Interes grandi pa haci agricultura comercial posibel na Aruba

Aplicacion di tecnologia innovativo pa produccion comercial di e.o. fruta y berdura ta esencial pa stimula agricultura riba nivel comercial na Aruba y cooperacion cu institutonan di conocemento ta esencial pa logra establece esaki come pilar nobo di Aruba su economia. WUR ta un partnership entre Wageningen University y Stichting Wageningen Research, un instituto renombra mundialmente riba tereno di aplicacion di tecnologia innovativo di cultivo.

Minister Geoffrey Wever a atende e reunion aki acompaña pa representante di Ministerio di Naturalesa, Sr. Anko Koopmans, Directora di Departamento di Asunto
Economico, Comercio y Industria, Sra. Maria Dijkhoff- Pita, Director di Utilities N.V.,
Sr. Anthony Rojer y Director di Aruba Agri Development Company N.V., Sr. Jeremy
Croes.

Durante e bishita Sra. Ria Hulsman, Regional Manager Latin America and Caribbean pa WUR y diferente experto a elabora riba diferente aplicacion di diferente tecnologia innovativo pa stimula agricultura comercial na Aruba. Ademas a ricibi un tour na “Netherlands Plant Eco-phenotyping Centre” (NPEC) na unda a ricibi un splicacion amplio riba nan estudionan cu meta di saca afo e miho condicionnan di plantacion posibel pa saca maximo cosecha - un punto sumamente importante pa e oportunidad di agricultura comercial.

Agricultura comercial como pilar economico ta prioridad di Ministerio di Economia y Ministerio di Naturalesa pa asina diversifica Aruba su economia. Gobierno ta consciente di e potencial grandi di agricultura comercial y ta haci e compromiso pa busca cooperacion cu partnernan strategico cu tin e conocemento relevante pa aplica esaki na un manera comercial y na beneficio di e industria agricola.