Turismo
Link naar website van www.aruba.com
Kiezerslijst 2013
Arubahuis
Green Aruba where Europe meets the Americas

Propiedad intelectual

General | Derecho di autor | Patent | Derecho di marca

General

Un propiedad intelectual ta un creacion di e espirito humano, e inteligencia humano. P’esey e ta yama “propiedad intelectual’. Propiedad intelectual ta e derechonan legal cu ta sali for di e actividadnan intelectual riba e tereno industrial, cientifico, literario y artistico.
Pa defende y promove e creatividad aki, e legislado a crea e derecho di propiedad intelectual. Por dividi e propiedad intelectual den dos tereno principal.

Derechonan di propiedad intelectual cu ta regarda creacion literario, musical, artistico, fotografico y audiovisual etc.: derechonan di propiedad industrial cu ta encera diseño industrial, invento, marca comercial di y combati competencia inhusto.
Propiedad intelectual ta un coleccion di diferente derecho: derecho di autor, derecho di marca, derecho di dibuho y modelo, derecho di nomber comercial, derecho di nomber di dominio (di internet) y derecho di patent. E derechonan aki ta forma parti di practica diario di propiedad intelectual.
E derechonan di propiedad intelectual cu por defende na Aruba ta:


Un propiedad intelectual tin como meta pa proteha e autor y e inventor di un obra intelectual, invento, producto y servicio door di duna nan derecho exclusivo temporario y limita p’asina nan por controla e uzo di e producto (fruto) di nan mente.
E derecho aki no ta aplicabel riba e obheto fisico y tangibel (visibel) den cua e pensamento creativo su tras ta yega na su expresion, pero ta referi na e creacion intelectual mes.

Obra literario ta proteha door di derecho di autor (copyrights), invento door di derecho di patent y un marca door di derecho di marca. Door di derecho di propiedad intelectual, gobierno por duna cierto derecho na e creador of inventor di un invento, producto, nomber di marca, pieza musical of obra literario.
Loke nos ta yama awor "propiedad intelectual", ta derechonan cu a desaroya durante e ultimo 450 añanan, unda hende a bira consciente cu por gana mas placa cu trabou inmaterial (mental) cu traha of negocia cu producto material.

Danki na e derecho di propiedad intelectual e autor por proteha su obra of logro y gana placa cu esaki. E proteccion cu e derecho di propiedad intelectual ta brinda ta esencial pa e desaroyo y promocion di nos economia y e adelanto di nos comunidad. E derecho exclusivo aki ta un estimulo pa e autor y inventor haci inventonan nobo y creacionnan especial. Solamente e ta determina bou di cua circunstancia y condicion su creacion of invento ta subi mercado.

Na november 1987 e Oficina di Propiedad Intelectual (BIE) a cuminsa cu registracion di marca comercial na Aruba. Antes registracion a tuma luga door di intervencion di e Oficina di Propiedad Intelectual di Antias Hulandes, estableci na Curaçao, Antias Hulandes. E Oficina di Propiedad Intelectual, di awor pa dilanti referi como BIE ta encarga cu e proteccion di propiedad intelectual na Aruba.

E derechonan tocante propiedad intelectual ta estrechamente mara na otro. Por ehemplo un invento tecnico por haya proteccion bou di diferente derecho; e aparato ta proteha door di e ley di patent, e nomber y logo di e aparato bou di e ley di marca y e potret of indicacion di uzo di e aparato bou di e ley di autor.

Sin e proteccion di e derecho di propiedad industrial, lo ta imposibel pa e autor y inventor pa traha na un manera profesional ariba nan expresion creativo. Sin e proteccion aki, renobacion den arte, innovacion den tecnologia of desaroyo di nos literatura lo ta practicamente imposibel.

E derecho di propiedad intelectual ta duna proteccion na tur hende cu ta bezig cu obra creativo y innovativo. Hopi hende no ta suficientemente na altura di tur e posibilidadnan cu e ley di autor, e ley di patent y e ley di marca ta ofrece.

Bolbe na cuminsamento

Derecho di autor

General | Publicacion | Reproduccion | Registracion | Restriccion di derecho di autor | Violacion di e derecho di autor | Duracion di e proteccion | Derecho di autor derecho moral y economico | Licencia y traspaso | E simbolo | Manual

General

E derecho di autor ta e derecho exclusivo di un autor pa publica, produci, reproduci y comercialisa su obranan di literatura, ciencia of arte. E ta un di e derechonan mas visibel cu e autor tin riba su obra. Segun e convencion di Berner, un tratado internacional cu ta contene regla tocante derecho di autor, ta otorga proteccion di derecho di autor automaticamente na cualkier obra creativo; e autor no mester haci un peticion pa proteha su creacion of laga registr’e.

E convencion di Berner (9 september 1886) di cua Aruba ta miembro, a regla pa prome biaha reconocimento di derecho di autor entre nacionnan independiente. E ta encera cu e autor ta haya automaticamente proteccion internacional pa tur clase di creacion cu e ta haci. Si bo crea un obra di ciencia, literario of arte, automaticamente bo ta haya e derecho exclusivo pa public’e y pa copie.

Na Aruba (manera ta e caso na algun pais), ora bo registra e producto di bo creacion bo ta haya un certificado di registracion di derecho di autor cu bo por uza como un prueba adicional di autor den caso di duda. E derecho di autor ta origina segun ley, pero un registracion aparte ta util si ora bo mester entrega prueba y pa bo ta mas fuerte para den bo posicion ora di prueba algo. En todo caso, ora cu tin derecho di autor riba un creacion, registra of no, ningun hende por uza of distribui bo creacion sin bo permiso como autor. E meta di e derecho di autor Arubano ta pa promove creatividad y e intercambio ordena di idea.

Derecho di autor ta aplicabel riba tur creacion original literario, cientifico, dramatico, musical y artistico. Buki, otro escritura, escultura, cuadra, potret, pelicula, obra di teatro, programa di radio y television, programa di computer y en general tur creacion, den cua forma cu e ta reproduci of multiplica, tin derecho di autor segun e ley di autor Arubano.
E registracion di derecho di autor por tuma luga na un forma simpel y informal. Pa registra bo creacion original di arte, literatura of ciencia bo por acudi na e Oficina di Propiedad Intelectual. Di e registracion bo ta haya un prueba por escrito, riba cua bo nomber, e fecha y e ora di e registracion ta poni. No tin costo envolvi ora registra un producto riba cua tin derecho di autor y e proteccion ta valido mundialmente.
Derecho di autor ta duna proteccion na tur loke ta creativo y original. Esaki tambe ta encera cu bo por prohibi otro pa produci, multiplica of explota bo obra. Si bo ta kere cu un tercero ta viola bo derecho e ora ey bo por tuma paso legal contra e violador di bo derecho

Bolbe na Derecho di autor

Publicacion

Publicacion nifica pone un creacion disponibel pa publico.
Segun e ley di autor publicacion di un obra di literatura, ciencia of arte kiermen:

    1. Publica un copia completo of parcial di e creacion;
    2. E publicacion completo of parcial di e creacion, of di un copia of reproduccion di esaki;
    3. Presentacion publico of ehecucion completo of parti di e trabou, of un copia of reproduccion di esey.

Bou di recital, espectaculo, realisacion of presentacion den publico tambe kiermen uno cu ta tuma luga den un circulo cera, unda ta paga pa drenta, aunke si e pago aki ta sosode den forma di un contribucion of na un otro manera. Esaki tambe ta conta pa un exposicion den publico.
Publica tambe kiermen pone un obra riba internet.

Bolbe na Derecho di autor

Reproduccion

E creador di un obra ta e unico persona cu tin derecho pa reproduci of multiplica su obra.
Reproduci of copia kiermen traha ehemplar identico di un obra, por ehemplo di un texto, cuadra of un pieza musical. Reproduci of multiplica tambe ta encera entre otro reproduci, copia, kima (burning) skirbi over of imprimi un obra.
Ademas den e ley di autor bou di reproduci tambe tin para traduci un poema of un otro obra literario of musical, traha un areglo musical, adapta un presentacion y obra di teatro. Por ehempel e traduccion, filma y pone riba escena un obra y en general cualkier adaptacion henter of parcial of imitacion di un obra na un forma adapta, cu no tin cu considera como un obra nobo original.
Reproduci, tambe yama multiplica di un obra cu nos por scucha, kiermen tambe, traha rol, plaachi y otro obheto (cd’s, cassette, etc.) cu ta sirbi pa toca un obra completo of un parti di dje na un forma mecanico.

Bolbe na Derecho di autor

Registracion

Pa registra un obra original, mester haci un peticion prome na BIE cu un copia di bo obra. Por haya e formulario aki na BIE.
Por registra e siguiente obranan di literatura, ciencia of arte na Oficina di Propiedad Intelectual segun e ley di autor di Aruba:

  • Buki, novela, poesia, guia di telefon, carta, acta, foyeto, corant, revista y tur otro obra skirbi;
  • Obra di teatro y obra dramatico-musical;
  • Recital oral, discurso y conferencia;
  • Obra di coreografia y pantomina, di cua su presentacion ta skirbi of ta poni den un otro forma;
  • Obra musical cu of sin palabra;
  • Obra di dibuho, pintamento, construccion y escultura, litografia, obra graba (por ehemplo riba glas) y otro trabou graba riba metal.
  • Mapa di geografia manera mapa teritorial;
  • Diseño, sketch y trabou plastico relaciona cu construccion, geografia, descripcion di luga of otro ciencia;
  • Obra di fotografia y cine (arte cinemategrafico y obra traha den forma similar, manera pelicula, clip di video;
  • Obra artistico laboral (manera joyas artistico, lampi, mueble) y en general cualkier creacion riba e tereno di literatura, ciencia of arte, na cualkier manera of den cualkier forma cu por reproduci.

Tambe programa di computer (software) ta protegi pa e derecho di autor.
Traduccion, adaptacion, areglo musical y otro reproduccion modifica di un obra di literatura, ciencia y arte, como tambe coleccion di diferente obra, no obstante e derecho di autor riba e trabou original, ta protegi como obra independiente.

Sinembargo e siguiente obranan no ta protegi pa derecho di autor, manera ta specifica den articulo 11 di e ley di autor (auteursverordening 2003 no. GT 10):

  • Ley y decreto, emiti door di e poder publico, tampoco riba veredicto di hues y/of otro decision administrativo;
  • Tampoco derecho di autor ta existi riba loke tambe a publica door of pa via di e poder publico, a menos cu door di ley, sea door di decreto of ordenansa, sea cu den un caso specifico segun un anuncio riba e obra mes of door di e publicacion di dje, ta reserva e derecho aki.

Den nos catalog di Producto y Servicio ta haya mas informacion riba e registracion di bo obra.

Bolbe na Derecho di autor 

Restriccion di derecho di autor

E derecho di autor ta restringi door di restriccion den e ley di derecho di autor.
No ta considera como violacion riba derecho di autor:
Segun ley pa algun forma di uzo no mester di un autorisacion apart di e creador.

  • Haci copia te cu un par di ehemplar pa bo propio practica, estudio of uzo: Esaki yama un copia casero. Por ehemplo bo por saca copia di un buki pa bo mesun uzo
  • Cita, esaki kiermen cu por tuma over un parti di e obra di otro den bo obra. Bo por haci cita cortico ora haci comentario riba of critica di un obra. Tene na cuenta si, cu bo tin cu indica e fuente di esaki;
  • Por uza articulo di corant tocante asunto di economia y politica y otro corant, solamente den caso cu bo ta indica e fuente di esaki na un manera cla;
  • Tuma algun parti cortico di un obra cu ta proteha pa derecho di autor, cu ta destina pa enseñansa of otro meta cientifico, pero mester pone un indicacion cla di e fuente.

Bolbe na Derecho di autor

Violacion derecho di autor

E Oficina di Propiedad Intelectual no ta confirma propiedad. Solamente Corte por haci esaki. Tampoco BIE ta actua manera un watchdog p’asina vigila si ta haci violacion di bo derecho. BIE no ta responsabel pa evita violacion di bo derecho. Bo mes mester defende bo obra, door di ta alerto y pa percura cu ningun hende haci uzo ilegal di bo creacion. Den caso di violacion intencional bo por tuma paso legal pa defende bo creacion

Plagio

Tuma of parafrasea (skirbi na otro manera) obra di un otro y public’e manera bo mesun trabou ta un forma di violacion di derecho di autor. P’esey ta recomendabel pa bo percura pa un prueba na momento di creacion di bo obra. E prueba aki ta di un importancia crucial den procedura di plagio, p’asina mustra ken ta e prome autor.

Pirateria

Tambe ta yama violacion riba derecho di autor pirateria, por ehemplo ora simplemente haci copia di un creacion protegi y distribui esaki. Algun forma di pirateria ta:

  • kima (burn) cd’d, dvd’s y cd-roms;
  • intercambia files via Internet pa medio di p2p (peer to peer);
  • haci copia ilegal di pelicula y plama esaki via Internet;
  • download MP3’s y pelicula, download y upload material protegi door di derecho di autor cu fin economico.

E actonan aki di violacion di derecho di autor tin como consecuencia perdida di ganashi pa esnan cu tin derecho di autor y e industria di entretenimento.
Ta sumamente frustrante ora otro persona probecha sin permiso di bo esfuerso, door di sin mas copia bo creacion y pone riba mercado.
Frustrante ta hopi biaha un understatement, pasobra ta hopi tempo y energia tin hinca den creacion di bo obra. Si tin un violacion intencional riba bo obra protegi ya cu na un forma ilegal a cambia e nomber of e indicacion di abo como e autor, e ora ey por pone un beslag of un boet di placa riba esun cu a viola bo derecho. Pero por persigui e delito aki legalmente, solamente si abo como e creador di e obra of esun cu tin e derecho di autor, entrega un keho of haci un denuncia na Polis.

E situacion contrario tambe por. Un otro ta confrontabo y ta afirma cu bo ta viola su derecho di autor. Por ehempel door di inclui un potret den un foyeto, mientras bo no a pidi e fotograf permiso pa haci esaki, of door di publica un articulo similar den un revista. Pa evita disgusto bo tin cu ta cuidadoso y tene cuenta cu derecho di otro.

Bolbe na Derecho di autor

Termino di proteccion

Derecho di autor tin e termino di proteccion di mas largo. E ta dura te cu 50 aña despues di fayecimento di e autor of di e co-autor cu tin mas aña na bida, kiermen esun cu a haya e derecho di autor traspasa na dje of cu el a hereda. E fecha exacto ta 31 di december, despues di e aña den cua e creador a fayece. Despues e obra ta bira dominio publico. Loke kiermen cu e ta liber di derecho di autor y tur hende por haci uzo di dje sin restriccion.

Bolbe na Derecho di autor

Derecho di e autor

Un poesia, cuadra, composicion musical y programa di computer tur ta creacionnan valioso, pero kisas ningun hende por determina nan balor.
Tin cu por gana hopi placa cune ariba mercado y otro totalmente nada.
No obstante su merito of balor comercial, segun e ley di autor Arubano, ta considera tur obra original como material cu derecho di autor.

Door di e derecho di autor e autor ta haya dos sorto di derecho:

    1. Derecho economico (derecho di comercialisacion)
    2. Derecho moral (derecho di personalidad);

Derecho economico
Derecho economico no ta derecho exclusivo pa duna un hende permiso pa haci uzo di bo obra, pero solamento derecho di explotacion. E derecho di autor ta permitibo pa saca probecho di bo prestacion. Como persona cu tin derecho di autor bo tin derecho riba un parti husto di e uzo general di bo trabou. Como compositor bo por duna e compania di disco permiso pa pone bo disco of cd riba mercado a cambio di un compensacion, esta un suma den un solo biaha of un porcentahe di e benta of ganashi.

Derecho moral

Un otro aspecto importante di derecho di autor ta e derecho moral, tambe yama derecho di personalidad, cu semper ta keda cu e autor. Derecho moral ta propiedad inalienabel di e autor, kiermen ta un derecho cu no por kita for di dje. No por traspasa e derecho aki door di por ehemplo licencia of door di bende esaki. Entre e creador y su obra ta existi un laso estrecho y e condicion aki den e ley di autor tin como meta pa proteha e relacion personal entre e autor y su obra. Esaki ta encera cu ningun hende, incluyendo esun cu tin e derecho di autor ta permiti pa desfigura, deforma of cambia bo trabou den cua forma cu ta pa perhudica bo bon nomber y honor. Bo por actua den caso cu no ta menciona bo como autor di un obra of si bo trabou ta aparece bou di nomber di otro persona. Tambe bo por resisti den caso cu ta asocia bo obra cu un producto, servicio, meta of institucion, cu bo ta haya cu ta perhudicial pa bo honor y bon nomber.

Bolbe na Derecho di autor 

Licencia y traspaso 

Si bo desea totalmente of parcialmente, traspasa, duna of licencia bo derecho economico na tercero, esaki ta posibel pa medio di un acta di notario of door di un acuerdo por escrito firma door di ambos partido. Despues di e traspaso e creador di e obra ta perde e control cu excepcion di e derecho di personalidad.

Si bo ta duna e derecho di uzo y of bo ta duna un licencia na otro persona pa un meta determina, e ora ey abo como e autor original, ta mantene e derecho di autor, pero bo ta permiti otro, pa algun obhetivo, haci uzo di bo obra a cambio di placa. Sinembargo pa tin efecto contra tercero e acta of e acuerdo mester ta anuncia publicamente y exhibi den detaye, pero pa e traspaso, licencia of otro forma di permiso y e duracion di esaki, e no ta obligatorio.

Bolbe na Derecho di autor

E simbolo ©

E meta original di e simbolo di derecho di autor (copyright) tabata pa indica cu e autor di un obra di literatura, ciencia of arte tin derecho pa publica of reproduci su trabou, cu otro palabra su obra ta protegi pa e derecho di autor. Manera menciona anteriormente, bo ta haya derecho di autor automaticamente ora bo crea un obra di literatura, ciencia y arte. No ta necesario pa uza un simbolo di copyright. Tambe e simbolo no tin nificacion huridico na Aruba. Pa indica cu bo ta autor di un obra protegi, naturalmente bo por pone un simbolo di copyright riba bo obra, sigui pa bo nomber y e aña. Si ta trata di un obra registra, bo por pone e number di registracion tambe.

Bolbe na Derecho di autor

Ley nobo di autor

Aunke e autor por apela den Corte ora cu nan a viola su derecho, e kier haya formanan nobo legal di proteccion pa por controla e retonan di innovacion tecnologico, principalmente lesnan cu ta desaroya e ekiponan di comunicacion y reproduccion manera television, satelite, mashin di saca copia, cassette, cd’s, video recorder y computer. E desaroyo tecnologico acelera ta preocupa e autornan pa loke ta trata e proteccion di nan derecho, pasobra practicamente den casi tur caso ta uza solamente obra cu tin derecho di autor den e casonan aki. E tecnologia moderno ta haci posibel pa comete pirateria na gran escala.

Pa e motibo aki e Oficina di Propiedad Intelectual tin e proposito pa redacta un ley nobo di autor, por cierto door di revisa y substitui e ley di 1913 p’asina por enfrenta e sistemanan di comunicacion moderno. E obhetivonan di e ley nobo no ta solamente pa duna mas contenido na e derechonan cu ta deriva di e publicacion di obranan, pero tambe pa crea e posibilidad pa proteha un obra no-publica pa medio di registracion.

Bolbe na Derecho di autor

Manual

E manual ta duna solamente algun informacion general tocante e tema complica di derecho di autor y no mester cit’e of consider’e como e autoridad legal. Autoridad por haya solamente den e ley di autor Arubano y den e respectivo veredictonan di Corte. Bo obra original ta hopi importante pa bo. P’esey ta bale la pena pa proteha bo propiedad intelectual door di conoce bo derechonan.

Bolbe na cuminsamento


Patent

General | Derecho exclusivo | Procedura di registracion | Mantene e patent | Derecho di preferencia | Apoderado di patent | Inventonan cu por patenta | Invento cu no por patenta | Patent di seis aa y patent di binti aa | Estado di tecnica - investigacion di novedad | Traspaso y licencia |Violacion

General

Un patent ta un derecho di propiedad duna door di gobierno di Aruba na un inventor pa traha, uza y bende su invento na Aruba pa un tempo defini. E derecho ta refleha den e certificado di patent duna door di Oficina di Propiedad Intelectual di Aruba. E derecho di patent ta un derecho di prohibicion. E ta duna e persona cu tin un patent e derecho pa prohibi otro pa comercialisa su invento. E derecho di patent tin como meta pa stimula inventornan pa haci inventonan nobo.

Door di e proteccion cu e derecho di patent ta brinda, gobierno ta crea suficiente espacio pa fomenta progreso tecnologico y pa stimula iniciativa economico.
E patent cu bo a haya ta dunabo e derecho exclusivo pa un periodo determina comercialisa como inventor bo patent y pa prohibi otro pa uza y bende bo invento patenta na Aruba of den su awa teritorial durante e periodo di proteccion di bo patent.

Te cu prome di april 1995, ora cu e ley actual di patent (publica den e gazeta oficial di Aruba 1997, 29) a drenta na vigor, e derecho di patent di Reino Hulandes tabata regla tur asunto di patent. E ley actual di patent ta aplicabel riba un patent Arubano otorga.
Un patent ta cuminsa naturalmente cu un invento. Bo invento mester ta innovativo di berdad. Si bo tin plan pa pidi un patent pa bo invento, pa di prome bo mester entrega un peticion na duplicado na Oficina di Propiedad Intelectual. Den bo peticion bo mester informa completamente con bo invento ta funciona y con por trahe y aplic’e. A cambio di publica e informacion aki, bo ta haya pa un tempo defini e derecho exclusivo pa traha y uza bo invento.
Un patent ta un invento di caracter tecnico. Por patenta un invento si e ta nobo, basa riba e trabou di inventor y si e ta aplicabel den industria.
Si bo a haci publico bo invento prome cu a pidi un patent sea na television, radio, Internet of cualkier forma di publicacion, esaki ta stroba bo chens pa haya un patent. P’esey bo mester mantene bo invento den secreto absoluto. No bay conta yen di orguyo tocante bo invento, pasobra bo ta pone e oportunidad pa haya un patent seriamente na peligro.

Un invento tambe por ta un mehoracion di un producto existente of un mehoracion di un proceso. Por haya un patent pa por ehempel un producto (mashin, articulo di fabricacion), proceso of cualkier uzo nobo y util/practico di esaki.
Despues di haya un patent no por uza, produci of multiplica un invento sin permiso di e inventor. E registracion ta dunabo en principio bentaha legal cu ta haci posibel control riba violacion di bo derecho. Por ratifica bo derecho di patent dilanti di Hues contra violador cu ta uza e invento patenta sin permiso previo di e inventor of e propietario di e patent.

Bolbe na Patent

Derechonan exclusivo

Segun e ley di patent Arubano, e patent ta duna e propietario di e patent e derecho exclusivo di comercialisa su invento. E derecho exclusivo ta encera cu:

    1. Propietario di e invento patenta, den of pa su negoshi, por traha, uza, pone riba mercado of ademas bende, huur, entrega of na cualkier otro forma negocia, como tambe ofrece na otro, introduci of pa tin den stock;
    2. Aplica e forma di traha patenta den su negoshi of e invento cu a haya door di aplica e forma di traha den of pa uza pa su negoshi, pone riba mercado of ademas bende huur, entrega of na cualkier otro forma negocia. Como tambe ofrece na otro, introducie of pa tin’e den stock.

Procedura di registracion

En general por describi e procedura pa entrega un peticion pa un patent na BIE den e siguiente pasonan:

  1. Un peticion pa un patent ta cuminsa door di entrega un peticion por escrito den duplicado tocante bo invento na e Oficina di Propiedad Intelectual.
    1. Bo mester pone bo nomber y adres ariba e peticion pa patent;
    2. Menciona e nomber y e luga di biba di e inventor, al menos cu e ta duna di conoce por escrito cu e no ta desea pa mencion’e como inventor;
    3. E mester contene un peticion pa haya un patent;
    4. Bo peticion mester inclui un indicacion cortico di loke e invento tin relacion cune;
    5. E peticion mester ta acompaña pa un descripcion di e invento, cu na final den un of mas conclusion ta duna un descripcion di locual bo ta desea derecho exclusivo pe. Den e conclusion bo mester formula e derechonan exclusivo desea y e extension di e proteccion, cu otro palabra ki sorto di proteccion bo ta desea pa bo patent;
    6. E peticion mester ta acompaña pa un resumen cortico di e descripcion cu ta sirbi solamente como informacion tecnico. Aki den bo ta duna di conoce pa cua pregunta tecnico bo invento ta ofrece un solucion.
  2. Bo mester redacta e peticion na Papiamento, Hulandes, Spaño of Ingles. Bo por uza un apoderado di patent pa representabo. Bo peticion, descripcion di e invento, dibuho y resumen cortico mester cumpli cu e otro rekisitonan di BIE.
  3. Ora di haci peticion bo mester entrega e prueba cu bo a paga e suma di inscripcion.

Si e persona cu ta haci e peticion ta biba pafo di Aruba, e ora ey e mester scoge como su domicilio e oficina di un apoderado di patent reconoci pa BIE. Mester entrega un autorisacion firma pa e solicitante, cu ta duna permiso na e apoderado di patent pa actua na su nomber.
Ta considera cu e peticion como no-entrega si no a paga e gastonan di peticion. Bo peticion mester tuma luga via di un formulario. Bo mester yena e formulario completamente. E formulario ta obtenibel na BIE, Oficina di Propiedad Intelectual.

Bolbe na Patent

Mantencion di un patent

Pa mantene un patent na Aruba, bo mester paga anualmente un suma na BIE. Na comienso di e tercer aña despues di a entrega e peticion, bo mester paga e prome pago. E ultimo dia cu bo por paga e pago anual ta e prome dia di e luna cu ta sigui riba esun den cua e peticion cu a conduci na e patent a ser entrega. Pa un patent di seis aña bo tin cu paga gasto di mantencion te cu e di seis aña y pa un patent di binti aña te cu e di binti aña.
Si bo no paga e sumanan di mantencion di bo patent, anto por hala bo patent aden of anul’e irevocablemente.Ta anula un patent segun ley si no a paga e suma di mantencion dentro di seis luna despues cu e fecha di pago a vence.

Den nos Catalog di Producto y Servicio ta haya mas informacion tocante di mantencion di bo patent.

Bolbe na Patent

Derecho di preferencia

Un patent ta funciona solamente na nivel nacional y no ta brinda proteccion pafo di frontera. Un patent Arubano ta valido solamente na Aruba, loke kiermen cu un patent Arubano ta ofrece e propietario solamente proteccion contra produccion, benta of uzo di su invento door di otro(nan) na Aruba y den su awanan teritorial, pero no pafo di Aruba.
E fecha di entregamento ta esencial pa novedad di un patent. Despues di a entrega un peticion pa un patent na Aruba, bo tin un aña mas di tempo pa haci un peticion pa un patent internacional of pa pidi un patent na e paisnan selecta. Esaki yama e aña preferencial. Kiermen despues di e asina yama prome entrega na Aruba, durante di e prome aña bo por pidi un peticion pa un patent pa e mesun invento na otro pais door di apela riba e derecho di prioridad di e prome peticion pa un patent. E ora ey pa un peticion haci den exterior, ta conta e mesun fecha cu e peticion haci na Aruba.

Bolbe na Patent 

Apoderado di patent

Pa haci peticion pa un patent, cu excepcion di invento simpel, ta un procedura complica. Ta di gran importancia cu e peticion ta describi na un forma preciso, cla, completo y detaya, p’asina ta posibel pa un experto regular por traha y aplica e invento. Un peticion pa patent mal skirbi tambe por tin consecuencia serio pa e posibilidad comercial di bo invento. Den caso cu e skirbimento di bo peticion pa un patent ta resulta hopi dificil, bo por pidi ayudo di un apoderado di patent. Pa corta gasto ta recomendabel pa haci hopi preparacion adelanta.
Un apoderado di patent ta un experto, cu a pasa e examen pa apoderado di BIE cu exito. E ta autorisa pa duna servicio riba e tereno di asunto di patent, kiermen pa interveni na nomber di e solicitantenan pa un patent. Nan a haya e autorisacion legal pa na nomber di nan cliente redacta, entrega y regla peticion pa patent.
No ta obligatorio pa haci uzo di un apoderado di patent. Manera cu a menciona anteriormente, solamente persona natural (particular) y persona huridico sin adres of cu no ta establece na Aruba mester haci esaki.

Bolbe na Patent

Inventonan patentabel

Pa ta patentabel ta pone exigencianan pa e invento:

  • E invento mester ta nobo, cu na ningun otro caminda ta registra of cu ya ta existi. E invento no por forma parti di e estado di tecnica. Cu esaki kiermen cu prome cu e dia di entregamento di e peticion, e invento no mag di ta publica ningun otro caminda, tampoco pa un revista cientifico of via un articulo den corant local. Si por ehemplo ta resulta cu e invento ta nobo pa Aruba, pero den otro pais via un foyeto ya a public’e, e ora ey un patent no ta posibel;
  • E invento mester ta inventativo (basa riba trabou di inventor). E no mester ta algo obvio, cu bo ta haci facilmente. Solamente si algo sorprendente tuma luga, por papia di un invento;
  • E invento mester ta aplicabel den industria. Esaki kiermen cu berdaderamente por traha y aplica e invento y e mester por funciona.

Bolbe na Patent

Inventonan cu no ta patentabel

Un invento ta solamente patentabel, si e ta nobo, inventivo y e ta sirbi pa haya un solucion riba e tereno di industria. P’esey e tereno unda ta aplica e derecho di patent ta restringi na tecnica, asina cu un concepto, idea of pensamento no ta bin na remarke pa haya un patent.

E siguiente inventonan no ta patentabel:

    1. Invento manera teoria cientifico y metodo matematico;
    2. Diseño estetico y estilo cu ta duna forma na algo;
    3. Sistema, regla y metodo di haci trabou mental, pa hunga of pa maneha negoshi, igualmente un programa di computer;
    4. Presentacion di informacion, dato y idea abstracto.

Tambe no ta patentabel:

    1. Invento, di cua e publicacion of aplicacion ta contra di orden publico y moral;
    2. Rasa di bestia of mata, como tambe formanan di traha na un manera biologico pa e cultivo di mata y cria di bestia, cu excepcion di forma di traha na un manera microbiologico y e productonan cu ta haya for di esaki.

Bolbe na Patent 

Patent di seis aña y di binti aña

E derecho pa patent ta valido pa seis of binti aña. E escogencia ta depende di e proteccion cu bo ta desea of cu bo ta haya necesario.

Bolbe na Patent 

  • Patent chikito cu ta otorga pa un periodo di seis aña desde e fecha di entregamento di e peticion pa patent. Pa registra un patent di seis aña un investigacion di e novedad (cu e invento ta nobo) haci pa BIE ta necesario. Pa mantene e derecho di patent mester paga anualmente un suma.

De nos Catalog di Producto y Servicio ta haya mas informacion tocante peticion pa un patent di seis aña.

  • Un patent normal tin un duracion di binti aña desde e entregamento di e peticion pa patent y e ta suheto na pagamento di gasto di mantencion. Pa registra un patent di binti aña ta necesario pa e Oficina Europeo pa Patent haci un investigacion internacional tocante e novedad. Despues di binti aña e patent ta caduca y e tecnologia ta accesibel y aplicabel pa tur hende.

Den nos catalog di producto y servicio ta haya mas informacion tocante di peticion pa un patent di binti (20) aña.

Bolbe na Patent

Estado di arte – Investigacion di novedad

Pa controla e novedad, e efecto inventivo di realisacion di bo invento ta obligatorio pa laga BIE haci un investigacion di novedad.
Pa un patent chikito (yama small of petty patent na Ingles) cu un duracion di proteccion di seis aña, mester haci un investigacion di novedad na nivel nacional door di BIE, unda ta revisa tur publicacion cu por tin obhecion contra e novedad p’asina determina si un invento ta patentabel.

Den nos Catalog di Producto y Servicio ta haya mas informacion tocante e peticion pa un estudio di novedad pa un patent chikito.

Den caso di un patent normal cu un periodo di proteccion di binti aña, mester haci un investigacion di novedad na nivel internacional. E Oficina pa Patent di Hulanda ta haci e investigacion aki y e ta sirbi pa determina e novedad y efecto inventivo di realisacion, con ingenioso e invento ta. Pa por haci e investigacion na un manera efectivo, e Oficina di Patent Europeo ta dispone di diferente banco di dato unda por busca publicacion cu por tin obhecion. E investigacion di novedad ta resulta den un rapport (relato di novedad), den cua tin describi kico e estado di arte ta, tambe yama “prior art”. Estado di arte ta tur conocemento cu ta accesibel publicamente den cualkier forma, loke kiermen tur e ultimo desaroyonan di e tecnica, prome cu e dia di entregamento di e peticion. Esaki no solamente ta trata di literatura tecnico y cientifico tocante patent, pero tambe informacion riba Internet of den corant local.

Dependiendo di e duracion di e investigacion internacional di novedad den caso di un patent normal di binti aña entrega na e Oficina Europeo pa Patent, ta otorga e derecho di patent entre dos luna y un aña y mey despues di a entrega e peticion.

Den nos Catalog di Producto y Servicio ta haya mas informacion tocante e peticion pa un estudio internacional di novedad.

Bolbe na Patent

Traspaso y licencia

Como doño di un patent bo por scoge pa bo mes comercialisa e patent of bende na un otro. Pero tambe bo por dicidi pa keda cu e patent pero bo ta duna otro hende permiso pa comercialisa e patent a cambio di un compensacion economico.

Traspaso

Un patent ta un propiedad personal, cu bo por traspasa den su totalidad of un parti di dje na un otro a cambio di placa. Un traspaso por tuma luga solamente pa medio di un acta oficial, di cua bo tin cu entrega un copia certifica na e Oficina di Propiedad Intelectual. Un acta ta un documento firma door di ambos partido, cu ta sirbi como prueba. Ademas bo mester entrega un peticion por escrito na BIE, firma pa ambos partido of p'esun na cua bo ta traspasa e derecho di patent p’asina por inscribie den e registro.
Esun cu ta haya e patent traspasa, ta bira e propietario nobo di e patent y asina e tin e mesun derecho cu e doño anterior tabatin prome cu e traspaso a tuma luga.

Den nos Catalog di Producto y Servicio ta haya mas informacion tocante inscripcion di un acta di traspaso di un patent.

Licencia

Si bo tin un patent bo por bende of dun’e den licencia. Door di cera un licencia, bo ta duna esun cu ta haya e licencia (tercero of un instancia huridico) pa a cambio di un pago, e asina yama royalty’s, pa haci cierto acto cu ta cay bou di e derechonan exclusivo cu bo a haya como propietario di e invento patenta. Un licencia ta nada otro cu un convenio huridico entre e dunado di e licencia y esun cu ta haya e licencia pa un periodo determina, bou di condicionnan stipula y riba tereno defini, comercialisa e patent di e dunado di licencia.
No ta obligatorio pa inscribi e licencia den e registro di patent, pero ta recomendabel si pa haci esaki. Door di inscribi e licencia tur hende ta na haltura di e condicionnan y acuerdo cu mester cumpli cune. Ta den interes di esun cu ta haya e licencia pa inscribi e acuerdo di licencia den e registro.

Den nos Catalog di Producto y Servicio ta haya mas informacion tocante inscripcion di un contract di licencia di un patent.

Sinembargo ta existi un excepcion riba e regla aki. No por comercialisa un invento patenta, no obstante cu e propietario di e patent a duna su autorisacion, den caso cu su comercialisacion ta contra e interes general of di seguridad di gobierno of di e pais. Esaki ta relaciona cu aplicacion di patent di cua ta rekeri cu e contenido mester keda secreto den interes di defensa di Reino Hulandes y su aliadonan.

Bolbe na Patent 

Violacion

E derecho di patent ta duna e propietario di e patent e autoridad pa tuma paso legal p’asina por proteha su patent. Si nan viola bo derecho di patent, e ora ey por papia di violacion. Bo por ratifica bo derecho na Corte di Aruba contra tercero cu a viola bo derecho. Si bo kier acusa un hende di violacion, e ora ey bo mester avisa e violador. Despues via un notificacion di un deurwaarder por mustra e violado riba su responsabilidad. Ta e responsabilidad di e propietario di e patent pa señala y denuncia violacion.
No tin polis pa patent, cu lo combati violacion di bo patent.

Bolbe na cuminsamento

Derecho di Marca Comercial

General | Registracion | Rekisito pa inscripcion | Clasificacion | Cambio di dato di registracion | Nenga registracion | Licencia y traspaso | Violacion | Simbolo ® y ™| Renobacion registracion | Derecho di prioridad

General

Un marca ta un simbolo cu un compania ta uza pa indica producto y servicio riba mercado, cu otro palabra cu ta uza den profesion of den negoshi. E idea ta cu publico por identifica e producto y servicionan aki y distingui nan for di e producto y servicio di otro compania.
Un marca por ta tur simbolo cu por proyecta graficamente y cu cua un negoshi por distingui su producto y servicio for di otro negoshi. Tin dos sorto di marca: marca di producto y marca di servicio. Un marca di producto of marca comercial ta distingui e fuente di producto y e marca di servicio ta distingui e fuente di servicio.
Si bo registra bo marca di distincion, bo ta miho protegi contra uzo y maluzo door di otro. Bo por registra como marca: palabra, logo, slogan, lema, nomber, number, simbolo, emblema, forma, diseño, forma di producto of empake, combinacion di color y elemento figurativo, tanten cu e por distingui e producto y servicio.
Elemento figurativo ta entre otro diseño, potret, dibuho di paisahe, bestia, hende, cos, decoracion, forma, cas, strea, ser ficticio, figura geometrico y curpa, sea un representacion real of abstracto.

Na november 1987 e Oficina di Propiedad Intelectual a cuminsa cu registracion di producto y servicio. Antes tur registracion pa proteccion di marca a tuma luga na Corsou pa medio di e Oficina di Propiedad Intelectual na Corsou.
Segun e derecho di marca Arubano, e derecho exclusivo riba marca ta origina door di e prome uzo di e marca na Aruba. E derecho pa uzo exclusivo ta cubri unicamente e producto y servicio pa cua ta uza e marca y no mas largo cu tres aña despues di e ultimo uzo.

Un marca ta valido pa dies aña, pero despues di e periodo, riba peticion por prolonga e periodo aki eternamente cada biaha pa un periodo di 10 aña, kiermen cu bo derecho di marca por existi por ehempel pa mas cu un siglo.
Pa mantene bo derecho di patent ta importante tambe pa bo uza bo marca.
Un marca di producto y servicio inscribi na Aruba ta ofrece e propietario di e marca e proteccion exclusivo contra uzo ilegal door di otronan di su marca na Aruba y su awa teritorial, pero no pafo di Aruba.
Despues di a entrega un peticion pa un marca na Aruba, bo por busca proteccion den otro pais door di entrega e peticion pa marca den e pais selecta.

E derecho di marca ta proteha e propietario di e marca contra uzo di un marca cu ta coresponde cu su marca y cu ta uz’e pa un producto similar, tambe yama acusacion confuso of peligro di confusion. Cu otro palabra e marcanan ta parce otro asina hopi cu ta existi e peligro cu e publico por confundi nan. Ademas e derecho di marca ta proteha contra uzo di un marca similar pa otro sorto di producto. Tambe e derecho di marca ta proteha contra pirateria, na unda ta copia bo marca of forma di un producto sin bo permiso.

Bolbe na Derecho di marca

Registracion di un marca

No obstante e hecho cu bo ta haya proteccion ora bo uza bo marca pa di prome biaha, tog ta recomendabel pa registra bo marca. En general ta necesario pa un proteccion efectivo cu un marca ta oficialmente registra. Si un marca ta registra, ningun otro hende cu no ta e propietario di e marca por uza e marca. Tin biaha ta sumamente dificil pa prueba ki tempo e uzo di un marca a tuma luga pa di prome biaha. No tin fuente disponibel pa investiga e novedad di e marca ora ta trata solamente di e uzo. P’esey e prome uzo di un marca no semper ta suficiente garantia p’esun cu a haci balente esfuerso y inversion considerabel pa pone e producto of e servicio riba mercado, anto pa descubri despues cu un marca identico of similar ya ta den uzo.
E registracion ta dunabo derechonan exclusivo pa e uzo di derecho den e clasenan registra. Bo ta haya derecho exclusivo riba un marca door di uza e marca pa di prome biaha y ta considera registracion como prome uzo.
Pa e motibo aki BIE a traha un concepto nobo pa e ley di marca comercial, den cua ta duna derecho exclusivo solamente door di registracion (first to file). Contrario na otro legislacion (por ehempel e ley di marca di Benelux y e ley di marca Hulandes) BIE por segun e ley di marca Arubano, haci obhecion of nenga registracion, banda di e posibilidad pa tercero trece obhecion den Corte.
Ta evalua si den e ley di marca nobo por regla tambe registracion internacional (e asina yama registracion via e sistema di Madrid): prome registracion ta prome uzo, registra marca colectivo y stipula condicion pa usuario.
P’esey solamente door di registra bo obra bo ta bira doño di e derecho di marca exclusivo. Segun e ley di marca nobo, door di uza e marca pa di prome biaha, bo no ta haya derecho di marca. E principio, “esun cu yega prome ta bebe awa limpi” lo conta.

Bolbe na Derecho di marca

Rekisito pa inscribi un marca

Cualkier persona natural of persona huridico (Fundacion, NV of BV) por entrega un peticion pa inscribi un marca. Pa registra un marca na BIE, bo mester entrega un peticion triplifica. Pa marca di palabra, por ehempel un nomber, palabra of lema, bo mester yen’e solamente cu tipo di letter standard. Si bo kier registra un potret (ilustracion) of un marca figurativo, bo mester tuma (graba) un imagen cla di e marca.
Un marca figurativo por ta un marca figurativo puro, pues un imagen sin letra y/of cifra, pero tambe e por ta un combinacion di un imagen cu letra y/of cifra, of un palabra skirbi den cierto forma di skirbi. Por yena e peticion riba formulario cu bo por haya na BIE of por download via e website.

Ta considera un peticion como no-entrega, tanten cu e suma di entrega no ta paga. Restitucion di e suma di entrega no ta posibel den ningun forma. Despues di a entrega bo peticion, BIE lo haci un investigacion pa check si tin inscripcion anterior. Ta check si no tin marca identico of similar cu ta registra caba.

Si e investigacion ta mustra cu no tin obhecion pa registra bo marca, e ora ey lo ponebo por escrito na altura cu e peticion pa paga e suma di registracion, como tambe e suma pa cada categoria den cua por registra e marca. Bo tin cu paga e suma total indica dentro di un luna despues di a ricibi e notificacion pa evita cu ta declara bo peticion invalido.

Despues di ricibi e total di e suma di registracion, BIE lo registra e marca dentro di dos siman den e registro publico y lo mandabo un prueba di inscripcion y lo publica e marca den e revista oficial di marca. E registro di marca ta disponibel gratis pa tur hende por tira bista den dje na e oficina di BIE. Sinembargo si bo kier haci un investigacion di anterioridad, BIE por haci esaki pabo. Pero bo tin cu paga un suma di investigacion na BIE pa esaki.

Dentro di seis luna despues di e registracion di bo marca ta posibel pa e propietario di derecho mas bieu haci obhecion contra di un inscripcion cu ta viola su marca. E areglo di e disputa aki ta sosode dilanti di Hues.

Esaki ta nifica cu segun nos leynan ta solamente posibel pa haci obhecion contra inscripcion di un marca despues di su registracion. Esaki ta un diferencia grandi compara cu otro legislacion manera esun di Merca y Gran Britania, unda por cuminsa un procedura di oposicion unicamente prome cu e inscripcion di un marca. Den e paisnan aki ta publica e marcanan entrega pa registracion prome cu e registracion.

BIE tambe por opone contra di inscripcion di bo marca. Ta informa bo por escrito dentro di un luna despues di a ricibi bo peticion. Si kita e obhecion, e ora ey ta registra bo marca despues cu bo paga e suma corespondiente. Si acaso bo no percura pa kita e obhecion dentro di un luna, e ora ey ta nenga bo peticion. Semper bo por entrega un peticion nobo.

Si BIE a nenga di inscribi bo marca, bo por pidi Corte den Prome Instancia pa exigi pa inscribi bo marca. Bo mester entrega e peticion dentro di dos luna despues di e notificacion. Un apoderado di marca por haci e peticion na bo nomber.

Pa un peticion di exterior pa registracion di un marca door di un particular of un persona (Fundacion, N.V of B.V), mester cumpli cu e siguiente rekisitonan:

  • E persona cu ta haci e peticion mester scoge domicilio na un apoderado di marca reconoci pa BIE;
  • Mester presenta un poder por escrito di esun cu ta desea e registracion di e marca na su nomber na mesun momento ora cu e entregamento di e peticion tuma luga;
  • Un declaracion di acuerdo cu berdad, firma p’esun cu ta haci e peticion of di e apoderado cu ta trata di un persona huridico (organo cu tin personalidad huridico) y bou di ley di cua pais e ta establece; por incorpora e declaracion aki tambe den un “volmacht”, con tal cu esaki ta resalta bon cla.
  • Lo manda tur documento di BIE pa e apoderado di marca y no p’esun cu a haci e peticion:

Resumiendo por bisa cu e procedura pa registra un marca na BIE ta tuma luga di siguiente manera:

  1. Bo ta entrega un peticion den tres/triplifica na BIE;
  2. Ta averigua si bo marca tin suficiente capacidad di distincion;
  3. Prome cu deposita bo marca, ta clasifica e marca segun e clasificacion internacional di clase di Nice;
  4. Ta haci un investigacion pa check si bo marca ta identico na un cu ya ta registra den e clase den cua bo marca ta clasifica, cu otro palabra BIE ta controla ora di inscribi si bo marca ta den conflicto cu marca cu ta inscribi caba, kiermen cu no ta existi marca cu tin obhecion. Banda di esey ta localisa nomber similar;
  5. Despues di analisa, clasifica, haci investigacion preliminar y si BIE no tin obhecion, lo notifica bo dentro di dos siman cu bo por inscribi bo marca;
  6. Despues di paga e suma corespondiente y cumpli cu tur e rekisitonan ta registra bo marca dentro di dos siman;
  7. Inscripcion ta tuma luga den registro di marca cu un nota di e dia cu a ricibi y di e firma y e number di inscripcion;
  8. Despues di e registracion ta haya un prueba di inscripcion;
  9. Ta publica y anuncia bo marca den e siguiente edicion di e revista di marca oficial di Aruba (MarcAruba). E revista aki ta sali publica dia 16 di cada luna y ta obtenibel na BIE.

Den nos Catalog di Producto y Servicio bo ta haya mas informacion tocante di:

Bolbe na Derecho di marca

Apoderado di marca

Si bo kier deposita un marca na BIE pa e mercado Arubano, bo por pidi un apoderado di marca pa haci esaki pa bo. Segun e ley di marca Arubano, ademas di abogado cu na Aruba tin nan practica, solamente ta admiti persona natural residencia na Aruba cu tin como profesion intermedia den asunto di marca. Esaki ta encera, entre otro, registra marca na BIE y actua na nomber di e propietario di marca cu ta establece afo di Aruba.

Un apoderado di marca ta un consehero profesional cu a pasa e examen di abogado di marca di BIE cu exito y cu ta percura pa tur asunto relaciona cu inscripcion di bo marca. No ta obligatorio pa uza e servicio di un apoderado di marca; solamente un persona natural y persona huridico cu no ta residencia na Aruba mester hacie.

Bolbe na Derecho di marca

Clasificacion di producto y servicio

E clasificacion internacional di Nice di producto y servicio ta un convenio cu oficialmente a drenta na vigor na 1957 na Nice y a revis’e na Stockholm na 1967 y na Ginebra na 1977. E paisnan cu a drenta den e convenio aki ta obliga di aplica e clasificacion di Nice, sea como clasificacion principal of sistema di ayudo. Ta aplica e clasificacion di Nice tambe den algun pais, cu no a firma e convenio di Nice. Aruba ta, via Hulanda, miembro di e clasificacion di Nice.
E miembronan ta uza un clasificacion general pa registracion di marca.

Den e division di clase, tur producto y servicio ta clasifica den 45 categoria, di cua 34 categoria ta pa producto y 11 categoria ta pa servicio, cu bou di nan mes ta diferencia a base di e productonan y servicionan. A base di bo producto y servicio un division ta tuma luga, por ehempel un marca di un guitara ta clasifica den clase 15 (instrumento musical)

Ta importante pa uza e clase corecto pa e proteccion corecto. E proteccion di bo marca ta cubri e producto y servicio cu a clasifica den e clase scogi. Den e resumen aki (Classificatie van waren en diensten.pdf) bo ta haya e 45 categoria unda por clasifica un marca.

Cambio di dato di registracion

Ta di sumo importancia cu e datonan di bo marca ta actualisa corectamente y completamente. Si bo kier cambia bo datonan di registracion, bo por haci un peticion na BIE pa esaki.

  • Cambio di nomber di e propietario di e marca – Si bo cambia bo nomber, bo por entrega un peticion por escrito pa esaki. Ta nota e cambio di nomber na banda di e peticion;
  • Cambio di adres di e propietario di e marca – Pa e cambio di bo adres bo mester entrega un peticion por escrito. Ta pone e cambio di adres na banda di e inscripcion.
  • Anulacion di clase di marca- Bo por pidi BIE pa anula e clase den cua bo marca ta clasifica den bo inscripcion;
  • Coreccion den e datonan di un marca- por ehempel den caso di fout di imprenta, posicion incorecto di e composicion di elementonan figurativo.

Den nos Catalog di Producto y Servicio bo ta haya mas informacion tocante cambio di dato di registracion.

Bolbe na Derecho di marca

Nenga deposito di un marca

Ta duna producto y servicio un marca pa por distingui nan di producto y servicio identico den caso di competencia y p’asina e consumidor por reconoce e marca.
Reconocimento y distincion ta dos caracteristica fundamental di un marca. Pa inscribi un marca di producto of servicio e mester por tin principalmente un capacidad pa distincion. Si e consumidor por reconoce cierto producto of servicio a base di su marca cu e ta bini di un negoshi en particular, e ora ey e simbolo tin capacidad pa distingui y por consider’e den principio como un marca. Un ehempel ta e forma di e boter di coca cola. Mas fuerte e capacidad pa distingui ta, mas grandi e proteccion ta.

Por nenga inscripcion di un marca pa entre otro e siguiente motibonan:

  • E marca ta duna solamente un descripcion confuso di e producto of servicio (e marca ta unicamente descriptivo), manera pone e nomber lechi pa lechi of cerbes pa producto di cerbes, pero tampoco un imagen di un auto pa un negoshi di auto;
  • E marca ta consisti di un simbolo cu ta sirbi unicamente pa indica e sorto, e funcion, e balor of e cantidad di e producto y servicio;
  • E marca falta capacidad pa distingui su mes; e marca ta consisti di simbolo visibel demasiado simpel cu no ta duna e marca un identidad propio of un rasgo caracteristico, por ehempel door di solamente kier uza como marca un strea, un circulo, un vierkant, un solo letter of number;
  • E marca (palabra of ilustracion) ta contra di e orden publico of moralidad. Cu marca inmoral kiermen un potret vulgar. Contra di orden publico si e ta ofensivo of ta y blasfemia pa sentimentonan religioso, mantencion di orden y pa siguridad di un pais;
  • E marca ta engañoso. Un marca ta engañoso ora cu e uzo di e marca ta gaña e publico. No ta posibel pa uza “CERBES” como marca pa refresco, “WHISKY” pa cidra di appel of uza un potret di un baca pa margarina, ya cu en efecto ta relaciona un baca cu manteca of e simbolo di sucu pa sucu artificial of substituto di sucu;
  • E marca ta un bandera, escudo of otro emblema di e estadonan cu ta miembro di e tratado di Union di Paris, mira for di un punto di bista heraldico of un escudo di Reino Hulandes of di un instancia publico estableci eyden.
  • Si despues di tempo ta uza e marca manera un sorto di nomber, por ehempel ta uza e marca como nomber general di un producto (FAX of facsímile, JEEP pa un sorto di vehiculo);

Tampoco por haya proteccion di marca si e marca:

  • den su totalidad of en principio ta similar cu un marca cu ya ta registra pa e mesun sorto di producto y servicio of di cua otro ya a pidi anteriormente inscripcion pa mesun sorto di producto;
  • ta contene peligro di confusion. Esaki kiermen cu e marca t’asina similar na un marca cu ya ta inscribi, of cu na Aruba ta conoci como marca of nomber di negoshi di otro, cu cerca e publico por surgi confusion riba procedencia di e producto y servicio.

Aunke e indicacion di origen no ta specificamente hinca den nos legislacion, BIE por haci obhecion si e ta di opinion cu e marca ta engañoso: e ta pertenece na un sorto di biña of alcohol y e ta indica un origen geografico, mientras cu e producto no ta bin for di e region aki. Por ehempel door di pone e nomber BORDEAUX riba un botri’ biña, mientras cu e producto ta produci den un otro region of door di pone CEYLON riba producto di te cu no ta originalmente di e luga ey. BIE por nenga deposito di un marca si ya tin un marca identico of similar registra.

Tambe y no obstante e hecho cu e indicacion ta corecto, no ta posibel pa registra un simbolo cu ta indica e fuente organico principal di un producto, door di un monopolio inhusto di e terminologia. Por ehempel door di uza e palabra aloe pa producto traha cu aloe, maishi pa hariña geel, glas pa glas y boter. Tin marca cu door di uzo largo a bolbe bira marca fuerte y e ora ey si ta apto pa registracion.


Bolbe na Derecho di marca

Licencia y traspaso

Acuerdo di licencia

Bo por uza un marca bo mes, pero como doño di un marca bo por dicidi di duna un tercero permiso pa uza e marca a cambio di un compensacion. E ora ey bo ta duna e marca den licencia. Ta considera e uzo di e marca pa esun cu ta haya e licencia como uzo pa esun cu tin e derecho riba e marca. Por otorga un licencia pa tur of algun parti di e producto y servicio pa cua e marca ta registra. Bo por duna un licencia exclusivo cu ta haci cu solamente e tercero por uza e marca. Diferente na un traspaso, e dunado di licencia ta mantene su derecho riba e marca. No ta existi un obligacion pa haci un acuerdo di licencia por escrito, pero ta recomendabel si pa haci’e.
Tambe ta recomendabel pa inscribi e acuerdo di licencia na e Oficina di Propiedad Intelectual. E licencia ta solamente valido enfrente di otronan, si e ta inscribi den e registro. Cu otro palabra, esun cu haya e licencia di e marca, por impone su derecho dilanti di un tercero despues cu e acuerdo di licencia ta inscribi den e registro di marca. Esun cu haya e licencia y a inscribi e licencia aki na BIE ta protegi contra di un revocacion ilegal pa e dunado di licencia prome cu e fecha berdadero caduca. Ademas e inscripcion ta esencial si esun cu haya e licencia haya e autoridad pa actua na un forma independiente contra violacion di e marca.

Den nos Catalog di Producto y Servicio bo ta haya mas informacion tocante di duna licencia di un marca.

Traspaso di marca

Banda di e posibilidad pa duna un licencia, bo por traspasa bo marca pa un otro. Un traspaso asina mester tuma luga pa medio di un acta oficial. Mester entrega na BIE un copia certifica di esaki cu un peticion pa inscripcion, firma door di ambos partido of na esun na ken bo ta duna e derecho. Si bo no haci esaki, e ora ey abo ta keda, como e propietario original di e marca, e unico cu por actua contra e violadonan riba e derecho di marca cu bo a traspasa.

Den nos Catalog di Producto y Servicio bo ta haya mas informacion tocante di traspaso di un marca.

Bolbe na Derecho di marca

Violacion di marca

Un propietario di marca mester percura pa proteccion di su marca.
Como propietario di marca naturalmente bo por opone contra violacion di bo derecho di marca door di otro, ora cu door di esaki ta surgi peligro di confusion cerca e publico. Kiermen cu via e derecho di marca bo por prohibi otro di uza y registra un marca similar. En corto, como doño di e marca, bo por actua contra un hende cu ta uza bo marca pa producto y servicio similar, pero tambe contra un hende cu pa un producto similar ta uza un simbolo cu ta parce bo marca. E marcanan mester parce otro asina tanto cu ta existi e peligro cu e publico por confundi e marcanan.
Pa combati un violacion di bo derecho di marca mester por papia di un similaridad di producto y servicio y cu ademas cerca e publico por surgi confusion tocante e procedencia di e productonan y servicionan.
Como propietario di e marca bo por apela na bo derecho door di cita e violado dilanti di Corte den Prome Instancia segun e ley di marca Arubano.
E otro banda di e medaya ta cu un tercero por culpa abo tambe di violacion di su derecho di marca. Prome cu bo haci inversion considerabel pa desaroya bo simbolo ta recomendabel pa bo registra bo marca. Asina bo ta evita desilusion y disgusto ora cu ta resulta cu ya ta existi un derecho prome pa e marca similar.

Bolbe na Derecho di marca

Simbolo ® y ™

E simbolo ® y™ ta para pa “registered trademark” y ta nifica cu bo marca ta registra na e Oficina di Propiedad Intelectual. Door di pone e simbolo aki bo ta avisa otro cu abo tin derecho exclusivo riba e marca.

E simbolo ™ ta para pa “Trade Mark” y ta nifica cu ta uza un nomber of logo di e producto y servicio di un persona of un negoshi como marca. Door di uza e simbolo bo ta indica cu bo a entrega un peticion pa marca, pero cu ainda bo no a haya registracion di bo marca.
Ni e simbolo ® ni™ tin un nificacion oficial of legal na Aruba. Ta existi cu otro palabra ningun obligacion pa uza e simbolonan aki ora bo a pidi un registracion di marca of si bo a haya esaki. Sin embargo si no tin un registracion real, por considera e uzo di e simbolonan aki como informacion engañoso y competencia inhusto.

Renobacion di inscripcion di derecho di marca.

Un marca ta valido pa dies aña y ta conta desde e fecha di deposito y por prolong’e eternamente cu un periodo di dies aña cada biaha. Despues cu dies aña a pasa, bo por renoba e inscripcion di bo marca dentro di tres luna despues di e fecha di vencemento. Si BIE no tin obhecion, e inscripcion ta tuma luga dentro di un luna despues di a ricibi e peticion.

Den nos Catalog di Producto y Servicio bo ta haya mas informacion tocante di renobacion di derecho di marca.

Bolbe na Derecho di marca

Derecho di preferencia /prioridad

Mescos cu ta e caso cu derecho di patent, e derecho di marca tambe conoce derecho di prioridad. E fecha di entregamento ta importante ya cu e fecha di deposito en principio ta determina ken tin e derecho di marca. Si bo entrega un peticion pa inscripcion di un marca dentro di seis luna despues di e dia riba cua bo a deposit’e na un otro pais pa di prome biaha, bo tin e derecho pa apela na e derecho di preferencia of derecho di prioridad. Esaki kiermen cu ta considera e fecha di deposito na Aruba tambe como e fecha di prome entrega.

Proteccion di marca den exterior ta impedi otro pa saca probecho di bo marca den otro pais. Si bo tin pensa di exporta bo producto, ta recomendabel pa registra bo marca den e paisnan unda ta uza bo marca. Manera ya menciona, hopi pais ta acepta e apelacion riba e derecho di preferencia di un peticion Arubano pa inscripcion di un marca, si bo haci e peticion dentro di seis luna despues di e fecha original di entregamento na Aruba.

Bolbe na cuminsamento