Aruba lo por expande turismo crucero (gearchiveerd)
ORANJESTAD – Lo bay traha pa expande turismo crucero di Aruba door di ofrece mas servicio na e barconan y e bishitantenan.
Aruba ta un destinacion favorito pa hopi turista crucero y Florida Caribbean Cruise Association lo sigui traha pa trece mas barco y naturalmente mas turista pa Aruba.
Un delegacion di FCCA encabesa pa su presidente señora Michele Paige a reuni cu minister di Turismo y Transporte señor Otmar Oduber tocante e posibilidad pa e barconan por keda mas rato na Aruba. Consecuentemente Aruba tambe lo por ofrece mas posibilidad pa recreacion pa e turistanan manera musica den cruise terminal, mas tienda habri pa haci compras, kioskonan pa bende souvenir, etc.
Sondeonan haci caba ta indica cu Aruba ta un destinacion hopi popular tanto cerca e turistanan como e miembronan di tripulacion. Sinembargo tanto FCCA como Gobierno kier mira con Aruba por saca mas ganashi for di e barconan entre otro pa nan keda mas rato y tambe organisa mas actividad na e puerto mes, mas tour pa turista y mas posibilidad pa haci compras.
Na 2009 Aruba a ricibi como 600 mil turista crucero y tin tur indicacion cu e lineanan grandi di crucero lo aumenta nan bishita den e haf di Oranjestad.
