Simbolo nacional

Aruba tin diferente simbolo nacional, cu ta inclui bandera, escudo, himno nacional y desde 2012 e Shoco.

Dia nacional

18 maart ta e dia nacional di Aruba. Riba e dia aki ta recorda introduccion di nos bandera y himno riba 18 maart 1976. Ta celebra e fiesta nacional na un forma grandioso. Diferente organisacion cultural, social y deportivo ta organisa diferente actividad pa publico. E celebracion ta cuminsa riba e anochi prome cu e dia nacional cu un manifestacion cultural riba Plasa Libertador Betico Croes.

Masha hopi hende ta bishita e plasa pa disfruta di e fiesta cultural y e tentnan pa bende cuminda y articulo relaciona cu dia nacional. Riba 18 maart e celebracion ta cuminsa cu un acto protocolario y ta culmina cu un desfile civil. Tambe ta presente autoridad local y invitadonan for di Bonaire y Curaçao. Na e desfile popular aki ta participa diferente organisacion social, cultural y deportivo di e comunidad Arubiano. For di cua algun tambe ta duna demostracion di nan arte of deporte. Nan ta cosecha hopi aplauso bou di e publico numeroso cu ta acudi pa gosa di e desfile.

Bandera di Aruba

E bandera di Aruba a keda introduci oficialmente riba 18 di maart 1976, hunto cu e himno oficial “Aruba Dushi Tera’. Desde cu Aruba a haya su Status Aparte riba 1 di januari 1986, loke ta encera cu Aruba a bira un pais autonomo den Reino Hulandes, e bandera a bira e bandera di Pais Aruba. E bandera di Aruba tin 4 color, geel, blauw, blanco y cora.

Bandera di Aruba

  • Blauw ta nifica e lama inmenso cu ta rondona Aruba. E color di fondo di e bandera ta blauw cu e code PMS 279 C of larkspur.
  • Geel ta colo di abundancia y e liñanan horizontal ta representa e solidaridad di esaki. Geel tambe ta simbolisa e industria actual y turismo como fuente di entrada mas importante, mescos cu oro y industria di aloe for di e pasado industrial. E colo geel di e liñanan ta Bunting Yellow. E colo ta para tambe pa e palonan y e matanan di Aruba cu ta floria geel, manera Kibrahacha, Brazil, Bonchi di Strena, curahou, tuturutu y wanglo.
  • Blanco ta simbolisa e playanan blanco manera sneeuw y e puresa di e pueblo Arubano.
  • E strea (blanco/cora) ta representa e cuater puntonan di un compas y ta simbolisa e origen di e poblacion for di tur skina di mundo. Ademas e ta representa e industria bieu di palo di Brazil y tambe como un homenahe na e sanger indjan, cu den Rooi Frances (Franse Pas) a basha pa e libertad di Aruba. E cora di e strea ta Union Jack Red.

Escudo di Aruba

E escudo di Aruba ta den uzo oficial desde 15 di november 1955. Originalmente e diseño basico di e escudo ta un creacion di e Atelier voor Heraldische Kunst, estableci na Amsterdam.

Wapen van Aruba

Un escudo di un pueblo ta un simbolo cu ta refleha diferente aspecto tipico di un pais. Escudo di Aruba tin tambe su nificacion cua ta lo siguiente:

Mata di Aloe

Den e prome cuartel e mata di aloe ta refleha e fuente di entrada mas importante di e pasado industrial di Aruba 

Hooiberg

Den e di dos cuartel e cero di Hooiberg, como parti di nos identidad, ta simbolisa e Isla di Aruba cu ta sali for di lama. E color berde, como color di alegria, ta expresa alegria pa e autonomia obteni. E liñanan ondeante ta simbolisa nos lama. 

 Dunamento di man

Den e di tres cuartel, dunamento di man ta simbolisa e lasonan amistoso cu otro nacion y pueblo, tanto den sector politico como tambe economico y cultural. 

 Wiel

Den e di cuater cuartel, e wiel ta representa e industria como fuente di bida mas importante pa nos isla.

Cruz

 E cruz ariba e escudo ta simbolisa devocion y fe.

Leon

E leon ariba e escudo ta representa forsa y generosidad; cualidadnan subraya pa medio di e color cora.

Rama di laurel

E ramanan di laurel ta simbolisa paz y amistad  

Himno nacional

E himno di Aruba ta”Aruba Dushi Tera “ skirbi den aña 50 door di Juan Chabaya (Padu) Lampe cu un composicion di Rufo Wever. Hubert (Lio) Booi a skirbi un couplet adicional na 1976. E coro di De Trupialen a graba e cantica na 1954 y “Aruba Dushi Tera” a sigui resona durante tur evento oficial. E cantica a bira asina popular bou di pueblo cu riba 18 di maart 1976 a introduci Aruba Dushi Tera como himno nacional di Aruba.

Aruba dushi tera
Aruba patria aprecia
nos cuna venera
chikito y simpel bo por ta
pero si respeta.

Refrein:
O, Aruba, dushi tera
nos baranca tan stima
nos amor p’abo t’asina grandi
cu n’tin nada pa kibre
cu n'tin nada pa kibre

Bo playanan tan admira
cu palma tur dorna
bo escudo y bandera ta
orguyo di nos tur!

Refrein

Grandeza di bo pueblo ta
su gran cordialidad
cu Dios por guia y conserva
su amor pa libertad!

Refrein

Por download e partitura di Aruba Dushi Tera:
Aruba Dushi Tera


UNOCA - CD Aruba dushi tera, 2003

Shoco

Riba 18 di maart 2012, e dia nacional di Aruba, e Shoco (Athene cunicularia arubensis) a keda oficialmente introduci como simbolo nacional. E shoco unico aki ta simbolisa sabiduria y inteligencia. Athene cunicularia arubensis ta un sorto di shoco chikito di 18 pa 25 cm largo cu ta activo durante dia y cu ta jaag riba insecto grandi, entre otro tor, tiracochi y otro insecto. E shoco ta uza un hol chikito den tera pa traha su neishi, Hopi biaha e shoco ta para dilanti entrada di su hol riba un cero di santo of un rama di palo.

Shoco ta un especie di parha autoctono, un sorto cu solamente ta haya na Aruba. Shoco (Athene cunicularia arubensis) ta masha popular y ta imprimi riba placa di papel di 50 florin.

                                                       

Nos ta traha hunto pa un portal Gubernamental pa Aruba, ku ta informativo, accesibel, y facil den uzo.
Algu di comenta? Click aki 

Page options