Naturalesa y Medio Ambiente
Aruba ta un isla bunita, pero sigur ta cu e por ta mas bunita, mas limpi y un mihor lugar pa biba ainda. Pa logra esaki mester di esfuerso di un y tur cu ta biba aki. Un tarea di nos tur ta pa tene nos isla limpi y agradabel pa biba. Tambe nos mester percura pa cu mayan nos yiunan y nos nietonan por disfruta di e isla aki. Pa por logra tur esaki nos ta papia di desaroyo duradero of sostenibel.
Maske cu relativamente Aruba ta un comunidad chikito cu poco industria cu ta contamina medio ambiente ta di gran importancia pa nos mantene e honor di nos medio ambiente y naturalesa.
Esaki ta sosode, di un banda dor di tuma medida pa proteha, cu ta basa of no riba tratado internacional y di otro banda dor di stimula e desaroyo local riba e tereno aki. Naturalesa y Medio ambiente na Aruba ta encera tur bestia y mata na Aruba, den laman of becindario (awa, suela y aire) cu nos comunidad tin un relacion mutuo cune. Gobierno a formula su maneho riba tur e terenonan aki.
Varios instancia na Aruba, sea gubernamental of no, ta envolvi den mantene naturalesa bibo y un medio ambiente saludabel. Tur tin como meta pa salvaguardia nos futuro riba e tereno aki.
E ta un reto grandi pa balansa e desaroyo di Aruba den direccion di un desaroyo duradero y sostenibel. Ta mas cu claro cu Gobierno ta desempeña un tarea hopi importante den esaki. E tema aki lo sigui haya mas atencion den e proximo añanan.
