Gastronomia/Cushina Arubiano

E historia multicultural di Aruba ta manifesta su mes tambe den e cushina Arubiano. E cushina Arubiano a origina for di e influencia Latino Americano, Africano, como tambe for di Europa. Como cu Aruba ta un isla rondona pa lama, e cushina Arubiano conoce un abundancia di producto for di lama y pues conoce diferente cuminda prepara cu entre otro pisca y cocolishi.

Mayoria di  e platonan Arubiano (crioyo) ta consisti di pisca, carni cabrito, carni carne, carni baca, banana hasa, funchi y pan bati. Un plato tipico Arubiano ta pisca hasa cu banana hasa, pan bati of funchi cu saus crioyo, traha cu tomati, siboyo y un tiki binager. Ingrediente pa duna sabor ta berdura y specerij, manera batata dushi, yerbe hole y pica Madame Jeanette.

Sin duda un di e platonan mas saludabel di e cushina crioyo ta concomber stoba. E plato hopi tradicional aki ta consisti di concomber chikito y carni cabrito, carnisa, siboyo, conoflok y pica. Otro plato tradicional ta: 

  • Yambo- Un sopi fuerte traha cu yambo y pisca fresco of rabo di porco. Ta sirbi e plato aki cu funchi;
  • Keshi yena- E plato aki inspira door di e Hulandesnan, ta consisti di un keshi rondo coba yena cu galiña of carni cu rasenchi, oleifi, pica, cashupete, zilveruitjes y alcapara;
  • Carni stoba – Esaki ta un stoba di carni baca cu specerij, batata y saus preto;
  • Cabrito stoba – E plato aki ta wordo acompaña cu funchi of pan bati;
  • Kerrie kerrie (kari kari) - Pisca hila cu siboyo, tomati y specerij;
  • Calbas largo stoba – cu carni baca of rabo di porco;
  • Papaya stoba – papaya berde stoba cu carni bestia chikito, rabo di porco of pida, pida ribchi;
  • Sopi di bestia chikito - Ta sirbi e sopi tradicional aki na varios ocasion, manera bautismo, ricibimento y casamento;
  • Sopi carni – cu batata, tomati, selder, siboyo, promenton, wortel, conoflok, comino, nootmuskaat y prei;
  • Bacalao – Fresca e bacalao, saca e wesonan y hil’e. Despues ta prepar’e cu batata, tomati,pasta di tomati, promenton y specerij;
  • Bonchi corra – E ingredientenan mas uza di e plato masha popular y tradicional aki ta bonchi corra cu rabo di porco, carnisa, ribchi salo, selder, conoflok y siboyo;
  • Mondongo stoba - stoba di mondongo cu weso blanco, pata di porco, batata y specerij;
  • Sopi Mondongo – sopi fuerte di mondogo traha cu batata, maishi y siboyo;
  • Sopi pisca (Sopi di playa) – sopi di pisca (mochi of cabes);
  • Frekedel (Balchi di pisca) – balchi traha di pisca (hila), webo, specerij y paneermeel. Ta sirbi e balchinan hasa cu funchi of pan bati y banana hasa;
  • Kool stoba – cu carni stoba, carni cabrito of carne, carnisa, rabo di porco, ribchi, tomati, siboyo y pasta di tomati;
  • Pisca stoba – cu siboyo, tomati, batata, pasta di tomati, prometon, selder, peper y saus preto;
  • Higra stoba;
  • Arros con pollo – arros, galiña, ham corta y cabaron;
  • Carco stoba – cu batata, tomati, siboyo, salo, peper, comino y nootmuskaat;
  • Cabaron stoba;
  • Steak di weya; bistek hasa y cushina den saus;
  • Tutu; bonchi y sucu bruha den funchi;
  • Cocolishi stoba;
  • Ribchi stoba;
  • Rabo di baca stoba.

Snacks Arubiano

  • Suls – pata y orea di porco cu siboyo y clabo den binager; 
  • Kroket;
  • Pastechi – yena cu keshi, carni, pisca of galiña;
  • Pisca tempera – den siboyo y binager;
  • Calco tempera – den siboyo y binager;
  • Sanger yena – di cabrito, carne of porco;
  • Cala – bolita traha di bonchi wowo preto. Laga e bonchi drumi un anochi den awa, casca e bonchi, mula nan y hasa nan den forma di bolita;
  • Cheeseballs – bolita traha di keshi raspa, hariña blanco, webo y baking soda;
  • Webo yena;
  • Sopi oester;
  • Empana – di keshi, carni, pisca of galiña;
  • Soesjes – yena cu salada di tuna of cangreu;
  • Johnny Cake – traha di hariña blanco, awa, yeast, salo y suco, e ta wordo hasa den azeta y ta sirbi’e cu keshi of bacalao;
  • Balchi carni;

Dessert y cos dushi

  • Bolo upside down - E bolo gebolter aki (banda abou ta bira e banda ariba) dorna cu anasa y cherry, ta inspira door di e famoso upside down cake Mericano;
  • Quesillo – pudin di custard y caramel. E sabroso dessert di caramel aki ta contene webo fresco, lechi condens, rom, vanila, sucu y cherry pa dorna;
  • Cocada – cuki traha di coco raspa, sucu, tiña y awa;
  • Chupabebe - lollipop di sucu;
  • Bolo preto – E bolo tradicional di fruta na ocasion di bautismo, ricibimento y casamento. Ingrediente di e bolo aki ta entre otro: tutti frutti, figo seco, rasenchi, carent, dadel, pruim sin pipita y diferente sorto di likeur;
  • Cuki lerchi – cuki tipico Arubiano traha di hariña blanco, manteca, sucu y baking powder (mansa di tert);
  • Macaron – cuki di coco;
  • Drikidek – un tipo di ontbijtkoek;
  • Pan boyo – pudin di pan;
  • Tert – di coco of pruim;
  • Kakiña – un tipo di caramel;
  • Bolo di Cashupete;
  • Conserva – vierkant di caramel traha di lechi, sucu y pindakaas;
  • Pan dushi;
  • Chuculati pinda – bebida cayente traha di lechi, pindakaas y cacao;
  • Boyo – bolo tipico Arubiano traha di hariña di maishi rabo, webo y coco raspa;
  • Papa di maishi rabo;
  • Bolo di pruim;
  • Bolo di frigidaire – pan lefi yena cu crema y pida pida anasa y cherry corta fini, fini.

Berdura di Aruba

Door di e clima seco y poco awasero, na Aruba nos ta cultiva berdura na un cantidad limita. Mayoria di berdura ta procedente di agricultor cu ta cultiva berdura durante henter aña cu ayudo di sistema di irigacion di drip. Loke cu e agricultornan ta planta ta entre otro concomber chikito, concomber chines, yambo, un variedad di bonchi (manera pinda) y promente dushi y pica. Tambe nan ta cultiva cilantro, lechuga, selder, siboyin, spinashi Basella y kool. Riba tera muha nan ta cultiva taïr, kangkung (spinashi awa of ongchoi) y hasta waterkers ( berro, water cress). Na un forma exitoso nan ta cultiva tambe berdura cu ta spruit.

Fruta di Aruba

Na Aruba ta crece diferente mata di fruta, manera:

  • Kenepa;
  • Macapruim;
  • Shimarucu,
  • Druif;
  • Guyaba;
  • Mango;
  • Papaya;
  • Mispel,
  • Sorsaca;
  • Melon;
  • Patia;
  • Casho (Cashewfruit);
  • Granaatappel;
  • Tamarinde.

Mayoria biaha ta djis come e frutanan pero sa traha nan tambe na juice of batido door di mescla nan cu awa of lechi.

Nos ta traha hunto pa un portal Gubernamental pa Aruba, ku ta informativo, accesibel, y facil den uzo.
Algu di comenta? Click aki 

Page options