Preparacion y yegada

Prome cu sali pa bin biba na Aruba, mester regla cierto asunto. Asina ta necesario, pa hopi adelanta busca cierto documento p'asina bo tin nan den bo poder prome cu bo biaha.
 

Bo mester di por ehempel papel di bon conducta pa bo peticion di permiso y lo bo por warda hopi ariba investigacion en conexion cu e papel aki. Ora di planea bo biahe pa Aruba, bo mester tene cuenta cu esaki! Si bo a planea pa bin biba na Aruba, bo mester e siguiente documentonan:

  • Un paspoort valido y otorga na e pais di procedencia;
  • Algun pais di procedencia ta rekeri un visa;
  • Un permiso of un carta oficial di estadia;
  • Un E/D Card (Embarkation-Disembarkation Card) manera cu ta ilustra aki bou, completamente yena. Esaki bo ta haya den e avion of barco, cu bo ta biahando pa Aruba cune.


          

Si bo no tin e tres document ariba menciona, bo no por drenta Aruba y lo manda bo bek pa bo pais di procedencia den e prome oportunidad cu presenta.

Si bo ta biaha for di Hulanda pa bin biba na Aruba, bo mester pidi tambe na e municipio unda bo ta biba, e siguiente documentonan:

  • Prueba cu bo kita bo number for di e registro na bo municipio;
  • Extracto (uittreksel for di registro di nacemento);
  • Den caso cu bo ta casa: extracto (uittreksel) di acto di matrimonio;
  • Den caso cu bo ta divorcia: extracto (uittreksel) di acto di divorcio.

Ta importante pa controla bo documentonan, ora cu e empleado di inmigracion duna bo nan bek. E documentonan aki, entre otro ta determina bo status di estadia na Aruba. Si acaso tene un control, bo mester por presenta e documentonan menciona.

Pa drenta Aruba for di cierto pais ta rekeri cu bo tin un visa. Mester haci peticion pa visa na tempo na Embahada of Consulado Hulandes den e pais di procedencia. Diferente compania di aviacion of crucero no ta aborda un pasahero cu no tin un visa valido, si e pais di destinacion ta exigi esey.

Nos ta traha hunto pa un portal Gubernamental pa Aruba, ku ta informativo, accesibel, y facil den uzo.
Algu di comenta? Click aki 

Page options