e desaroyo segun e plan mester sali for di direccion di un crecemento modera.