General

Como Aruba ta un isla, su fronteranan ta bon defini. Aruba ta rondona pa lama cu ta forma un barera pa bestia of mata por colonisa e naturalesa di Aruba. E origen di colonisacion ta for di Venezuela como cu e pais aki ta keda mas cerca. Naturalesa di Aruba ta un seleccion for di esun di Paraguana, Venezuela. Door di e clima na Aruba, e vegetacion ta di indole seco y ta tipico pa un vegetacion di costa. E tera ta di diferente origen geologico cu ta duna un variacion den vegetacion.

Riba e islanan manera Aruba, den principio por establece e sortonan cu por drief of cu por bula riba awa. Simia di mata en general por contra awa salo y por keda drief y parhan, raton di anochi y barbulet por bula y pasa lama. Un otro posibilidad ta cu tabata existi un brug terestre entre Aruba y Paraguana (Venezuela), manera algun geologo ta pensa. Esaki por splica e existencia di dori cu ta un amfibio y un amfibio no por biba den awa salo. Un otro splicacion ta cu hende a trece bestia Aruba. For di punto di bista historico t’asina cabrito, burico, cacho, pushi, djaca, raton y galiña a yega Aruba.

Door di e caracter di e isla, e sortonan cu ta originalmente di Aruba ta masha limita. Tin sorto di palo cu ta na Aruba so tin y no riba e otro islanan bisiña manera Boneiro y Corsou.

Si nan ta aparece atrobe riba Isla di Margarita of sino na Paraguana. Colonisacion for di tera firme ta un proceso cu ainda ta tumando luga. Asina e pensamento ta cu e mata di fruta Azufre (Pereskia guamache) apenas a cuminsa colonisa Aruba. E sorto aki ta conoci na Paraguana pero no riba e islanan di Boneiro y Cosou.

E caracter di ta un isla, ta haci tambe cu e naturalesa ta sensible pa cambio. Ya cu, si sorto di mata of bestia desaparece, ta dificil pa nan establece nan mes atrobe, si e lama ta keda existi como un barera. Awendia cambio ta bin door di actividad di hende. Historicamente mira, ta hopi loke hende a cambia na e naturalesa di Aruba.

E Indjannan ya caba a cuminsa pisca e Stombus gigas (Conchi). Durante e epoca di colonialismo tabatin kapmento di palo, agricultura y cria di bestia na Aruba. E procesonan aki a sigui te cu siglo pasa. Awendia urbanisacion di e isla y e desaroyo di e costanan ta afectando e naturalesa mas tanto.

Na e momentonan aki por ripara cu e dinamismo di e naturalesa di Aruba ta hopi halto. Un par di sorto di palo cu ta existi na Aruba ta sorto pionero, manera Cuihi y Hubada. Den un vegetacion natural nan ta crece na e sitionan unda tin hopi claridad y unda cu nan no tin competencia di otro sorto di palo. E sitionan aki normalmente ta na costa y cerca of den e canalnan natural di awa,  e rooinan. E sortonan di palo cu ta crece mas poco poco y cu si por cu competencia di otro sorto di palo, ta den minoria na Aruba.
 
Hende na Aruba ta biba di naturalesa. Ta danki na e lama y e beachnan bunita cu turista ta bin Aruba. E desaroyonan na costa cu ta sigui keto bay, ya caba ta afecta e calidad di lama y beach. Pa por ataca e desaroyo aki y pa mantene e naturalesa, ta importante pa traha riba un maneho. E Ley pa Proteccion di Naturalesa ta brinda posibilidad pa proteha tanto area como bestia y mata. 

Investigacion

Un di e tareanan di Departamento di Agricultura, Pesca y Cria (DLVVM, Santa Rosa) ta pa haci investigacion. DLVVM  mes ta haci investigacion of ta haci nan den cooperacion cu of bou supervision di otro departamentonan di gobierno of door di instancianan local of internacional. Por ehempel por menciona Departamento di Agricultura, Pesca y Cria, Departamento di Obra Publico (DOW) y Parke Nacional Arikok, pero tambe Universidad di Agricultura na Wageningen, Universidad Radboud Nijmegen, Hulanda y Zoologico di Toledo na Merca.

Por aplica e resultadonan di investigacion den maneho of ora di duna conseho.
E diferente seccionnan di DLVVM ta envolvi den varios investigacion. Tin proyecto cu ta cana pa añanan caba y asina ta haya conocemento y experiencia specifico. Den pasado a cera diferente investigacion cu exito.

Na e momentonan aki ta haci e siguiente investigacionnan:

  • Establece y ehecuta pruebanan cu cultivonan protegi di berdura y frutal bou di paña di sombra;
  • Mehoracion di e produccion den cria di bestia chikito y continuacion di crusa liñanan di rasa pa yega na hibrido cu un bon balor pa uzo;
  • Introduccion di rasa nobo y compila e cifranan di prestacion di nan;
  • Continuacion di prueba den porcentahe di carni y cambio di cuminda di porco;
  • Continuacion di e Proyecto di Boa: inventarisacion, vigila y evaluacion di e Boa constrictor; Participacion na e ehecucion di investigacion di existencia y efecto di e Boa constrictor den naturalesa. Experto di afo ta coordina e investigacion y ta haci un gran parti di e trabounan. Ta trata aki di un proyecto den cooperacion entre Departamento di Agricultura, Pesca y Cria (DLVVM) y Fundacion Parke Nacional Arikok y Servicio Veterinario;
  • Continuacion di e programa di cooperacion cientifico pa termino largo pa loke ta trata e biodiversidad marino di e sistemanan di costa. E programa ta den cooperacion cu e “Afdeling Dierecologie en- ecofysiologie” di Universidad Radboud, Nijmegen, Hulanda y ta bou di supervision di dr. I. van Nagelkerken. Ta trata di un inventarisacion di e estado di e piscanan, yerba di lama, mangel y e rifnan di coral y e interaccion cu nan tin cu otro. E importancia di e areanan biologico aki como criadero pa pisca di coral a keda demostra na Boneiro y na Corsou. Pero na Aruba e uzo di palo di mangel y yerba di lama door di pisca di coral no ta mucho conoci ainda. E teritorionan aki por bay atras masha lihe tanto den superficie como den calidad. Principalmente door di capmento pa amplia of pa ponemento di pier, luga pa mara boto, haf y/of industria. Esakinan por tin un efecto masha negativo riba henter e estado di pisca na Aruba y cu esey tambe riba pesca y turismo submarino. Na final di 2004 a cuminsa caba cu e estudio. Na 2006 a sigui atrobe cu e investigacion y na juni 2007 lo a sigui ehecuta e investigacion. 
  • Continuacion di vigilamento di e boebinan bou supervision di dr. Adrian del Nevo, presidente di “Applied Ecological Solutions Inc.”. E investigacion ta trata di un relacion di cooperacion entre Valero y gobierno di Aruba.
  • Inventarisacion y demarcacion di trankera existente pa yega na un red di vigilancia y pa haci proposicion pa un structura di mantencion. Lo haci e trabounan den cooperacion cu Departamento di Obra Publico (DOW), seccion di maneho. Durante e investigacion lo inventarisa diferente elemento di paisahe manera e barancanan, e seronan di piedra pero tambe e uzo di teritorio. Diferente stagiair di “HAS Den Bosch” Hulanda, a traha ariba e investigacion.
  • Lo formula un plan di maneho pa e rooinan. E rooinan no solamente ta importante pa deshaci di awa cu ta di mas ora di yobida, pero nan tin un funcion natural pa expande flora y fauna. Considerando e inundacionnan di ultimo añanan mester formula un plan di maneho, hunto cu Departamento di Obra Publico (DOW), cu ta responsabel pa mantencion di e rooinan. Den e plan mester tene cuenta cu drenahe di awa di yobida, mantencion y balor pa naturalesa.
  • Construccion y ponemento di “Fish Attracting Devices” (FAD), den cooperacion cu Departamento di Agricultura Pesca y Cria (DLVV) di Corsou y cu Fundacion Marcultura. FAD ta atrae pisca loke ta bentahoso pa pesca local. Construccion y ponemento di FAD lo tuma luga atrobe na fin di 2007.
  • Herbario (luga na unda ta warda muestra di mata y yerba seco). E proyecto di herbario ta encera actualisacion y automatisacion di e herbario. Experto di afo ta coordina henter e proyecto, nan ta haci un parti grandi di e trabounan y tambe ta percura pa curso pa e trahadonan di e departamento mes y pa e trahadonan di e servicionan concerni y organisacion.

Mantencion di mata banda di caminda publico

Informacion no ta disponibel ainda.

Parke publico 

Informacion no ta disponibel ainda.

Mantencion di rooi

Departamento di Obra Publico (DOW) ta responsabel pa e mantencion di e canalnan natural cu ta deshaci di awa di yobida, e asina yama rooinan. Actualmente ta formulando un plan di maneho pa e rooinan. E rooinan no solamente ta importante pa deshaci di awa di yobida, pero nan tin un funcion natural tambe pa expande flora y fauna. Considerando e inundacionnan di ultimo añanan mester formula un plan di maneho, hunto cu Departamento di Agricultura, Pesca y Cria (DLVVM) y Servicio Veterinario, caminda mester tene cuenta cu drenahe di awa di yobida, mantencion y e balor pa naturalesa.