Pensioen di viudo(a) y huerfano (AWW)

Ta di lamenta, cu ora bo casa fayese, esaki no solamente ta trece tristeza cun’e pero tambe consecuencianan financiero grandi pa bo y pa bo famia. Pa por compensa e consecuencianan financiero aki, tin na Aruba un pensioen di viuda (o) y huerfano.

Pa medio di e Ley di Pensioen di viuda (o) y huerfano ta regla cu ora un di e casanan muri e viuda of viudo y e yiunan tin derecho riba un pensioen.

E suma di e pensioen ta depende di algun factor: 

  • E periodo cu ta registra na Censo;
  • Cantidad di yiu;
  • Edad di yiu(nan).

Banco di Seguro Social ta encarga cu tratamento di peticion di e pensioen di viuda (o) y huerfano y e pago. Pa por cobra pensioen di viuda(o) bo mester acudi personalmente na Banco di Seguro Social (SVb), Departamento di Pensioen.

Na momento cu bo acudi na Banco di Seguro Social (SVb), pa haci peticion pa pensioen di viuda(o), mester trece e siguiente documentonan:

  • Un pasfoto;
  • Number di cuenta di banco of un carchi di banco;
  • Trouwboek;
  • Cedula (obtenibel na Censo);
  • Acta di fayecimento (obtenibel na Censo).

Un empleado di e Departamento di Pensioen di SVb lo duna bo asistencia ora di yena e formulario pa haci peticion pa pensioen di viuda(o).

Tene na cuenta cu por dura un tempo (maximalmente 4 luna) prome cu bo haya contesta.

Pa por cobra pensioen di huerfano(a) un mayor (viuda of viudo) mester acudi personalmente na Banco di Seguro Social (SVb), Departamento di Pensioen.

Si e mayornan di e huerfano(a)(nan) no ta na bida mas, esun cu a keda encarga cu e huerfano(a)(nan), mester acudi personalmente na  Banco di Seguro Social. E persona aki mester trece un documento den cua ta menciona cu e ta esun cu ta responsabel pa e huerfano(a)(nan). E documento aki por ta un declaracion of decision di hues cu ta menciona cu e ta e voogd di e huerfano(a)(nan) of un documento di Voogdijraad.

Na momento cu bo acudi na Banco di Seguro Social (SVb), pa haci peticion pa pensioen di huerfano, mester trece tambe e siguiente documentonan:

Un empleado di e Departamento di Pensioen di SVB lo yuda bo ora di yena e formulario pa haci peticion pa pensioen di huerfano. 

Tene na cuenta cu por dura un tempo (maximalmente 4 luna) prome cu bo haya contesta riba e peticion.

Pa mas informacion por tuma contacto cu  Banco di Seguro Social, Departamento di Pensioen den Vondellaan.