Traha y haci negoshi
Aruba ta pa excelencia un paraiso pa hopi turista. Esaki door di su ubicacion unico den mar Caribe y rond di mundo su famoso beachnan blanco. Pesey tambe e sector turistico no ta brinda solamente hopi oportunidad di empleo na trahadornan local pero igualmente e ta manera un magnet pa hopi trahado stranhero cu hopi gana pa bin purba nan suerte aki na Aruba. Un maneho di admision di trahado stranhero balansa y nos mercado di labor ta di gran importancia pa realisa un demanda (doño di trabou) y oferta (trahado) cu ta bon sincronisa cu otro. E Ley di labor ta percura pa esey.
| |
Indirectamente e sector turistico ta percura pa oportunidad di empleo den otro sector ariba e isla. Asina por ehempel sector di construcion, transporte y comercial por menor ta benificia di cantidad di turista cu ta keda diariamente ariba e isla. Pero tin mas. Corda so riba tur e 22.000 alumno cu ta gosa di enseñansa diariamente na Aruba y pa cual tin un aparato di maestro y docente cla. Of riba e refineria di petroleo riba e isla, cu ta ofrece su trahadonan amplio conocimiento y practica.
