Prome cuido

Cuido medico di e prome liña ta den man di entre otro e dokter di cas (Lista di dokter di cas). Mayoria di dokternan di cas ta afilia na Algemene Ziekte Verzekering (AZV).

Si bo ta sigura na AZV, na momento di bo inscripcion, bo por scoge un dokter di cas fiho. Cada miembro di famia por scoge nan mesun dokter di cas. Na momento di scoge un dokter di cas, mester tene cuenta si cu:

  • Ta consehabel pa tur miembro di cas scoge e mesun dokter di cas. Esaki ta relaciona cu compilacion y mantencion di un file medico mas completo posibel di cada miembro di famia;
  • E consultorio di e dokter di cas ta cerca di unda bo ta biba pa, ora cu ta necesario, por haya ayudo medico rapido.

Pa por garantisa calidad di cuido medico, AZV a cera un acuerdo cu e dokternan di cas cu tin un cantidad maximo di pashent cu por inscribi na cada dokter di cas. Esaki ta pa evita cu demasiado asegurado ta inscribi na e mesun dokter di cas. Asina por pasa cu na momento di inscripcion of cambio di dokter di cas, e dokter di bo escogencia no ta lugar disponibel mas. Den e caso ey bo mester scoge un otro dokter di cas.

Si bo ta sigura na AZV, bo ta haya dos biaha pa aña oportunidad pa cambia di dokter di cas. Ta bon pa tuma contacto prome cu e dokter di bo escogencia pa check si e tin lugar habri ainda. Bo por tuma contacto tambe cu AZV pa puntra si ainda ta posibel pa inscribi cerca e dokter cu bo kier scoge.

Tene cuenta cu lo siguiente ora di cambia di dokter di cas:

  1. Bo mester yena un formulario di cambio (formulario cambio di dokter di cas). E formulario aki ta obtenibel na oficina di AZV;
  2. Bo mester laga e dokter cu bo a scoge firma y stempel e formulario yena;
  3. Bo mester laga firma y stempel e formulario yena door di e dokter di cas cu bo tin actual;
  4. Mester entrega e formulario yena completo, firma y cu stempel di e dokternan na oficina di AZV.

Despues cu a haci e cambio, bo ta ricibi un polisa nobo den cua a incorpora e cambio. E ora ey bo por haci uzo di e servicionan di e dokter di cas “nobo”.

Si bo ta sigura na AZV, bo tin derecho riba ayudo medico sin pago cerca un dokter di cas. E dokter aki mester ta afilia si na AZV. AZV no ta cubri gastonan di chekeo medico general, manera un keurmento pa deporte of un keurmento pa haya rijbewijs. E gastonan aki bo mes mester paga.

Pa ayudo medico bo por acudi cerca bo dokter di cas durante oranan di consulta. Si bo situacion di salud no ta permiti pa bay na e consultorio of durante e oranan di consulta, bo por puntra pa un consulta na cas. Semper ora di bay dokter of bishita di dokter bo mester mustra bo carchi (carnet) di AZV (zorgpas). Den casonan di urgencia, pafor di oranan di consulta, bo por acudi na e dokter di cas cu ta na warda na e consultorio di dokter di cas (huisartsenpost) na Horacio Oduber Hospital.

E orario di consulta na e consultorio di dokter di cas na Horacio Oduber Hospital ta:

  • durante siman: di 7 or pa 11 or di anochi;
  • durante fin di siman: di 9 or di mainta pa 1 or di merdia y
                                      di 6 or di atardi pa 10 or di anochi.

E number di telefon di e consultorio di dokter na warda ta: 587 4300. Den caso di urgencia bo por yama e number di alarma: 911

Den caso cu bo dokter di cas ta ausente e mes ta regla su reemplaso. Pa sa ta ken ta reemplasa bo dokter di cas ora cu e ta ausente bo por acudi na:

  • Consultorio di bo dokter di cas;
  • Telefon di dokter na warda: 587 4300;
  • Centro Medico San Nicolas, telefon 524 8833;
  • Oficina di AZV, telefon 5279900.

Tambe via medionan di comunicacion ta anuncia ausencia y reemplaso di dokternan di cas.

Si bo no ta sigura na AZV of bo no kier haci uzo di e servicionan di AZV, ta recomenda pa, na bienestar di bo salud y esun di bo famia, scoge un dokter di cas.

Si bo ta sigura pa gasto medico na un otro manera, otro reglanan por ta conta. Pa esaki bo por consulta bo polisa di seguro of tuma contacto cu bo compania di seguro.

Nos ta traha hunto pa un portal Gubernamental pa Aruba, ku ta informativo, accesibel, y facil den uzo.
Algu di comenta? Click aki 

Page options