Turismo
Link naar website van www.aruba.com
Kiezerslijst 2013
Arubahuis

Pa asunto di Censo

Historia | Extracto | Nacemento | Matrimonio | Divorcio | Reconocemento | Adopcion | Fayecimento | Cambio di adres | Paspoort | Cedula

Historia

Na Hulanda, te cu e periodo Frances prome cu aña 1795, nan no tabata conoce un registracion central di e grandura y formacion di e poblacion di e pais. Na aña 1796, e colonisado Frances a introduci den algun parti di Hulanda un registro civil y na aña 1811 e registro a bira valido pa henter e pais. Esaki kiermen cu a cuminsa traha acta di nacemento, casamento y fayecimento.

Stadhuis di  Aruba

Como cu Aruba ta forma parti di Reino Hulandes, a introduci registro civil tambe na Aruba.
Registro Civil ta consisti di un cantidad di registro, den cual ta para e estado civil di un persona cu ta biba na Aruba of cu a yega di biba na Aruba. Ora cu un persona nace, casa, divorcia of muri, ta haci cambio den e registro civil. E registro civil ta tambe un fuente importante di informacion pa hendenan cu ta haci investigacion di origen di nan famia.
Registro civil ta un sistema di administracion di poblacion pa medio di cual por haya bista den grandura y formacion di e poblacion di Aruba. Continuamente ta mantene e registro civil cu entre otro adres, fam, nomber, sexo y estado civil di e personanan cu ta biba na Aruba.

Na Aruba Dienst Burgerlijke Stand en Bevolkingsregiser(Oficina di Registro Civil y Censo) ta encarga cu registracion y mantencion di tur informacion cu tin di haber cu estado civil di personanan cu ta biba aki. Desde añanan setenta e administracion di Oficina di Registro Civil y Censo ta automatisa.

Bo mester ta na Oficina di Registro Civil y Censo pa asuntonan di censo. E oficina ta bon conoci den pueblo como Censo. Bo mester acudi personalmente na Censo pa por regla tur asunto di censo pa bo mes of bo famia. Tur acta traha y otorga door di Censo tin mesun balor cu e acta original.

Bolbe na cuminsamento

Extracto/copia for di registro civil

Un di e servicionan mas pidi na Censo ta dunamento di extracto (uittreksel) for di registro civil.
E extracto mas pidi ta e extracto for di e registro di nacemento di e registro civil, cu tin e nomber di extracto for di e acta di nacemento. Ta uza e extracto pa diferente meta, entre otro pa:

  • Examen pa rijbewijs;
  • inscripcion na diferente scol y otro instituto educativo;
  • peticion pa conexion cerca diferente compania di utilidad (W.E.B., Setar en Elmar);
  • prolongacion di permiso di estadia of trabou;
  • declaracion di bon conducta;
  • declaracion y pago na Aduana pa mudansa di mueble.

Fuera di extracto for di  registro di censo tin tambe extracto for di registro di matrimonio, registro di fayecimento, etc. Esakinan tambe ta necesario pa diferente meta y bo por haya nan como producto na Censo.

Na Censo tin un loket apart (number tres) pa entrega di extracto for di e registronan, no mester tuma number pa esaki. Den nos Catalogo di Producto y Servicio bo por haya mas informacion tocante peticion di extracto for di e registronan.

Bolbe na cuminsamento

Nacemento

Mester laga registra tur mucha cu nace na Aruba den registro civil door di un empleado publico na Censo. E registracion mester tuma luga dentro di cinco dia (e dia di nacemento y diasabra, diadomingo y dianan oficial di fiesta no ta conta den e cinco dianan menciona). Ta pone Ministerio Publico na altura di tur registracion haci despues di e termino di cinco dia.

E tata tin e obligacion di declara nacemento di su yiu na Censo. Si acaso e tata ta malo of ta hay’e stroba pa bay Censo, e mama of un otro persona, cu tabata presente ora di nacemento di e yiu, ta autorisa pa laga registra e mucha.

E empleado publico ta traha un acta di nacemento for di e declaracion ariba menciona.

Ora di laga registra un nacemento mester entrega e siguiente documentonan:

  • Cedula of un otro identificacion valido di esun cu ta registra e mucha of esun cu ta reconoc'e como yiu. Den caso di matrimonio tambe mester trece e buki di matrimonio;
  • e documento cu un representante di sala di parto di Hospital Horacio Oduber cu ta autorisa of e partera ta duna como prueba di nacemento di e yiu.

For di januari 2001 por registra nacemento di un yiu na hospital mes. E orario pa haci esaki ta di nueb'or  te dies or.

Den nos Catalogo di Producto y Servicio por haya mas informacion tocante e peticion pa extracto di nacemento for di registro civil.

Bolbe na cuminsamento

Matrimonio

Matrimonio di personanan cu ta inscribi  | Matrimonio di personanan cu no ta inscribi

Matrimonio di personanan cu ta inscribi

Tur persona cu kier casa, mester notifica un ambtenaar na Censo; e asina yama dunamento di man. Despues di diescuatro dia cu a duna man (a registra na Censo e intencion di matrimonio) e casamento por tuma luga.

Despues di dies dia cu a anuncia e matrimonio, e pareha por casa si no tin hende cu ta contra e matrimonio.

Pa un persona por casa e mester cumpli cu e siguiente rekisitonan:

  • E hende homber y e hende muher, tur dos mester tin por lo menos diesocho aña di edad;
  • personanan bou di diesocho aña di edad (menor di edad) no por casa sin consentimento di nan mayornan;
  • si un persona tin voogd (te diesocho aña), tambe e mester haya consentimento di su voogd y di su di dos voogd;
  • pa e ceremonia di casamento mester tin por lo menos dos y maximo cuatro testigo cu mester ta mayor di edad.

Solamente por duna man riba dialuna te diahuebs di 1 or y 15 di merdia te 3 or y 15 di atardi. Por haci cita pa duna man na balie di informacion di Censo.  
Ora di duna man e pareha en principio mester ta personalmente presente y nan mester trece e siguiente documentonan:

  • Un documento di identificacion cu ta valido, esta un paspoort, cedula of rijbewijs valido;
  • extracto di Registro Civil (Papel di 5 florin);
  • acta di nacemento original di tur dos persona (pa esnan naci na Aruba Awg. 15,-); Pa esnan naci na un otro pais p.e. Venezuela, Surnam, Colombia, etc., e acta original mester tin un apostilla di Ministerio di Relacionen Exterior di dicho pais. Pa esnan naci na Republica Dominicana, e acta original mester tin tambe un seyo di verificacion di Embahada Hulandes na dicho pais. Haiti no mester apostilla pero si un seyo di verificacion di Embahada Hulandes na e pais menciona;
  • si ta pasa via DIMAS mester trece tur documentonan original;
  • declaracion di estado civil (soltera/o) di e ultimo luga unda bo a biba, prome cu bo a establece bo mes na Aruba;
  • acta di consentimento (si ta necesario). Den caso cu un of tur dos persona ta menor di edad, mester laga traha un asina yama acta di consentimento. Un ambtenaar di Censo of un notario por traha e acta aki;
  • tambe por duna consentimento di e matrimonio ora di traha e acta di matrimonio;
  • acta di fayecemento (si ta e caso). E acta di fayecimento di e persona cu lo mester a duna persmiso pa e matrimonio tuma lugar, si e tabata na bida; E acta di exterior mester tin un apostilla of/y seyo di Embahada Hulandes)
  • comprobante cu no tin ningun impedimento contra e matrimonio (no ta obligatorio);
  • comprobante cu e matrimonio anterior no ta forma un impedimento pa e matrimonio aki tuma lugar, si ta trata un di dos of mas matrimonio; Si bo tawata casa mester trece acta di divorcio of e acta di difuncion di e casa (e acta di exterior mester tin un apostilla of/y seyo di Embahada Hulandes)
  • prueba di dispensacion di impedimento di e matrimonio (no ta obligatorio);
  • prueba di dispensacion of permiso di e ministro, encarga cu husticia, den caso cu esaki ta rekeri;
  • prueba di disposicion of dispensacion di proposicion di matrimonio (no ta obligatorio). Esaki ta solamente necesario den caso cu tin un disposicion huridico contra un negacion pa traha e acta di dunamento di man of tin dispensacion di wardamento di diescuatro dia pa un dunamento di man;
  • un declaracion medico di embaraso (manera indica den BWA articulo 31, di dos insiso), den caso cu esaki ta rekeri.

Dunamento di man tambe por sosode door di un carta, di tal forma cu for di dje e intencion di e futuro pareha por keda demonstra cu seguridad satisfactorio.

Censo ta traha un acta di dunamento di man ora cu un pareha duna man pa casa. Censo ta ortoga un extracto di e acta riba peticion. Den nos Catalogo di Producto y Servicio por haya mas informacion tocante di dunamento di man pa casamento y con pa haya un extracto di e actanan concerni.

Prome cu ceramento di matrimonio tuma luga, fuera di e documentonan menciona caba, mester entrega tambe e siguiente documentonan na e empleado publico di Censo:

  • Acta di dunamento di man pa casamento;
  • Den e caso cu tabata tin impedimento; prueba cu a aboli e impedimento;
  • Copia di identidad (ID, paspoort of rijbewijs valido) di 2 testigo of maximo 4. 
  • Si un di e personanan cu ta bay casa (of tur dos) no tin e nacionalidad Hulandes, mester entrega un documento model D79, yena, na Censo. Pa esaki mester traha un cita prome pa un entrevista tuma lugar, si ta necesario. Esaki ta necesario pa evita matrimonio ficticio;
  • Copia di identidad (ID, paspoort of rijbewijs valido) di 2 testigo of maximo 4.

Den caso cu e conseho sali positivo, e matrimonio por tuma lugar, of si e matrimonio a tuma luga caba, e ora ey e inscripcion den e Registro Civil por tuma luga. 

E pareha mester presenta personalmente dilanti di e empleado publico di Censo riba dia di matrimonio. No ta posibel pa casa cu volmacht. E matrimonio por tuma luga na stadhuis di Aruba of na un otro luga. Pa casamento na un otro luga mester presenta un carta di dokter pa por lo menos un di e pareha.

Despues di casamento e pareha ta haya un trouwboek (buki di matrimonio) como prueba cu e matrimonio a tuma luga.

Gastonan:

  • Di dialuna pa diahuebs:
    • stadhuis Afl.130,00
    • cas Afl.285,00
  • riba diabierna:
    • stadhuis Afl. 160,00
    • cas         Afl. 285,00
  • riba diasabra:
    • stadhuis Afl. 335,00;
    • cas          Afl. 535,00
  • despues di orario di oficina (4.00 or)
    • stadhuis Afl. 335,00
    • cas         Afl. 535,00
  • trouwboek comun:  Afl. 35,00;
  • trouwboek luhoso:  Afl.55,00.

Bolbe na matrimonio

Matrimonio di personanan cu no ta inscribi

General | Duna man | Ceremonia di matrimonio | Gastonan | Bendicionamento di matrimonio

General

Pa su ambiente romantico, idilico y e manera relaha di biba, Aruba a bira un luga ideal pa parehanan scoge pa casa. Aruba ta un di e destinacionnan faborito den mundo pa casa.

Pa Hulandesnan y stranheronan, aunke cu nan no ta inscribi na censo di Aruba, ta posibel pa casa na Aruba. Un pareha recien casa riba e santo blanco na Eagle Beach

Si bo tin plan pa casa na Aruba, bo mester cuminsa cu e preparacionnan na tempo si. Tin formularionan of documentonan cu mester ta entrega na tempo na e Oficina di Censo di Aruba. Tambe mester tene cuenta cu e terminonan legal vigente cu tin na Aruba.

Pa por scoge un fecha di matrimonio ta depende di e confirmacion di e empleado di Censo cu e instancia aki a ricibi tur e documentonan necesario.

Si cumpli cu tur e condicionnan, abo y bo pareha lo experiencia e dia di boso matrimonio na un manera unico y inolvidabel. Hopi pareha cu a casa na Aruba ta bin bek Aruba pa celebra e fecha aki y pa renoba nan votonan matrimonial. Esaki ta un muestra cu casamento na Aruba ta hopi special y unico.

Bolbe na matrimonio di personanan cu no ta inscribi

Duna man(proposicion di matrimonio)

Tur persona cu kier casa na Aruba mester haci un declaracion na e ambtenar di censo na Aruba, cu nan ta propone pa casa (duna man).

Ta posibel, aunke cu e pareha no ta inscribi na Censo di Aruba, pa haci e declaracion di proposito di matrimonio por escrito. Por haci esaki dor di yena y manda e formulario di proposito di matrimonio (Ondertrouwformulier.doc).

Hunto cu e formulario mester manda e siguiente documentonan:

  1. Identificacion valido (cedula, rijbewijs of paspoort) original y copia;
  2. Si bo ta naci den Reino Hulandes: un extracto di acta di nacemento di tur dos;
  3. Pa esnan naci na un otro pais p.e. Venezuela, Surnam, Colombia, etc., e acta original mester tin un apostilla di Ministerio di Relacionen Exterior di dicho pais. Pa esnan naci na Republica Dominicana, e acta original mester tin tambe un seyo di verificacion di Embahada Hulandes na dicho pais. Haiti no mester apostilla pero si un seyo di verificacion di Embahada Hulandes na e pais menciona;
  4. Si un di e prometidonan of tur dos tabata casa caba; mester di un prueba cu a disolve e matrimonio anterior. Esaki por ta: extracto (uittreksel) di e acta di fayecimento, pa algun pais ta rekeri e sentencia di divorcio y un declaracion manera menciona bou no. 5 E acta di exterior mester tin un apostilla of/y seyo di Embahada Hulandes;
  5. Un declaracion cu tur dos persona no ta casa, traha door di un notario of door di un empleado di Censo di e luga unda e pareha ta biba;
  6. Copia di paspoort valido di e testigonan;
  7. Un lista cu e nombernan y adresnan completo di e testigonan.

E formulario hunto cu e documentonan rekeri, mester ta entrega no mas tarda cu un (1) luna prome cu e fecha di matrimonio, na atencion di sr. C. Christiaans, pa verificacion na Censo di Aruba. Tambe por manda e formulario hunto cu e documentonan pa medio di e-mail na: bbsb@aruba.gov.aw

Diescuatro (14) dia despues cu a duna man (declaracion di proposito di matrimonio) of diescuatro dia despues cu Censo di Aruba a ricibi e declaracion por escrito, e matrimonio por tuma luga.

Bolbe na matrimonio di personanan cu no ta inscribi

Ceremonia di matrimonio

Pa contrae matrimonio ta exigi cu:

  • Homber y muhe mester tin diesocho aña;
  • personanan bou di diesocho aña (menor di edad ) no por contrae matrimonio sin permiso di e mayornan, tambe ;
  • si e persona (nan) ta bou di curatela (te cu diesocho aña), anto mester di consentimento di e voogd y di e di dos voogd;
  • ora di contrae matrimonio mester ta presente, minimo dos (2) y maximo cuatro (4) testigo cu ta mayor di edad.

Pa un matrimonio civil (casamento pa raad) door di personanan cu no ta inscribi na Censo di Aruba, ta conta e siguiente reglanan:

Stadhuis di Aruba

  • Tur ceremonia civil/legal mester tuma luga den stadhuis;
  • e matrimonio por tuma luga di dialuna pa diabierna entre 10 or y 12 or di mainta;
  • riba peticion, cu pago adicional, por casa den oranan di atardi of riba diasabra.

Na final di e ceremonia di matrimonio e pareha ta haya for di man di e empleado di Censo, e asina yama trouwboek (buki di matrimonio). Esaki ta un prueba cu e matrimonio a tuma luga.

Ta recomenda pa pidi un of mas extracto di e acta di matrimonio (uittreksel di e huwelijksakte). Mester di e extracto  pa entre otro laga registra e matrimonio na e pais na unda e pareha ta biba y/of si ta bay casa pa iglesia, pa mustra e autoridadnan di iglesia.

Bolbe na matrimonio di personanan cu no ta inscribi

Gastonan

E gastonan di ceremonia di matrimonio ta:Trouwboek

  • Di dialuna pa diabierna :  Afl. 195,00(alrededor di US$ 112,00);  
  • riba diasabra: Afl. 405,00 (alrededor di  US$ 232,00); 
  • trouwboek comun:  Afl. 35,00 (alrededor di US$20,00);
  • trouwboek luhoso: Afl.55,00 US$ (alrededor di $ 32,00).

Bolbe na matrimonio di personanan cu no ta inscribi

Bendicionamento di Matrimonio

Despues di e matrimonio civil (casamento pa raad) e pareha recien casa, por laga bendiciona nan matrimonio na Aruba (casa pa misa). E bendicionamento entre otro por tuma luga segun e siguiente religionnan:

Si ta desea pa casa pa misa segun e religion Catolico Romano, anto mester di e siguiente documentonan:Misa di San Fransisco na Oranjestad

  • Un prueba cu e pareha a asisti na un preparacion prematrimonial;
  • un permiso por escrito di e religioso (pastor of pader) di e pareha, pa nan por casa na Aruba;
  • e pastor di e pareha mester duna un declaracion oficial, cu e pareha no tabata casa prome caba pa misa;
  • un copia di e prueba di matrimonio como prueba cu e pareha a casa pa civil den e pais unda nan ta biba of un extracto di e acta di matrimonio;
  • prueba di bautismo y di confirmacion di e pareha;
  • copia di paspoort of otro documento di identificacion di e pareha;
  • un lista cu nomber y adres di e testigonan.

Tur documento mester ta entrega cuatro luna prome cu e fecha di matrimonio.
E ceremonia di matrimonio mester tuma luga den un misa.

Mester tene na cuenta si, cu actualmente ta revisa e exigencianan manera ariba menciona.
Ta bon pa tuma informacion na:

  • Centro Pastoral Aruba, Santa Cruz 35 B, telefon (297) 585 5985, Fax: (297) 585 1585;
  • pastorie di Misa San Fransisco, Irausquinplein 3, Oranjestad, telefon (297) 582 1434;
  • pastorie di Misa Santa Ana, Noord 16, Oranjestad, telefon (297) 587 1409, Fax: (297) 587 8554.

Si ta desea di laga bendiciona e matrimonio segun e religion Protestant, Anglicano of Metodista, e siguiente reglanan ta conta:Misa protestant na Sero Colorado

  • E ceremonia di matrimonio por tuma luga den un di e misanan Protestant, Anglicano of Metodista na Aruba of e pareha por scohe un lugar di nan preferencia;
  • un copia di prueba cu nan ta casa den nan pais di origen y si e pareha a casa na Aruba un extracto (uittreksel) di e acta di matrimonio.

Pa mas informacion por tuma contacto cu:

  • Iglesia Protestant, Wilhelminastraat1, Oranjestad, telefon (297) 582 1435, e-mail: protestantsegemeente@setarnet.aw, website: www.pgva.org;
  • Iglesia Anglicano, Weg Sero Preto 31, San Nicolas, telefon (297) 5845142 of (297) 584 3394;
  • Iglesia Metodista, Longfellowstraat 3, Oranjestad, adres di corespondencia:Postbus 2149, San Nicolas, Telefon/fax (297) 584 5243, e-mail: arubamethch@setarnet.aw.

Si ta desea pa laga bendiciona e matrimonio segun e religion Hudiu, entre otro e siguiente reglanan ta aplicabel:Snoa na Aruba

  • Tur dos persona mester ta Hudiu. Nan mester entrega un verificacion cu nan ta Hudiu di e rabino di e luga unda nan ta biba, na e comunidad Hudiu di Aruba;
  • tin cu entrega un peticion formal na e comunidad Hudiu di Aruba;
  • e cantor di Aruba ta acepta comprobante di ta Hudiu for di autoridadnan Ortodoxo, Conservativo, Reformista, Liberal y Reconstruccionista;
  • e snoa di Aruba ta un congregacion independiente, conservativo y reformista;
  • e ceremonia di matrimonio por tuma luga den e snoa of na un otro luga cu e pareha ta desea.

Pa mas informacion por tuma contacto cu Beth Israël, Adriaan Laclé Boulevard 2, Oranjestad. Telefon (297) 588 6228, Fax (297) 588 6264.

Pa tur bendicion religioso ta rekeri cu e pareha mester ta bisti na un manera apropia. Esaki ta encera cu no ta permiti pa e bruid bisti trahe di baño of saya lora na curpa. E bruidegom por bisti un short.

Pa bendicionamento di matrimonio, iglesianan por pidi un contribucion of ta aprecia un donacion. Pa mas informacion tocante di esaki por tuma contacto cu e autoridad di iglesia corespondiente.

Loke ta trata matrimonio riba lama, ta rekeri e siguiente:

Un capitan di un barco no ta autorisa pa ehecuta un ceremonia di matrimonio segun e leynan di Hulanda y/of di Aruba. E regla aki ta conta pa matrimonio riba awanan internacional y den hafnan. E unico excepcion riba e regla aki ta, si e capitan di e barco ta autorisa pa haci tal door di e pais bou cua bandera e barco ta nabega y ta registra.

Bolbe na cuminsamento

Divorcio

Ta disolve un matrimonio ora cu un di e pareha a muri of ora di divorcio. E proceso di divorcio ta manera siguiente:

  • Un di e pareha ta acudi na un abogado;
  • esposa y esposo y/of nan abogadonan mester presenta dilanti hues;
  • e hues ta duna su veredicto;
  • e pareha mester laga registra e veredicto di divorcio den Registro civil door di un empleado publico na Censo.

Mester acudi na un abogado pa cuminsa cu e proceso pa disolve e matrimonio. Hues ta duna veredicto den caso di divorcio. Pa e veredicto aki tin validez legal, mester laga inscribi’e den Registro Civil door di un empleado publico na Censo. E inscripcion mester sosode dentro di seis luna despues cu hues a dicta sentencia y e termino di apelacion a pasa. Si no haci esaki, e matrimonio ta keda valido.

E unico motibo pa un divorcio ta (desde prome di januari 2002) kiebro permanente di e matrimonio.

Den nos Catalogo di Producto y Servicio bo por haya mas informacion tocante otorgamento di un acta di divorcio.

Bolbe na cuminsamento

Reconocemento di yiu

Un hende homber por reconoce un mucha cu legalmente no tin tata ainda, door di cual e ta crea un relacion familiar legal cu e mucha. E mucha ta bay carga su fam.

Un empleado publico di Censo of un notario (acta notarial) ta traha un acta di reconocemento ora cu un reconocemento di yiu tuma luga.

Den caso cu un notario traha e acta di reconocemento, mester registra e acta na Censo.

Reconocemento di un yiu no por tuma luga si:

  • E futuro tata legal ta menor di edad y e no tin diesseis aña ainda;
  • despues cu e termino legal pa inscripcion di nacemento di e yiu a pasa (cinco dia), a menos
    • cu ta hopi probabel cu e futuro tata legal ta tambe e tata biologico di e yiu;
    • entre e futuro tata legal y e mucha cu a nace tin un relacion personal hopi cera.

Den nos Catalogo di Producto y Servicio por haya mas informacion tocante e otorgamento di acta y extracto for di registro di reconocemento.

Bolbe na cuminsamento

Adopcion

Adopcion ta nifica tuma legalmente responsabilidad di bienestar di un mucha. E responsabilidad ta normalmente di e mayornan biologico. E mayornan y yiunan adoptivo tin e mesun derecho y deber cu mayornan tin cu nan yuinan biologico.

Hues ta confirma of ta dicta e sentencia di adopcion, cu ta sosteni, of no,  door di Directie Voogdijraad. Tur adopcion mester ta basa riba ley y mester ta na beneficio di e mucha.

Ora di adopcion, e mucha ta haya e fam di e mayor adoptivo. Si ta trata di un pareha casa, e ora ey e mucha ta haya fam di e hende homber. Tambe ta posibel pa combini cu e mucha ta keda cu su mesun fam sigui pa e fam di esun cu a adopt’e.

Pa bin na remarca pa adopta un mucha, mester cumpli cu e siguiente condicionnan:

  • E mucha mester ta menor di edad na e momento cu ta entrega e peticion pa adopcion. Den caso cu e mucha tin diesdos aña of mas, riba e dia cu a entrega e peticion pa adopcion, e mucha mester duna di conoce cu e ta di acuerdo cu e adopcion durante cu ta trata e caso;
  • esaki por conta tambe pa un mucha bou di diesdos aña, si segun hues ta parce cu no tin obhecion contra e adopcion y cu por considera e mucha apto pa por haci un evaluacion rasonabel di su interesnan;
  • e mucha no ta mag di ta nieto di e mayor adoptivo;
  • e mayor(nan) adoptivo mester ta por lo menos diesocho aña mas bieu cu e mucha;
  • ningun di dos mayor por ta contra e peticion pa adopcion;
  • si e mama di e mucha ta menor di edad, e mester a cumpli diesseis aña pa e fecha di e peticion pa adopcion;
  • e mayor(nan) di e mucha no por tin of no tin derecho mas riba e mucha. Si ta casa di un di e mayornan di e mucha a adopt’e, ta e mayor adoptivo aki so tin di bisa riba e mucha.

Riba peticion di un mucha adopta, hues por revoca e adopcion. Door di esaki e relacion familiar legal bieu ta keda rebiba.

Mester registra e sentencia of confirmacion di hues na Censo.

Den nos Catalogo di Producto y Servicio por haya mas informacion tocante di reglamento di adopcion na Censo.

Bolbe na cuminsamento

Fayecimento

Un empleado publico na Censo ta traha un acta di fayecimento den caso di tur fayecimento na Aruba, cu informacion di esun cu a bin registra esaki na Censo. Esun autorisa pa bin registra un fayecimento ta esnan cu a wak of a haya sa di e fayecimento. Tambe por autorisa e agencia funeraria pa registra e fayecimento. Ora di registra un fayecimento mester bin cu un declaracion di e dokter cu a constata e morto y si tin, buki di matrimonio.

E empleado publico na Censo mester duna autorisacion pa por dera un persona.

Na Aruba cremacion di un defunto no ta posibel ainda.

Den nos Catalogo di Producto y Servicio por haya mas informacion tocante registracion di fayecimento y otorgamento di acta of extracto di fayecimento na Censo.

Bolbe na cuminsamento

Cambio di adres

Tur hende cu ta muda tin e obligacion di registra esaki na Censo, cinco dia prome of cinco dia despues di a muda. No ta permiti pa muda pa un adres (cas) sin permiso previo di e doño di cas of e cabes di famia. Den caso di duda, e hefe di Censo por exigi pa e persona concerni entrega prueba cu e tin permiso di e doño di cas of di e cabes di famia pa muda pa su adres.

Si acaso un persona ta muda pa un adres den exterior, e mester registra esaki na un empleado publico na Censo, entre dies pa cinco dia di trabou prome cu e biaha. Den caso cu e ta muda pa un adres na Hulanda of Antiya Hulandes, e lo haya un notificacion di mudansa pa hiba cune.

Pa cumpli cu bo obligacion pa registra cambio di adres (mudansa), bo mester trece e sigiuente documentonan cu bo:

  • Ora ta trata un mudansa na Aruba mes; e autorisacion di e doño di cas of cabes di famia di e adres nobo;
  • ora ta trata bo obligacion di registra bo mudansa pa exterior; bo mester trece bo paspoort;
  • bin cu un documento di identificacion valido, pa bo por haya e declaracion of notificacion di mudamento.

Den nos Catalogo di Producto y Servicio por haya mas informacion tocante di cambiamento di adres y otorgamento di notificacion di mudansa.

Bolbe na cuminsamento

Paspoort

General | Fingerprint | Aplicacacion | Busca paspoort | Menornan mester paspoort propio | Validez

General

Paspoort ta un documento rekeri pa por biaha pa exterior. Tur ciudadano di Aruba cu kier biaha pa exterior mester tin un paspoort.

Tur persona cu tin e nacionalidad Hulandes y cu ta inscribi den registro di Censo di Aruba por pidi un paspoort Hulandes na Censo. E personanan cu tin nacionalidad Hulandes pero cu no ta inscribi na Censo mester haci nan peticion na Kabinet di Gobernador.

Menornan di edad (bou di diesocho aña) mester tin aprobacion di nan mayornan, voogd of di esnan encarga cu nan derechonan.  Mester tene cuenta si cu pa biaha pa Merca tur persona mester di un paspoort.
Tur hende mester acudi personalmente na Censo, ora di pidi un paspoort of ora di duna aprobacion pa pidi un paspoort.

Bolbe na paspoort

Fingerprint

Ta tuma fingerprinti di tur hende cu aplica pa un paspoort nobo. Union Europeo a introduci un ley na 2004. E meta ta pa evita maluzo di documento di biahe mas tanto cu ta posibel.
E regla aki ta obligatorio pero tin algun caso di excepcion.

  • Manera si fisicamente ta imposibel pa tuma fingerprint di un persona, anto e lo haya un paspoort valido pa cinco aña sin cu esaki tin su marcanan di dede den dje;
  • Tambe si den caso cu ta temporalmente imposibel pa tuma fingerprint di e persona tin dos posibilidad: of bo ta warda te ora ta posibel pa tuma un fingerprint of bo ta haya un paspoort cu un validez di diesdos luna maximo;
  • Otro excepcion ta cu no ta tuma fingerprint di mucha bou di 12 aña.

Ta tuma dos marca di dede (fingerprint) electronicamente y tur marca di dede ta keda registra den e administracion di paspoort. Lo registra dos marca di dede den e chip cu tin den e paspoort.

Te na momento cu entrega e documento di biahe, ta warda e marcanan di dede den e administarcion di documento di biahe. Despues cu e persona haya e paspoort ta saca e marcanan di dede for di e administracion y nan ta keda deposita unicamente den e paspoort mes.

Ya desde 26 di augustus 2006 e paspoort Hulandes emiti na Hulanda ta contene e chip y e siguiente informacion:

  • Bo potret (di bo cara);
  • nomber y faam;
  • sexo;
  • nacionalidad;
  • number di documento;
  • fecha cu e validez di e documento ta caduca;
  • pais unda a otorga e paspoort.

Bolbe na paspoort

Aplica pa paspoort

Ora di pidi un paspoort, mester presenta cu e siguiente documentonan, :Pasport di Reino Hulandes

  • E paspoort cu a caduca, si ta renoba paspoort;
  • si ta trata di un prome peticion, mester bin cu un identificacion valido;
  • si ta aplicabel, un decreto real of un declaracion cu ta comproba cu persona a haya e nacionalidad Hulandes;
  • un pasfoto segun reglamento stipula;
  • si ta trata menornan di edad, e mayornan, voogd of esnan encarga cu nan derechonan mester ta presente pa duna aprobacion;
  • den caso cu e menor di edad tin un voogd, mester tin e declaracion di voogdij of di tutela, cu ta obtenibel na Voogdijraad.
  • Den caso cu a perde of cu nan a horta bo paspoort, un copia autentica di e proces-verbaal traha pa Polis den caso cu a haci denuncia di hortamento of perdemento di bo paspoort;
  • placa cash.

E funcionario tras di balie ta controla si por tuma bo fingerprint. Mancha di verf of otro tipo di sushi por causa problema ora di tuma fingerprint. Cu e control aki kier logra pa check si e persona ta purba tapa su mesun dede.

Bolbe na paspoort

Busca paspoort

Ora di busca e paspoort nobo e empleado di Censo por lesa e chip y lo por controla e fingerprint cu a keda warda den e chip. Asina e por controla si bo marca di dede ta cuadra cu esun warda den e chip.

Bolbe na paspoort

Menornan mester paspoort propio

Por inscribi muchanan te cu diescinco aña den paspoort di nan mayornan. Entrante 26 di juni 2012 no ta pone nomber di yiu den paspoort di mayor(nan) mas. Cada mucha mester tin su propio paspoort. Si pa e tempo ey bo tin un paspoort ainda cu nomber di bo yiu den dje, e paspoort ta keda valido pa bo mes persona te ora e caduca pero no por uz’e como un documento di biahe pa bo yiu. E mucha mester tin su propio paspoort.

Bolbe na paspoort

Validez

E paspoort tin normalmente un validez di diez aña. Den casonan di excepcion e validez por ta menos. Un paspoort otorga ta y ta keda propiedad di Reino Hulandes.

Pa peticion of renobacion por acudi na Seccion Paspoort op afspraak di Censo. Por haci un cita pa peticion di paspoort via e-mail cita@censo.aw of telefoon (297) 5838181

Pa mas informacion por tuma contacto cu Censo of consulta e website di www.paspoortinformatie.nl of por manda un mail na ministerio di Asunto Interior y Relacion di Reino Hulandes via www.minbzk.nl/algemene-onderdelen/serviceblok/contact.  

Den nos Catalogo di Producto y Servicio por haya mas informacion tocante peticion pa un paspoort nobo.

Bolbe na paspoort

Bolbe na cuminsamento

Cedula

E cedula Arubano ta un documento pa identificacion, cu tin un grandura di un credit card. Bentaha di e cedula ta cu e ta facil pa warda y uza. Diariamente e ta hopi uza, por ehempel ora cu mester haci transaccion na banco of na postkantoor, tambe ora di bay vota. E ta haci cu no ta necesario pa bo cana tur ora cu bo paspoort. 
Tur hende inscribi na Censo ta bin na remarca pa haya un cedula. Por haci peticion pa cedula na Oficina di Censo. 

Mester bin cu un identificacion, ora di haci un peticion pa un cedula na Censo. Esnan cu tin un permiso di estadia pa Aruba, mester mustra esaki ora di haci e peticion.

Pa esnan cu mester di permiso di estadia pa keda Aruba, e cedula ta valido pa e periodo di e permiso di estadia (sin tene cuenta cu e periodo di permiso pa trabou). Pa tur otro e cedula tin un validez di cinco aña.

Mester presenta cu e siguiente documentonan ora di haci peticion pa un cedula:

  • Si ta trata di renobacion di cedula: e cedula bieu;
  • si ta trata di un prome peticion: un identificacion valido (paspoort of rijbewijs);
  • den caso cu ta aplicabel: permiso di estadia valido;
  • un pasfoto recien y bon parecido na e persona cu ta haci e peticion.

Den caso di muchanan bou di diesseis aña, un di e mayornan of voogd mester ta presente pa duna aprobacion. 
 
Den nos Catalogo di Producto y Servicio por haya mas informacion tocante peticion pa un cedula na departamento di "Cedula" na Censo.

Bolbe na cuminsamento