Cuido di calidad

Pa Gobierno cu ta subsidia scolnan na Aruba, ta importante cu e calidad di enseñansa na  scolnan ta cumpli cu cierto normanan. Enseñansa mester ta organisa na un manera efectivo y eficiente pa garantisa cu e resultadonan ta cumpli cu e metanan proponi y cu nan ta cumpli cu e espectativanan di sociedad.

Cuido interno di calidad

Scol hunto cu e directiva di scol tin responsabilidad pa su propio calidad. Pa garantisa propio calidad y/of pa mehor’e, scol mester evalua sistematicamente e calidad di su enseñansa. Pa medio di evaluacion propio scol por identifica e puntonan di mehoracion y pa despues prepara e trayecto di mehoracion. Esaki nos ta yama interno di calidad.

Cuido externo di calidad

Di otro banda tin tambe cuido externo di calidad di parti di Gobierno cu ta na encargo di Inspeccion. Inspeccion ta responsabel pa evalua e calidad di enseñansa na scolnan pa vigila, garantisa y stimula esaki.

Cuadro di control

Pa por evalua e calidad di enseñansa na scol, Inspeccion a desaroya un cuadro di control (Toezichtkader). Aki tin tur standard importante di calidad y indicador pa esaki. E standardnan di calidad ta agrupa den cuatro categoria:

  • Cuido di Calidad;
  • Enseñansa y Siñamento;
  • Entrada;
  • Organisacion y Maneho.

Inspeccion ta controla scol door di keda continuamente na altura di situacion na scol door di haci bishita na e scol concerni, pidi informacion di e scol, haci observacion den klasnan, reuni regularmente cu entre otro e cabesante di scol y e directiva di scol. Ta raporta tur locual cu keda constata na Ministro di Enseñansa, director di Departamento di Enseñansa y esnan concerni.

Pa mas informacion por tuma contacto cu Departamento di Enseñansa, seccion Inspeccion di Enseñansa.

Nos ta traha hunto pa un portal Gubernamental pa Aruba, ku ta informativo, accesibel, y facil den uzo.
Algu di comenta? Click aki 

Page options