Ministerio di Economia, Asunto Social y Cultura

 Bou di Ministerio di Economia, Asunto Social y Cultura ta resorta e siguiente departamentonan:

BHC | BIE | Bureau Sostenemi | CBS | CdC/SSA | CEDE Aruba  | DCA |DEZHI  |DSZ | FDEC | FPNA |HCFC | MAA/AMA | MHA/HMA | MNA/NMA | MonBur | SMFA | SMRW/AMS | UNESCO | UNOCA | Volkskredietbank

BHC

Pa Oficina di Huur y Proteccion di Consumidor (Bureau Huur en Consumentenbescherming) ta aplicabel e siguiente datonan: 

E meta di Oficina di Huur y Proteccion di consumidor (Bureau Huur- en Consumentenbescherming) ta pa promove un maneho balancea riba tereno di asunto di huur y di consumidor. Oficina di Huur y Proteccion di consumidor ta trata di realisa su meta door di ehecuta por lo menos e siguiente tareanan, manera describi den e decreto nacional:

• Formula conseho di maneho pa e Minister di Asunto Economico tocante tur asunto cu ta regarda proteccion di huur y consumidor, inclusivo duna proposicion pa adapta e legislacion existente como tambe pa traha legislacion nobo;
• Duna conseho y sostene Huurcommissie na un forma administrativo den ehecucion di nan tarea segun e ley di Huurcommissie;
• Supervisa e cumplimento di e stipulacionnan di e ley di Huurcommissie y otro ley(nan) cu tin como meta proteha e consumidor. Ta haci esaki pa medio di empleado publico specialmente asigna y encarga door di e autoridad competente cu e meta aki.
• Conseha y sostene den forma administrativo e organisacionnan apunta pa e Minister concerni of Gobierno cu tin como meta promove proteccion di huur y consumidor.

Bolbe na cuminsamento

BIE

Pa Oficina di Propiedad Intelectual (Bureau Intelectueel Eigendom) ta aplicabel e siguiente datonan:

Bolbe na cuminsamento

Bureau SOSTENEMI

Pa Bureau Sostenemi ta aplicabel e siguiente datonan:

Bureau Sostenemi lo fungi como un punto central di conseho, raporta y coordinacion relaciona cu maltrato di mucha. E lo traha hunto cu institucionnan y organisacionnan existente cu ta trahando ariba e tereno di combati maltrato di mucha. Ademas Sostenemi lo organisa un manera di traha mas efectivo posibel pa combati maltrato di mucha dirigi pa mehora e calidad di informacion y cuido riba e tereno aki. Pa logra tur esaki, Sostenemi a defini e siguiente tareanan principal:

• Duna asistencia;
• Duna conseho y informacion;
• Conscientisa comunidad relaciona cu maltrato di mucha;
• Prevencion;
• Duna conseho ariba tereno di maneho.

Bureau Sostenemi tin e tarea pa, na beneficio di e menor di edad na Aruba, stimula comunidad pa raporta y apoya den caso cu tin sospecho di maltrato di mucha. Base di esaki ta e concepto cu denuncia y atende maltrato, maluzo y negligencia di mucha ta un responsabilidad di nos tur. Esaki ta encera cu un y tur (profesional, miembro di famia, bisiña, conocir of esnan cu a mira algo) cu ta haya nan mes confronta cu señal cu ta mustra den direccion di maltrato di un menor di edad mester yama na telefon pa conseho con pa anda cu e situacion y con pa actua dentro di su mesun posibilidad na interes di e menor di edad.

Bolbe na cuminsamento

CBS

Pa Oficina Central di Estadistica (Centraal Bureau voor de Statistiek) ta aplicabel e siguiente datonan:

Bolbe na cuminsamento

CdC/SSA

Pa Cas di Cultura/Stichting Schouwburg Aruba ta aplicabel e siguiente datonan:

Cas di Cultura (CdC) ta e teatro nacional y centro cultural di Aruba. Fundacion Teatro Aruba ( Stichting Schouwburg Aruba (SSA)), cu ta un organisacion cu no tin como meta pa haci ganashi, ta maneha Cas di Cultura. Na aña 1956 a funda SSA cu e meta pa lanta y mantene un edificio, na unda por desaroya y promove e bida cultural di e comunidad Arubano. E edificio “Cultureel Centrum” a habri oficialmente na aña 1958. Mas despues a cambia e nomber pa “Cas di Cultura”.
Desde aña 2000 Gobierno di Aruba ta subsidia un parti di e gastonan di salario. CdC ta cubri tur gasto di operacion. Door di huurmento di sala pero tambe pa medio di un programacion propio, diferente actividad y presentacion riba tur tereno di arte ta tuma lugar. Tambe tin otro actividadnan riba tereno social cu ta di importancia pa comunidad. Tambe tin organisacionnan cu ta uza CdC pa meta comercial. E oficinanan di Scol di Musica Rufo Wever, fondo cultural UNOCA y Scol di Baile Diana Antonette tambe ta keda den CdC.
Cas di Cultura ta ubica riba e caminda, biniendo di aeropuerto direccion pa Playa, na e rotonde di Las Americas na Vondellaan 2 na Oranjestad y pa tur informacion por yama (+297) 582-1010.

Bolbe na cuminsamento

CEDE Aruba

Pa Centro pa Desaroyo di Aruba ta aplicabel e siguiente datonan:

CEDE Aruba ta un fondo cu ta cofinancia proyecto di organisacionan no-gubernamental. CEDE Aruba ta activo riba tereno di: bienestar social, educacion publico y recreo publico.

CEDE Aruba ta cofinancia, esey kier men cu esun cu ta haci e peticion tambe mester contribui na e realisacion di e proyecto. Normalmente e contribucion propio ta 25% di e total di e proyecto. 

Bolbe na cuminsamento

DCA

Pa Departamento di Cultura Aruba ta aplicabel e siguiente datonan:

Desde aña 1963 Aruba tin un Departamento di Cultura y Educacion, bou Gobierno Central di Antiyas Hulandes. Dia 30 di september 1978, Diputado di Cultura di e tempo ey, a institui oficialmente un departamento di cultura nobo cu un nomber na Papiamento, esta Instituto di Cultura Aruba (ICA). E meta di ICA ta pa conserva, mantene, promove y haci investigacion cultural den un forma amplio atrabes di su seccionnan riba diferente area cultural y percura pa difusion di esaki. Entre otro arte dramatico y plastico, musica, idioma Papiamento y arkeologia.

Bolbe na cuminsamento

DEZHI 

Pa Departamento di Asunto Economico,Comercio y Industria (Directie Economische Zaken, Handel en Industrie) ta aplicabel e siguiente datonan:

E Departamento di Asunto Economico, Comercio y Industria (DEZHI) ta resorta bou di Minister di Economia, Asunto Social y Cultura (Decreto Nacional di 28 maart 2003 no.33) y ta encarga cu dunamento di conseho na e minister tocante maneho economico y pa ehecuta e maneho na nomber di e minister. E departamento ta consisti di cinco seccion: Implementacion Maneho Economico (Implementatie Economisch Beleid), Establecimento di negoshi (Vestiging van Bedrijven), Relacion Economico Internacional y Promocion di Inversion (Buitenlandse Economische Betrekkingen en Investeringsbevordering), Maneho Economico y Cooperacion pa desaroyo (Economisch Beleid en Ontwikkelingssamenwerking) y e seccion di Servicio di asistencia general y Asunto di Personal (Facilitaire diensten en Personeelszaken). E gerencia ta desaroya, monitor y evalua e maneho socioeconomico pa un desaroyo economico duradero.

Vision DEZHI
DEZHI ta desaroya su mes den un organisacion gubernamental optimal cu ta brinda e ciudadano Arubano, companianan local y internacional y instancianan un servicio di calidad halto na un manera eficaz, profesional y dirigi riba e cliente. Ta haci esaki pa medio di un desaroyo di maneho apropia, monitor structural y control riba tereno socioeconomico.

Mision DEZHI
DEZHI ta contribui na un desaroyo socioeconomico sano y duradero di Pais Aruba: di e forma aki e ta sostene Gobierno den realisacion di un maneho y control economico bon funda. DEZHI ta independiente den dunamento di conseho na Gobierno y asina e ta facilita e tumamento di decision riba asuntonan economico y responsabilisacion di Pais Aruba.

Metanan strategico:

• Stimula un desaroyo socioeconomico duradero pa medio di diversificacion di e economia y consolidacion di e sector turistico;
• Eleva e calidad di bida di e habitantenan di Aruba door di stimula actividadnan socioeconomico ariba e isla;
• Mantene un funcionamento sano di mercado pa un crecemento balancea den economia di Pais Aruba;
• Promove Aruba como un centro di comercio pa servicio y productonan den region pa un desaroyo socioeconomico duradero ariba e isla;
• Coordina e proceso di planificacion strategico nacional y promove e coordinacion y cooperacion entre e instancianan envolvi.

Tareanan principal:

• Analisa e asuntonan socioeconomico, monitor y evalua e maneho socioeconomico, duna conseho y desaroya e maneho socioeconomico;
• Coordina e proceso di planificacion strategico nacional y promove e coordinacion entre e instancianan envolvi;
• Duna conseho tocante e preparacion y ehecucion di e maneho y proyectonan (entre otro cooperacion pa desaroyo) cu ta contribui na e desaroyo di e economia;
• Desaroya y ehecuta e maneho pa promove comercio internacional (promove exportacion di producto y servicio ) y e integracion di e economia di Aruba den e economia mundial;
• Desaroya y ehecuta e maneho pa un clima di inversion atractivo pa promove inversionnan na Aruba pa un desaroyo economico duradero (inversionistanan local y internacional);
• Duna conseho y promove un maneho socioeconomico den cuadro di e maneho di prijs (prijzenverordening), maneho pa proteccion di mercado (mededingingswetgeving) y ley di importacion, exportacion y transito (Landsverordening in, uit, en doorvoer), proteccion di consumidor (ley di consumidor), maneho energetico, maneho relaciona cu ceramento di tienda (winkelsluitingbeleid);
• Regula e comercio local pa medio di dunamento di permiso di establecimento, monitor e desaroyonan di establicemento di negoshi na Aruba y haci control riba e cumplimento di e ley di establecimento na Aruba.

Bolbe na cuminsamento

 DSZ 

Pa Departamento di Asunto Social (Directie Sociale Zaken) ta aplicabel e siguiente datonan:

Bolbe na cuminsamento

 

 FDEC

Pa Fundacion Desaroyo Educativo Comunitario ta aplicabel e siguiente datonan:

Fundacion Desaroyo Educativo Comunitario (FDEC) a ser funda dia 26 di november 1997 y tin como meta pa stimula y promove e desaroyo social, cultural y general di e pueblo di Aruba en general y e hubentud di Aruba en particular riba un base no religioso y no politico. E fundacion ta trata di alcansa e meta door di planea, organisa y activa trabou pa hubentud, desaroyo di e poblacion, trabou social pa famia, trabou den bario y trabou pa adulto. Nos ta haci esaki door di organisa, desplega, stimula y coordina tur sorto di actividad riba e tereno di desaroyo general manera arte, musica, deporte y recreacion, door di traha hunto y promove un bon cooperacion entre e organisacionnan ya existente y e centronan di bario.

Ta duna curso den diferente districto manera Oranjestad, Santa Cruz, Savaneta, Noord, San Nicolas y Paradera di dialuna pa diabierna di 2:00 pm te cu 7.00 pm y diasabra di 9.00 am pa 7.00 pm.

E edad di e cursistanan ta varia entre 8 y 84 aña.

Dos bes pa aña ta tene un exposicion di e pinturanan, “Airbrush” y obranan di man, combina cu un presentacion di e orkesta di FDEC. Ta entrega certificado (A,B,C,D) na e alumnonan cu a pasa un examen cu exito.
E fundacion tin un directiva di shete miembro y tambe tin den su servicio un coordinador, dos trahado di oficina, dos supervisor, nuebe docente di musica, un pintor, un docente di “airbrush”, un docente di obra di man y un docente cu ta duna les di cuarta y guitara na personanan cu problema di bista, esta e clientenan di FAVI.

E fundacion ta duna les tambe na KIA, e instiuto coreccional. Ta duna curso di obra di man p’e seccion di hende muhe, di pintura pa e hobennan hubentud y ‘airbrush” p’e seccion di hende homber.

Bolbe na cuminsamento

 FPNA

Pa Fundacion Parke Nacional Arikok ta aplicabel e siguiente datonan:

Bolbe na cuminsamento

HCFC

Pa High Commissioner Aruba Financial Center ta aplicabel e siguiente datonan:

Bolbe na cuminsamento

 MAA/AMA

Pa Museo Arkeologico Arubano/Archelogisch Museum Aruba ta aplicabel e siguiente datonan:

Museo Arkeologico Aruba ta investiga, documenta y administra artefacto arkeologico y lugar di hayamento na Aruba. Alabes ta informa tanto e comunidad local como esun internacional tocante e herencia cultural Indio-Americano di Aruba.

Bolbe na cuminsamento

MHA/HMA

Pa Museo Historico Arubano/Historisch Museum Aruba ta aplicabel e siguiente datonan:

Bolbe na cuminsamento

MNA/NMA

Pa Museo Numismatico Aruba ta aplicabel e siguiente datonan:

Bolbe na cuminsamento

MonBur

Pa Monumenten Bureau Aruba ta aplicabel e siguiente datonan:

Ministro di Cultura a institui na aña 1994 e Conseho di Monumento. Na januari di aña 1996 a sigui Oficina di Monumento y na juni di aña 1996 e Fondo di Monumento.

Vision:
Duna bida nobo na e monumentonan di Aruba y nan ambiente na un manera cu ta cultural historico responsabel, pa di e manera aki nan por bira un lugar na unda por biba, haci compra y traha. E turista tambe por haya un lugar agradabel pa por keda.

Mision:
Administra e proceso di conservacion di monumento na Aruba na unda e proteccion, mantencion y restauracion di monumto ta central.

Maneho:
E metanan di Oficina di Monumento ta encera lo siguiente:

• Stimula, stipula norma y controla activamente e cumplimento cu e ordenansa di monumento (AB1991 no. GT46);
• Adapta e ordenansa di monumento na loke ta sosode den practica;
• Inicia e procedura pa apunta despues di finalisacion di e baloracion;
• Formulacion di un sistema di permiso.

Bolbe na cuminsamento

SMFA

Pa Fundacion Fondo di Monumento Aruba (Stichting Monumenten Fonds Aruba) ta aplicabel e siguiente datonan:

‘Monumentenzorg’ na Aruba a demostra e ultimo añanan su derecho di existencia.
Den boca di pueblo ta compronde bou di ‘Monumentenzorg’ e tres organonan cu derecho civil y cu ta activo riba tereno di monumento, esta Conseho di Monumento, Oficina di Monumento y Fundacion Fondo di Monumento.

Dia 17 di juni 1996 a funda e Fondo di Monumento Aruba cu tin como tarea primordial, obtene y maneha medionan financiero pa restauracion di monumento na Aruba. Fundacion Fondo di Monumento Aruba tin un directiva di tres miembro.
E oficina mes tin dos trahado.

Bolbe na cuminsamento

SMRW/AMS

Pa Scol di Musica Rufo Wever/Stichting Arubaanse Muziekschool ta aplicabel e siguiente datonan:

Fundacion Scol di Musica Arubano, funda na aña 1953, tin como meta promove arte di musica y tur arte similar en general y particularmente duna les den e artenan aki. E fundacion ta consisti di un directiva, un gerencia, un cuerpo administrativo, un cuerpo di docente y servicio di mantencion.
For di 10 di september 1998 e scol di musica a haya e nomber di ‘Scol di Musica Rufo Wever’ y e tin como mision duna un aporte na e formacion musical optimal na Aruba.

Den vision di e scol di musica ta duna hopi atencion na e desaroyo musical di studiantenan tanto riba tereno clasico como riba e tereno popular, p’asina nan por participa na eventonan social y cultural na Aruba.
E scol ta duna les di entre otro piano, gitara clasico y electrico, gitara bas, percusion, cuarta, fio, trompet, blokfluit, canto y AMV (Algemene Muziekale Vorming). E lesnan ta tuma luga na Oranjestad, San Nicolas y Santa Cruz.

Bolbe na cuminsamento

 UNESCO

Pa United Nations Educational, Scientific and Cultural Organization ta aplicabel e siguiente datonan:

A funda United Nations Educational, Scientific and Cultural Organiszation (UNESCO) dia 16 di november 1945 y e ta un agencia specialisa di Nacionnan Uni. Pa UNESCO enseñansa, sciencia, cultura y comunicacion, ta e recursonan pa logra un meta ambicioso grandi: establece pas den mente di e hende.

“Since wars begin in the minds of men, it is in the minds of men that the defenses of peace must be constructed”
UNESCO Constitution

Desde 20 di oktober 1987 Aruba ta miembro asocia di UNESCO.

Bolbe na cuminsamento

UNOCA

Pa Union di Organisacionnan Cultural Arubano ta aplicabel e siguiente datonan:

UNOCA ta traha na desaroyo cultural como parti di desaroyo general di Aruba.

Reforsa identidad colectivo Arubano ta e meta primordial cu UNOCA kier logra.

Cu realisacion di Status Aparte e responsabilidad pa forma un solo pueblo y un solo nacion a bira mas grandi. Cada ciudadano mester ta orguyoso di ta forma parti di un nacion den cua cada un ta asumi su responsabilidad pa aporta na su propio bienestar y na bienestar general.

Consciente di su responsabilidad grandi, UNOCA den su maneho ta duna atencion na necesidadnan cu ta sali for di comunidad Arubano y ta duna prioridad na reforsa nos identidad Arubano, optimalisa infrastructura cultural y oportunidad pa mas hende den nos comunidad participa na eventonan cultural.

Comunidad Arubano tin derecho ariba participacion y acceso na bida cultural. Tambe e tin derecho y obligacion moral pa influencia decisionnan cu tin consecuencia pa su posibilidad y capacidad pa por expresa su mes culturalmente. Expresion cultural ta di y pa pueblo.

Bolbe na cuminsamento

Volkskredietbank

Pa Volkskredietbank van Aruba ta aplicabel e siguiente datonan:

Bolbe na cuminsamento

• Privacy
• Copyright
• Colofon
• Disclaimer