Inauguracion di Fofoti Tech Lab na Universidad di Aruba

Esaki ta un proyecto piloto cu a bira realidad despues cu e propio studiantenan di Universidad di Aruba a entrega e propuesta di e proyecto aki na Futura-Edutech.

Edutech a financia e proyecto aki cu ta inclui 10 VR (Virtual Reality) headset y 10 laptop. Cu esaki e studiante por compromete mas y miho den e materia cu e ta studia. E sistema normal di un estudio ta trata di entre otro lesnan dilanti klas, charlanan y lesamento di hopi buki. E diferencia di e sistema di VR ta cu e studiante ta siña den e omgeving di e VR cu ta haci cu si acaso e studiante haci un fout, lo no tin ningun consecuencia ya cu e ta den un ambiente safe. Cu otro palabra e tecnologia aki ta trece e realidad di pafo den e klas.

Prome Minister Evelyn Wever-Croes a keda hopi impresiona cu e echo cu pa prome biaha un proyecto asina grandi y importante a keda diseña, prepara y ehecuta den su totalidad pa e studiantenan. E mandatario ta gradici Futura y felicita e grupo di studiante di Universidad di Aruba, no solamente di a prepara un bon proyecto y gana e fondonan di Edutech, sino pa e echo cu proyectonan asina lo yuda nan y tur e studiantenan cu bin despues di nan. E proyecto aki ta facilita e stage di studiantenan ya cu e VR ta duna nan un miho idea di loke nan lo por spera.

Scolnan cu ainda no a aplica pa ciclo 7 di Edutech, tin algun dia ainda pa haci esaki, mirando cu e ultimo dia pa inscribi nan proyecto di scol ta dia 18 di april 2024. Inscribiendo bo scol, bo tambe tin chens di gana fondo pa proyectonan interesante asina y nos tur lo sigui traha hunto na e beneficio di educacion di Aruba.