Prome ministro na forum di arkeologia (gearchiveerd)
ORANJESTAD –Hobennan di e institutonan arkeologico di Boneiro (BONAI) y St. Maarten (SIMARC) ta di bishita na Aruba pa comparti informacion tocante historia, arkeologia, rol di hubentud y e importancia di herencia y monumentonan cu hobennan Arubiano.
E conocido arkeologo Jay Havisser a establece BONAI y SIMARC pa motiva hobennan pa entre otro papia, siña evalua y pensa ariba elementonan di nan herencia natural y arkeologico. Durante tres dia di trabao e bishitantenan a haya oportunidad pa hunto cu hobennan di Aruba intercambia informacion y bishita entre otro nos museo arkeologico nobo. Despues nan a atende un forum conduci pa Jacky Bernabela y Hubert Vis di e delegacion di Boneiro y Raymundo Dijkhoff di Aruba. Prome Minister di Aruba, sr. Mike Eman a habri e forum y a expresa su admiracion pa e trabao di e hobennan y el a bisa cu nan ta representa e futuro Reino Hulandes. Sr. Eman a enfatisa cu historia ta importante pa e contenido di e relacionan pa futuro.
Prome Minister Eman a motiva e hobennan pa yuda preserva e herencia cultural, historico y arkeologico di nan pais, pasobra e futuro generacion mester sa kico a pasa den pasado. Sra. Bernabela a expresa aprecio di e hobennan y e organisadornan pa e aporte di sr. Eman y a entreg’e un T-shirt di BONAI cu e lema “Looking for the past in the future.”
