Enseñansa obligatorio

E ley di enseñansa obligatorio a drenta na vigor na Aruba. Cu esaki pais Aruba a tuma e obligacion pa garantisa y realisa e derechonan di cada mucha cu ta cay bou di e ley Arubiano aki. Tur mucha for di 4 aña te cu 16 aña cu ta biba na Aruba ta suheto di e ley di enseñansa obligatorio. Pues e ley ta conta tambe pa e muchanan special, e muchanan ilegal na Aruba y e mamanan teenager te cu 16 aña.

Enseñansa na cas

Pa por duna enseñansa na cas mester haci lo siguiente:

  • Mester manda un carta pa Oficina di Enseñansa Obligatorio, cu e peticion pa e enseñansa cu  kier duna na cas, wordo reconoci den cuadro di e ley di enseñansa obligatorio;
  • Inspectie lo haci evaluacion di e contenido di e programa di enseñansa cu kier brinda na cas pa controla si esaki ta cumpli cu tur condicion;
  • Pone adhunto un carta di bon conducta di e persona cu ta bay duna e enseñansa na cas;
  • Menciona tambe e informacion di contacto di e alumno (su number di ID,nomber y fam, adres, fecha y luga di nacemento);
  • E peticion pa enseñansa na cas mester wordo haci tur aña, prome cu e aña escolar cuminsa;
  • Enseñansa na cas tambe mester cumpli cu e ley di enseñansa obligatorio;
  • E empleadonan publico di enseñansa obligatorio ta controla si e mucha(nan) en realidad ta ricibi enseñansa na cas tur dia.
  •  

Oficina di Ensenañsa Obligatrorio

Oficina di Ensenañsa Obligatrorio (Bureau Leerplicht Aruba) ta controla y supervisa e ehecucion di e ley di enseñansa obligatorio. E empleadonan publico di enseñansa obligatorio ta supervisa e cumplimento cu e ley di enseñansa obligatorio. E ta duna informacion na e hobennan pakico ta importante pa bay scol y e consecuencianan si viola e ley di enseñansa obligatorio. E empleadonan publico di enseñansa obligatorio hunto cu e scol y e mayornan ta busca solucion ora cu tin problema pa bay scol. E mayornan ta keda responsabel pa nan yiunan bay scol di berdad.

Tanto e scol como e empleadonan publico di Oficina di Ensenañsa Obligatrorio ta controla si e muchanan ta bay scol. E scol ta registra e alumnonan cu ta inscribi na e scol y ta pasa e informacion aki pa e Oficina di Enseñansa Obligatorio. E scol ta duna e Oficina di Enseñansa Obligatorio informacion riba e ausencia y e codigo di ausencia di su alumnonan. Prome cu 9 or di mainta e mayornan of cuidadonan mester informa e cabesante tocante ausencia di e mucha pa motibo di malesa of otro motibo. Den caso di malesa y e ausencia surpasa 10 dia escolar sin interupcion, e mayornan/cuidadonan mester entrega un declaracion di e dokter cu ta trata e mucha no mas tarda cu e di 11 dia escolar. Den caso di un otro motibo, e mayornan/cuidadonan mester splica cla e indole di e problema. E scol por registra e tipo di ausencia aki maximalmente 10 biaha pa aña escolar pa alumno. 

E codigonan di ausencia

E scolnan ta actualisa nan registro di ausencia di e alumnonan diariamente. Den e registro nan ta registra pa cada dia di scol e siguiente codigonan di ausencia:

  • Codigo Z: e alumno ta ausente henter dia of un parti di dia debi na un malesa;
  • Codigo D: e alumno ta ausente debi na prohibicion pa drenta scol temporalmente como un medida disciplinario;
  • Codigo P: e alumno ta ausente henter dia of un parti di dia debi na un acontecimento repentino of extraordinario of importante, personal of familiar. E acontecimentonan aki por encera, un matrimonio of entiero di un famia cercano, e periodo di rouw despues di un fayecimento of obligacionnan importante (manera topsport, actividad academico, pero excluyendo vakantie) den exterior;
  • Codigo V (verzuim): e alumno ta ausente henter dia of parti di dia y e scol no por concede codigo D, Z, of P.
  •  

Verlof

Tin circunstancia na unda e alumno por haya dispensacion. E mayornan/cuidadonan por entrega un peticion por escrito solamente cerca e director. Aki ta trata di diferente asunto na unda e director por duna maximo 10 dia escolar di dispensacion pa aña escolar. Mester entrega e peticion di antemano cerca e director uzando e formulario di” peticion pa dispensacion di scol”. E formulario aki bo por haya cerca e director. Segun e ley “circunstancia di peso” ta situacion cu ta cay fuera di e boluntad di e mayornan / cuidadonan of e mucha”. Pa e circunstancianan aki por pidi dispensacion. 

Biaha

Den cierto caso si ta permiti pa biaha cu bo yiunan pa exterior, sigur si e biahe aki ta pa motibo personal of circunstancia extraordinario (manera enlace matrimonial, entiero den exterior, participacion den competencia deportivo internacional). P’esey ta di sumo importancia pa informa e scol bon y na tempo tocante e motibonan exacto di e biahe. Si e scol tin suficiente informacion, e scol ta registra e ausencia aki e ora como ausencia permisibel (door di uza codigo P).

Kitamento for di scol

Un alumno di edad di enseñansa obligatorio por kita for di scol solamente si e alumno en cuestion:

  1. Entrega un carta di un otro scol cu a firma e protocol di ausencia, unda cu e otro scol ta declara cu e alumno ta inscribi cerca nan;
  2. Entrega un extracto di CENSO na e scol unda cu tin indica cu e alumno no ta inscribi mas den registro di CENSO;
  3. Tin un dispensacion di enseñansa obligatorio valido te fin di e aña escolar  coriente.

Boet

Si abo como mayor no cumpli cu e ley di enseñansa obligatorio, no obstante tur e esfuersonan cu scol y e ambtenaar di enseñansa obligatorio a haci, e Minister di Enseñansa por dunabo un boet. E suma ta varia di Awg. 250,00 te Awg. 2.500,00. Si bo no ta di acuerdo cu e boet, bo por entrega un carta di obhecion dentro di 6 siman. Si un hende nenga di paga e boet, e ta wordo cobra e ora via un dwangschrift.