Turismo
Link naar website van www.aruba.com
Kiezerslijst 2013
Arubahuis
Green Aruba where Europe meets the Americas

Parlamento

General | Competencia | Manera di traha | Drenta Parlamento | Miembro actual di Parlamento | Retiro miembro di Parlamento | Comision | Inmunidad Parlamentario | Presidente | Secretariado | Relacion externo

General

Parlamento ta representa henter e pueblo Arubano y ta e organo mas halto den e structura constitucional di Aruba. E ta conoci tambe bou di e nomber di ‘Organo Representativo’ of ‘Staten’.

Edificio Parlamento di ArubaMescos cu e otro dos Paisnan den Reino, Aruba tambe conoce e asina yama democracia parlamentario. Pueblo ta eligi su representantenan, e miembronan di Parlamento, cu mester vocifera su opinion. Parlamento ta consisti di 21 miembro, kendenan ta keda elegi pa medio di eleccion liber y secreto. Pa medio di e miembronan di Parlamento, pueblo por eherce influencia ariba e maneho di Gobierno.

E periodo legislativo di Parlamento ta cuatro aña. E aña legislativo ta cuminsa ariba e di dos diamars di september cu un discurso di Gobernador tocante e maneho cu Gobierno a hiba durante e ultimo aña y cu e lo hiba durante e aña benidero. Esaki ta tuma luga durante un reunion special convoca pa Parlamento.

Bolbe na cuminsamento

Competencia

Un di e tareanan mas importante di Parlamento ta pa traha hunto cu Gobierno riba creacion di leynan (ordenansa nacional). Un Ministro ta entrega un proyecto di ley pa tratamento na Parlamento. Den un reunion publico Parlamento ta trata e proyecto di ley, cu mester haya mayoria den Parlamento pa e proyecto di ley keda aproba. Banda di e poder legislativo aki, Parlamento tin tambe tin e deber di Supervisa y controla e maneho di Gobierno.

Pa eherce su tarea Parlamento tin diferente competencia:

  1. Derecho di iniciativa: Parlamento por inicia un proyecto di ley. Cada miembro di Parlamento tin derecho pa inicia un proyecto di ley. Pa esaki e tin e competencia pa pidi ayudo di un departamento of servicio di Gobierno pa formula e proyecto di ley;
  2. Derecho di amienda: Parlamento tin derecho di haci cambio den proyecto di ley cu a wordo entrega pa tratamento den Parlamento prome cu nan aprob’e;
  3. Derecho di haci pregunta: E miembro di Parlamento tin e derecho di haci un Ministro pregunta tocante e maneho cu e ta hiba;
  4. Derecho di interpelacion: Banda di e derecho di haci pregunta, e miembro di Parlamento tin tambe e derecho di exigi di un Ministro pa e responsabilsa su mes pa e maneho cu e ta hiba;
  5. Derecho di presupuesto: Un miembro di Parlamento tin e derecho di tin un bista cla ariba entrada y gasto di Gobierno;
  6. Derecho di encuesta: Esaki ta un forma profundo di controla e maneho di un of mas Ministro. Dor di eherce e derecho aki, Parlamento ta haya e oportunidad pa envolvi y haci pregunta na instancia y personanan pafor di e aparato gubernamental ora cu ta investigando un asunto di maneho mas profundo.

Bolbe na cuminsamento

Manera di traha

Durante e aña legislativo ta tene diferente reunion. 

  • Reunion publico: E reunionnan aki ta habri pa publico. E notulanan finalmente ta bira publico; 
  • Reunion di Comision Central: E reunionnan ta solamente pa miembronan di Parlamento cu ta forma parti di e comision. E notulanan no ta bira publico, pero si ta disponibel pa e otro miembronan di Parlamento;
  • Reunion di Comision Fiho: E reunionnan ta solamente pa e miembronan di Parlamento cu ta forma parti di e comision fiho. E notulanan no ta bira publico, pero si ta disponibel pa e otro miembronan di Parlamento;
  • Reunion di Comision Special: Pa e reunionnan aki tambe ta conta cu nan no ta pa publico y cu e notulanan tampoco ta publico pero cu si nan ta disponibel pa e otro miembronan di Parlamento.

E manera cu mester tene e reunionnan ta ampliamente describi den e asina yama Reglamento di orden di Parlamento, cu ta disponibel den e biblioteca di Parlamento. Un di e reglanan mas importante ta cu pa tene un reunion mester tin por lo menos 11 miembro di Parlamento presente.

Bolbe na cuminsamento 

Drenta Parlamento

Pa un persona por bira miembro di Parlamento, e mester ta un habitante di Aruba, e mester tin nacionalidad Hulandes, e mester a alcansa e edad di bintiun aña y e no ta exclui di derecho di vota.

Despues cu Conseho Supremo Electoral fiha e resultado di eleccion, tur candidato pa miembro di Parlamento ta entrega su credencialnan na Parlamento. E credencialnan, bon mira ta dos documento, esta:

  1. E notificacion di e Conseho Supremo Electoral cu e candidato a keda elegi;
  2. E prueba cu Presidente di Conseho Supremo Electoral a ricibi for di e candidato pa miembro di Parlamento, cu e ta acepta su eleccion.

E investigacion di credencialnan ta encera principalmente, controla si e candidato pa bira miembro di Parlamento, no ta eherce un funcion cu ta imcompatibel cu e funcion di miembro di Parlamento. E funcionnan aki ta Gobernador, Gobernador interino, miembro di Conseho di Consulta, miembro di Camara di Control General, Ministro, Ministro Plenipotenciario, miembro di Poder Hudicial, Procurador General, Abogado General na Corte Comun di Husticia of empleado publico den servicio activo. Mescos cu Ministronan, pa miembro di Parlamento tambe ta conta cu no tin mag di existi lasonan familiar te den di dos grado entre miembronan di Parlamento. Un pareha casa tampoco por ta miembro di Parlamento na e mesun tempo. Despues di a aproba e credencialnan, e candidato pa bira miembro di Parlamento ta huramenta dilanti di Gobernador y e por cuminsa ehercse su funcion oficialmente.

Bolbe na cuminsamento

Miembronan actual di Parlamento

Actualmente Parlamento ta consisti di e siguiente miembronan:

NomberFuncion specifico Partido politico di 
Sra. Marisol J. Lopez geb. TrompPresidente di ParlamentoA.V.P. 
Sr. Christiaan Gerard DammersVice-presidente di ParlamentoA.V.P.   
Sr. Gervais Rene HerdéLider di Fraccion A.V.P.  
Mw. Melvin Glorinda Wyatt, geb. RasMiembro di Parlamento A.V.P.   
Sra. Clarisca Nereida Velasquez       Miembro di Parlamento A.V.P. 
Sr. Alfred Marlon Sneek Miembro di Parlamento A.V.P.  
Sra. Désirée Geneviève Croes  Miembro di Parlamento A.V.P. 
Sr. Lorna Casandra Varlack  Miembro di Parlamento  A.V.P. 
Sr. Donald Raymond RasmijnMiembro di Parlamento A.V.P 
Sr. Melvin Atanacio TrompMiembro di Parlamento A.V.P.  
Sr. Jeffrey Clifton Gilbert Paul Kelly Miembro di Parlamento  A.V.P.  
Sra. Jennifer Justine Arends geb. Reyes Miembro di Parlamento A.V.P. 
Sr. Norman Ceril RoosMiembro di Parlamento A.V.P. 
Sra. Evelyna C. Wever geb. CroesLider di Fraccion M.E.P.
Sr. Crispin V.J. Romero Miembro di Parlamento M.E.P. 
Sra. Xiomara J. Ruiz geb. MaduroMiembro di Parlamento M.E.P.   
Sr. Guillfred F. Besaril Miembro di Parlamento M.E.P. 
Sr. Danguillaume P. OduberMiembro di Parlamento M.E.P.  
Sr. Juan E. Thijsen Miembro di Parlamento  M.E.P.  
Sr. Glenbert F. Croes  Miembro di Parlamento M.E.P. 
Sr. Andin C.G. BikkerLider di Fraccion  P.D.R. 
Mw. Mr. Jacqueline A. Bastien-Sherman Griffier  

Miembro di Parlamento di Aruba

 

Bolbe na cuminsamento

Retiro di miembro di Parlamento

Un miembro di Parlamento por entrega su retiro na tur momento. Como consequencia di e retiro aki, Conseho Supremo Electoral ta cuminsa e procedura pa nombra un miembro di Parlamento nobo. Mayoria biaha e candidato cu ta bini na remarca ta bin for di mesun partido cu e miembro di Parlamento cu a tuma su retiro. No por obliga un miembro di Parlamento pa tuma su retiro. Una bez cu e miembro di Parlamento ta elegi, e asiento den Parlamento aki ta pertenece na e so, no obstante cu e miembro di Parlamento eligi a campaña pa un partido politico y a haya nan sosten. Esaki ta trece cu ne cu e no ta obliga di tin e mesun opinion cu e partido. Tambe ora cu ya e ta un miembro di Parlamento, e no ta mara na punto di bista di su partido. Ora di tuma su retiro, e por entrega su asiento na su partido. Sinembargo, ta posibel cu kedando cu su asiento e ta afilia su mes na un otro partido politico. Un ultimo posibilidad ta cu e ta keda como independiente den Parlamento. Si un miembro di Parlamento tin un estadia di mas cu 8 luna den exterior e ta perde su derecho di miembrecia di Parlamento.

Bolbe na cuminsamento

Comision

Parlamento ta institui pa cada aña legislativo comisionnan pa un cierto cantidad di asuntonan o topiconan. E asuntonan aki mayoria biaha ta coincidi cu e cartera di un Ministro. Tur partido cu tin representacion den Parlamento ta apunta un of mas miembro pa tuma parti den e comisionnan aki. Pues ta un cantidad limita di miembronan di Parlamento ta miembro di un comision fiho. Por pasa cu un miembro di Parlamento ta miembro di mas cu un comision fiho.

Bolbe na cuminsamento

Inmunidad parlamentario

No por persigui miembronan di Parlamento cu ta participa na reunionnan di Parlamento, ni demanda nan hudicialmente, pa loke nan a bisa durante e reunionnan aki. Mesun cos ta conta pa documento presenta of skirbi. Hasta Fiscal no tin autoridad pa actua den caso cu miembro di Parlamento ofende un otro miembro of otro persona durante reunion. Miembronan di Parlamento ta gosa di inmunidad durante cu oficialmente nan ta eherce nan funcion, si nan ta cumpli cu cierto condicion. Importante ta pa remarca cu e inmunidad aki ta conta solamente den sala di Parlamento y no pafor.

Bolbe na cuminsamento

Presidente

Despues cu Parlamento nobo cuminsa cu su trabou, ta nombra un Presidente y un Vice-Presidente. E Vice-Presidente ta fungi como suplente di e Presidente ora cu esaki ta ausente. E nombracion di e funcionarionan aki ta tuma lugar despues cu Parlamento a entrega un proposicion di dos miembro pa cada funcion apart. E nombracion ta tuma lugar pa medio di un decreto nacional.

Bolbe na cuminsamento 

Secretariado (Griffie)

Parlamento ta nombra e Secretario (griffier) y ta pone un cantidad di empleado publico den e rangonan necesario na su disposicion. Nan no por ta miembro di Parlamento na e mesun tempo. E tareanan di e Secretariado ta:

  • Traha agenda pa reunion di Parlamento;
  • Publica agenda di reunion di Parlamento;
  • Notula reunion di Parlamento;
  • Mantene e archivo di Parlamento;
  • Duna asistencia administrativo na tur miembro di Parlamento.

Parlamento tin tambe un biblioteca cu ta bou di encargo di e Secretariado.

Bolbe na cuminsamento

Relacion externo

E delegacionnan di Parlamento di e cuater paisnan di Reino ta reuni dos biaha pa aña. Esaki ta wordo yama “Interparlementair Koninkrijksoverleg (IPKO)”. E reunionnan aki ta tuma lugar cada biaha na un otro pais den Reino. E cuater paisnan ta : Hulanda, Aruba, Corsou y Sint Maarten. E delegacion di Parlamento di Aruba ta consisti di miembronan di e comision fiho pa contacto interparlamentario.

Na 1964 a funda na Lima e Parlamento Latino Americano (Parlatino). Tur pais di Latino America cu tin un gobierno democratico por bira miembro di e parlamento aki. E unico paisnan di Caribe cu ta haya invitacion pa atende Parlatino ta (ex)Antias Hulandes y Aruba y awor Aruba, Corsou y St. Maarten.

Via Reino Aruba ta afilia na e organisacion internacional interparlamentario (International Parlementary Union - I.P.U). E contacto parlamentario aki ta cay bou di Relacionnan Exterior y ta un asunto di Reino. Reino ta duna Aruba e oportunidad pa manda un persona pa scucha e reunionnan di I.P.U.

 

Bolbe na cuminsamento