Preparacion pa studiantenan cu ta bay exterior (gearchiveerd)
ORANJESTAD – Dia 25 di februari proximo lo tin un anochi di informacion pa mayornan y nan yiunan tocante e prestamo di estudio di Aruba (Arubalening).
E seccion di Guia di Facilidad y Estudio lo sigui proximamente cu su actividadnan pa e hobennan ta bon prepara pa bay studia den exterior.
Durante luna di maart proximo e studiantenan lo ricibi for di DUO (Dienst Uitvoering Onderwijs) informacion tocante e financiamento di estudio door di Hulanda. Prome cu 15 di mei 2010 mester entrega tur aplicacion of cambio cu ta concerni estudionan cu ta rekeri un numerus fixus.
Na luna di mei tur studiante cu a aplica pa financiamento di estudio door di Hulanda lo haya sa si nan mester participa den un sorteo(loting).
Di su banda Departamento di Enseñansa lo informa durante luna di mei kendenan ta bini na remarke pa un prestamo di estudio di Aruba.
Pa mas tarda 30 di juni DUO mester haya un lista di cifra provisional di studiantenan cu a aplica pa un estudio cu un numerus fixus.
Dia 30 di juni lo tin un atardi di informacion pa studiantenan cu ta bay sigui studia na Corsou.
Durante luna di juli tur candidato mester entrega copia di nan diploma autentica y tambe lista di cifra na Departamento di Enseñansa. Entre 1 y 9 di juli lo tin un curso di preparacion pa esnan cu ta bay studia na Hulanda. Tambe lo duna informacion tocante sexualidad, abuso di droga y motivacion. Despues di 15 di juli tur candidato lo haya informacion por escrito tocante nan peticion pa Arubalening. Esnan cu no ta bay haci uzo di e Arubalening y cu no ta bay studia mas na Hulanda, mester informa tanto departamento di Enseñansa como e scol na Hulanda tocante nan decision.
Dia 19 di juli lo tin un anochi di informacion pa e studiantenan y nan mayornan. Ariba e anochi aki tambe e studiante lo firma e contract pa e prestamo di estudio. Dia prome di augustus e studiantenan lo sali pa Hulanda. Esnan cu ta bay sigui studia na Aruba mes of den e region lo tin oportunidad pa firma nan contract ariba dianan 20, 21, 22 y 23 di juli 2010.
