Pashentnan cu Dengue a cuminsa yega na hospital

Un di e pashentnan aki ya ta na cas, y e otro ta sigui interna cu complicacionnan serio. Ningun di e personanan aki a biaha recientemente, cu ta indica cu aki ta trata di dos caso di Dengue di transmision local. Ademas DVG ta alerta comunidad cu ta observando un aumento den casonan di dengue pa e temporada aki.

Ta conseha publico pa keda atento di sintomanan di Dengue manera keintura, dolor di cabes, biramento di stoma of sacamento, diarea, dolor di curpa, dolor di wowo, rash. Si tin sospecho di infeccion, consulta cu bo dokter di cas. Ta importante pa bo informa bo dokter di cas ki dia bo a cuminsa sinti malo pa asina e por laga haci test nan adecua di laboratorio. 

DVG ta haci un yamada na pueblo pa sea mas responsabel y alerto pa hunto elimina criadero di sangura. 

Pa cu esaki ta esencial pa nos sigui e medidanan preventivo:

• Controla tur caminda paden y/of pafo di cas, trabou y scol unda cu por tin awa para manera hemchi, barinan, bakinan, etc. y tira esaki afo;
• trata obheto cu tin awa constant aden cu “korreltjes” special pa mata e larva di sangura cada 14 dia;
• proteha bo mes contra picanan di sangura.

Gele Koorts Muskiet Bestrijding (GKMB) pa algun siman caba a intensifica nan control y medidanan preventivo, teniendo na cuenta e cantidad creciente di casonan na Aruba. Pa yuda comunidad den e prevencion, GKMB lo contribui cu saconan cu “korreltjes” special pa mata e larva di sangura. Por tira e “korreltjes” aki den hemchi, bari y bakinan di mata cu tin awa constant aden y na unda e sangura por pone webo. 

E “korreltjes” aki ta obtenibel na oficina di DVG na Oranjestad cerca nos recepcionista di dialuna pa diabierna di 7.30 a.m. - 12.00 p.m. y 1.00 p.m.- 4.30 p.m. y tambe cerca nos seccion di GKMB na Barcadera 1D di dialuna pa diabierna 7.30 a.m. - 3.30 p.m. E saco cu “korreljes” ta completamente gratis y por busca 1 saco pa famia/cas/negoshi. 

DVG ta haci un yamada na pueblo pa hunto nos sigui e medidanan preventivo y asina hunto combati criadero di sangura. DVG ta keda monitor e situacion di cerca y lo tuma medida adicional si mester.

Pa mas informacion, bishita nos Facebook page Directie Volksgezondheid DVG Aruba, follow nos riba Instagram directie_volksgezondheid_aruba of subi nos website www.dvg.aw(external link) of yama 522-4200 of manda bo email na servicio@dvg.aw.