KLM a reanuda su vuelonan pa Aruba (gearchiveerd)
ORANJESTAD - Reanudacion di e vuelonan di KLM pa Aruba ta aumenta e cantidad di turistanan cu lo bishita Aruba for di paisnan Europeo, manera Hulanda, Alemania y Scandinavia.
Diversificacion di e industria turistico ta haci cu Aruba no kier keda depende solamente di mercado Norteamericano, pero ta desea di haya mas turista tambe for di Europa.
Tanto ministro presidente mr. Mike Eman como ministro di encarga cu Turismo Otmar Oduber ta masha contento cu por a logra pa KLM regresa Aruba.
Por lo pronto esaki lo ta dos vuelo pa siman y hunto cu e vuelonan di Arke Fly y Martinair y Tomas Cook y Aruba por ta sigur cu e capacidad di stulnan disponibel pa turistanan Europeo a crece.
Fuera di e ceremonia na Aeropuerto cu presencia di dignatarionan di Hulanda y Aruba, un gran cantidad di hende tambe a presencia e yegada di e Boeing 747 den cercania di Aeropuerto Internacional Reina Beatrix.
