Ayudo financiero pa bay scol

Gobierno di Aruba ta duna un ayudo financiero extra na e mayornan cu ta haya bijstand y cu tin yiu(nan) of yiu(nan) di criansa cu ta bayendo scol. Esaki ta pa yuda cubri gasto manera paña, sapato, articulo pa scol etc. E areglo aki ta conta tanto pa alumno di Scol Preparatorio (Kleuterschool) como alumno cu ta bishita scol regular durante dia (volledig dagonderwijs). Condicion ta cu e yiu(nan) mester ta bibando cerca e mayornan concerni y tambe mester ta ricibiendo bijstand.

Schoolgelduitkering

Mayornan cu ta hayando bijstand lo ricibi pa cada yiu cu ta bay scol Awg. 220,- extra te na un maximo di Awg. 800,- pa famia como ayuda pa cubri e gastonan di scol (schoolgelduitkering) entrante anña escolar 2019-2020.

Contribucion di mayor (Ouderlijke bijdrage)

Tambe Gobierno lo yuda paga un parti di e contribucion (ouderlijke bijdrage) cu e mayor mester paga na e scol di su yiu te cu un maximo di Awg. 120,- pa mucha. Ta paga e ayudo extra di "schoolgelduitkering" hunto cu e pago regular di bijstand na luna di september y esun di "ouderlijke bijdrage" ta pag’e directamente na scol mes. Si e contribucion ta mas hopi cu e suma di Awg. 120,- e mayor mes lo mester paga e diferencia. E ayudo extranan aki ta pa un solo biaha.

Con aplica  

Mayornan cu tin yiu(nan) of yiu(nan) di criansa mester busca e formulario na e scol na unda e yiu(nan) ta inscribi. Riba e formulario cu Departamento pa Asunto Social a diseña specialmente pa e ocasion aki, tin un parti cu e mayor tambe tin cu yena corectamente y firma. 

Nos ta traha hunto pa un portal Gubernamental pa Aruba, ku ta informativo, accesibel, y facil den uzo.
Algu di comenta? Click aki 

Page options