Turismo

No por trata derecho y hurisdiccion sin cu e imahen di Señora Husticia ta bin den mente. E imahen di Señora Husticia ta di un figura cu su wowonan tapa, den su man robes e ta tene un balansa y den su man drechi e tin un spada.
 

E wowonan tapa ta nifica cu husticia no ta haci distincion. Husticia no ta scucha of condena persona, sino solamente hechonan y actonan. E ta simbolisa un sentencia obhetivo y imparcial; E balansa den su man robes ta nifica cu ta pisa pruebanan y testimonionan, cu ta beneficia y/of ta perhudica partidonan of sospechosonan. E ta simbolisa pisamento di interesnan; E spada ta representa e poder di husticia. E ta simbolisa sentencia cu hues ta dicta.

Derecho bo ta saca for di e totalidad di regla y acuerdo cu ta conta den un comunidad. Reglanan skirbi y no skirbi. Hopi derecho skirbi bo ta haya den ley y den sentencia di hues. Nos comportacion y actonan tambe ta wordo determina pa reglanan no skirbi: nos custumbernan. Ademas ta tene cuenta cu acuerdonan cu tin entre partidonan.

Hurisdiccion ta trata diferente tipo di caso. Diferencia di opinion entre cuidadanonan y/of companianan, echonan castigabel cu a tuma lugar y tambe personanan y/of organisacionan cu no ta di acuerdo cu decision cu gobierno a tuma. Ademas asuntonan cu tin haber cu relacion familiar por bin dilanti. Hues ta actua como un straño independiente den e casonan aki. E ta duna un sentencia cu ta obligatorio y na cual ambos partido mester tene nan mes na ne.