ORANJESTAD - Recientemente Ministerio di Transporte, Integridad, Naturalesa y Asunto di Adulto Mayor, conhuntamente cu diferente fundacion di rescate y Cuerpo Policial a ricibi informacion di un caso extremo di abuso di animal. 

E caso aki ta encera un cantidad di cacho di diferente rasa bou condicionnan hororoso causa pa e mesun doño.

Crueldad y abuso di animal no ta aceptabel, pero ta sosode tur dia den nos comunidad. 
E problema di animal na Aruba no ta solamente e cachonan di caya, pero tambe e abuso y crueldad cu hopi mascota ta sufri den cura di cas.

E Maneho Bienestar di Animal Aruba (MBAA) ta un maneho nobo cu ta enfoca riba e causa primario di e problematicanan di abuso di nos animalnan. Gobierno ta bay den e direccion preventivo pa asina traha riba tur nivel pa preveni cu e problematica aki ta escala fuera di nos control den futuro. Cu MBAA lo bay traha ariba un ley (dierenwelzijn wet) nobo cu ta enfoca pa proteha nos animalnan. E ley aki lo cubri tur e puntonan y problemanan cu nos ta mira den nos comunidad, y duna autoridad e poder pa actua na e forma corecto y structura.

Autoridad ta urgi e comunidad pa raporta abuso di animal inmediatamente na Polis di Bario y duna tur detaye di e incidente, pa por actua rapidamente pa alivia e animal for di e sufrimento den cual e ta. No mester warda ora e situacion bira alarmante, mester actua na e prome señal cu algo ta robes. Ta na comunidad pa ta alerta y demostra empatia pa asina salba nos animalnan cu tambe ta forma parti di nos sociedad.  

Ministerio encarga cu dierenwelzijn lo bay publica mas informacion di nos maneho nobo pa e bienestar di nos animalnan. Pa cualkier tipo di informacion por fabor tuma contacto cu Centro Control di Cacho (CCC). Por haya nan ariba Facebook(externe link), of yama bo polis di bario pa raporta si ta ripara caso di abuso di animal. No keda den silencio y no warda te ora ta mucho laat pa raporta.

Logo CCC