Pensioen di behes (AOV)

Tardi of tempran tempo ta yega cu mester confronta e hecho cu edad a subi y cu mester sosega curpa un poco. Esaki ta nifica cu kier stop di traha of pa motibo di edad no por traha mas. Pero stop di traha ta nifica cu lo no tin entrada mas. Pa compensa e perdida di entrada aki tin un pensioen di behes di gobierno.

Ley di pensioen di behes ta regla cu un persona tin derecho riba un pensioen di behes ora cu e yega 60 aña. Entrante 1 januari 2015 e edad di pensioen ta subi pa 60,5 aña. E edad di pensioen lo sigui subi cada aña cu 6 luna te cu 1 januari 2024 ora e edad di pensioen lo bira 65 aña.

Por lo tanto, e edad cu cada persona tin derecho riba pensioen di behes ta bira gradualmente:

  • entrante 1 di januari 2015 : 60,5;
  • entrante 1 di januari 2016 : 61;
  • entrante 1 di januari 2017 : 61,5;
  • entrante 1 di januari 2018 : 62;
  • entrante 1 di januari 2019 : 62,5;
  • entrante 1 di januari 2020 : 63;
  • entrante 1 di januari 2021 : 63,5;
  • entrante 1 di januari 2022 : 64;
  • entrante 1 di januari 2023 : 64,5;
  • entrante 1 di januari 2024 : 65.

E suma di pensioen ta depende di diferente factor, esakinan por ta:

  • Estado civil (casa of no);
  • Periodo cu e persona ta inscribi na Censo y Registro Civil.

Banco di Seguro Social ta encarga cu tratamento di peticion pa pensioen di behes y cu e pago. Pa por garantisa cu bo por cobra pensioen di behes na e momento cu bo cumpli e edad di pensioen, ta conseha pa acudi personalmente na Banco di Seguro Social (SVb), departamento di Pensioen, cuatro (4) luna prome cu cumpli e edad di pensioen.

 Na momento cu bo acudi na SVb, pa haci un peticion pa pensioen di behes, mester trece e siguiente documentonan:

  • Un pasfoto;
  • Number di cuenta di banco of un carnet di banco;
  • Trouwboek (si bo ta casa)
  • Cedula (obtenibel na Censo).

Un empleado di Departamento di Pensioen di SVb lo yuda bo na momento di yena e formulario pa haci peticion pa pensioen di behes. 

Flex pensioen
A introduci flex pensioen pa pensioen di behes AOW entrante prome di januari 2012. Introduccion di Flexpensioen ta nifica cu un persona cu tin derecho riba pensioen di behes por pospone su derecho di haya pensioen, cada biaha cu 1(un) aña, te un maximo di 5 (cinco) aña. Durante e tempo cu ta pospone pensioen e derecho di pensioen di behes ta keda pospone.
Pa cada aña cu e pensionado haci uzo di e derecho aki, e suma di pensioen di behes ta aumenta cu 7%.
E persona cu tin derecho riba pensioen cu kier haci uzo di e edad di pensioen flexibel, mester entrega un peticion por escrito na SVb un luna prome cu e cumpli e edad pa derecho di pensioen, cu otro palabra, prome cu e periodo cu por pospone su pensioen caduca.

Nota: Entrante 1 januari 2015 e edad di pensioen flexibel tambe ta aumenta gradualmente te cu 65 aña na 2024.

Den e siguiente tabel por haya un resumen di un suma di pensioen mas halto si e persona cu tin derecho riba pensioen haci uzo di e posibilidad di pospone su pensioen. 

 

Edad

Pensioen(soltero)  pa luna

Pensioen (casa) pa luna

Pensioen (casa) parti pa luna

60 jaar

1.057,00

1.780,00

  890,00

61 jaar

1.131,00

1.905,00

  953,00

62 jaar

1.210,00

2.038,00

1.019,00

63 jaar

1.295,00

2.181,00

1.091,00

64 jaar

1.386,00

2.333,00

1.167,00

65 jaar

1.482,00

2.497,00

1.249,00

 

Den e articulo nobo 8a di e Landsverordening algemene ouderdomsverzekering tin mas informacion riba flex pensioen.