Temporada di horcan

Temporada di horcan pa e region Atlantico Tropical Caribe ta cuminsa dia prome di juni y ta termina dia 30 di november. Pa aña ta forma mas o menos dies tormenta tropical. Di e tormentanan aki seis ta bira horcan. Normalmente un horcan por dura cinco pa dies dia pero tin biaha e por dura hopi mas. Durante e temporada di horcan, e lunanan di augustus, september y october ta esnan mas activo den cua ta forma mas tormenta tropical y horcan.

Horcan

E islanan ABC ta situa den un zona di Caribe unda tin masha poco horcan. Sinembargo, segun estadistica , cada siglo un horcan a asota e islanan aki masha fuerte mes. Esaki a pasa na aña 1605, 1784 y 1877. Durante e siglo cu a pasa y te awor ningun horcan no a pasa riba Aruba ainda. Tambe ta bon conoci cu e efectonan di e “horcannan di siglo” a dal nos isla mas duro cu e efectonan di e horcannan Hazel (1954) y Ivan (2004).

 E peligernan cu un horcan ta trece cune ta:

  • Door di olanan grandi (maremoto), cu por tin altura di seis (6) meter, lama por subi tera;
  • Biento fuerte cu por destrui tur loke ta fofo y los.
  • Murayanan di yobida por causa inundacion door cu dam y rooi ta bay over;

 Door di e peligronan aki mester tene cuenta cu lo por tin interupcion di coriente, awa, comunicacion y transportacion pa un tempo largo.

 Plan di accion

Den caso di horcan, pa bo siguridad y di bo famia e miho luga ta pa den bo mesun cas. Bo cas mester tin un luga di sconde.

Pero si e cas ta:

  • Cerca di lama, riba un tereno plat y abou;
  • Yena regularmente cu awa ora di yobida;
  • Situa den un area abou banda di un rooi of dam;
  • Di construccion humilde of delicado;
  • Un trailer of algo parecido.

 Anto awe mes bo mester palabra cu bo famia pa den caso di horcan, bay keda na un otro cas cu ta mas sigur. Por ehempel cerca famia, amigonan of conocirnan.

Si prome of durante horcan, autoridad conseha bo pa bandona bo cas, haci esaki mesora. E recomendacion ta basa riba informacion di e intensidad di e horcan y e efectonan cu e horcan por tin pa e bario unda bo ta biba.

Proteha bo cas y percura cu semper e ta bon manteni y cu e ta bon proteha contra horcan.

Aki ta sigui algun recomendacion:

  1. Revisa polisa di seguro y controla si bo cas ta sigura contra daño di biento y awa (seguro contra consecuencia di horcan);
  2. Percura pa e construccion di e dak ta bon hancra na e ringbalk y na e columnanan;
  3. Drecha leknan di dak di bo cas;
  4. Combati y elimina problema di comehein;
  5. Percura pa tur porta y bentana ta cera bon;
  6. Kap tur taki di mata cu ta colga riba dak;
  7. Tene bo cura di cas semper liber di obhetonan los y cu ta peligroso, manera palo, zim, bleki, glas y boter.

 Pa casonan di emergencia mester percura pa tin semper e siguiente articulonan den cas.

  1. Un caha di prome ayudo completo (first aid kit);
  2. Un radio portatil AM/FM di bon calidad;
  3. Suficiente luz di emergencia manera foks (flashlight) y bela;
  4. Suafel y un habrido di bleki manual;
  5. Suficiente tayo y beker di carton of plastic y cuchiu, forki, cuchara di plastic y papel di seca man (kitchen towel);
  6. Suficiente papel di wc, wipes y saco di sushi;
  7. Herment, clabo, tape hancho(2") y suficiente plywood of plachi di zim, preferibel corta na midi, cla pa por cubri (por lo menos) bentana y porta di glas cu ta mas exponi na biento cu cara pa caya of tereno habri.

Mester percura pa tin un luga pa sconde den cas:
E luga mester ta un camber, un walk in closet of baño cu ta relativamente chikito. Ta preferibel cu e luga ta sin bentana of cu un bentana chikito y un porta fuerte. E bentana aki mester ta bon tapa y claba di pafo cu plachi di plywood of zim. E luga mester ta suficiente comodo pa bo y bo famia.

Den caso di emergencia y cu mester haci uzo di e luga di sconde, mester saca tur loke ta di glas y cos skerpi. Despues ta ekipa e luga aki cu un par di corchon, un caha di prome ayudo (first aid kit), un radio portatil, si tin, un telefon celular y un foks (flashlight).
E luga di sconde aki ta un refugio pa uza den casonan di emergencia extremo. Por ehempel, si durante un horcan un bentana of mas kibra y cu awa ta drenta, glas y tur sorto di articulonan cuminsa bula rond, pio ainda si e horcan a ranca e dak. Abo y bo famia por scapa di peliger door di bay sconde den e luga aki.

Alarma

Pa por determina ta cua precaucionnan mester tuma den caso di horcan, tin dos fase di alarma oficial. E alarmanan aki ta:

  • Alerta pa horcan (Hurricane Watch);
  • Aviso di horcan (Hurricane Warning).

Ora cu autoridadnan emiti un alerta pa horcan, esey ta nifica cu dentro di 48 ora por surgi condicionnan di horcan riba nos isla. E fase di alarma aki ta keda vigente te ora cu e autoridadnan competente considera cu e peligro a pasa of te ora cu a bay over pa emiti alarma fase 2, cu ta aviso di horcan.

E momento cu autoridadnan emiti un aviso di horcan, ta nifica cu dentro di 36 ora horcan lo por alcansa nos isla. Mester tene cuenta cu por spera bientonan di mas cu 119 km pa ora, yobida fuerte y cu e condicion di lama lo ta sumamente peligroso na nos costanan.

Ora cu emiti alarma di alerta pa horcan (Hurricane Watch) y cu dentro di 48 ora Aruba lo por ta den un situacion di horcan, mester tene cuenta cu e siguiente puntonan.

  1. Tene bo mes continuamente na altura di e desaroyo di e horcan, pa medio di e boletinnan oficial riba e website di gobierno: www.gobierno.aw , na radio (Sintonisa 89.9 FM y 101.7FM),  television y corant. No presta atencion na rumornan;
  2. Yena e tanki di gasolin di bo auto(nan);
  3. Percura pa tin extra remedi pa uzo diario;
  4. Cumpra suficiente cuminda den bleki y seco di paki  y suficiente awa den boter;
  5. Cumpra suficiente cuminda pa bo bestianan di cas;
  6. Cumpra tayo y cups di carton of plastic y forki, cuchiu y cuchara di plastic;
  7. Cumpra extra bateria pa radio, foks (flashlight) y pa otro luznan di emergencia;
  8. Cumpra extra fuel/kerosin pa bo delco y pa lanternanan;
  9. Percura pa e boter(nan) di gas ta yen;
  10. Lanta placa cash pa uzo despues di horcan;
  11. Prepara plywood of zim pa e bentananan y portanan di glas;
  12. Prepara suficiente tape hancho (2") pa plak riba glas di bentana y porta;
  13. Prepara herment, clabo, lona y cabuya;
  14. Haci bo cura, patio y balcon liber di obhetonan los manera; palo, zim, halado, set(nan) di patio, pochinan di mata y matanan den pochi.

Ora cu emiti aviso di horcan (Hurricane Warning), fase di alarma number dos, ta nifica cu dentro di 36 ora un horcan por alcansa Aruba. Ta conseha pa sintonisa radio y/of consulta e website di gobierno: www.gobierno.aw, pa e boletinnan oficial. Si bo ta bay keda den bo mesun cas durante e horcan, anto ta recomenda pa e momento aki, sin tarda, pa haci e prome preparacionnan rond di cas.

 E preparacionnan cu mester haci ta:

  1. Baha tur antena di television, baha satellite dish chikito y pone e grandi(nan) cara ariba;
  2. Tapa prome e portanan y bentananan di glas cu ta mas exponi na biento. Uza plywood fuerte of plachi di zim y claba nan bon. Di mes un manera sigui tapa despues e otro portanan y bentananan di glas;
  3. Pone auto(nan) y/of boto(nan) riba trailer den garashi of para nan leu for di palo, mata of palo di luz;
  4. Baha e tirenan di e trailer y yena e boto cu un tiki awa pa mas stabilidad;
  5. Warda productonan kimico, fertilisante y otro material toxico den un luga sigur;
  6. Baha e awa den piscina y pone extra chloor;
  7. Baha coco for di e palonan cu ta pega cu bo cas;
  8. Mara y sigura tur cos cu ta los y cu ta keda pafo, manera boter(nan) di gas, bari(nan) y containernan di sushi, casitanan di hardin y oficinanan di bende number;
  9. Haci bo patio liber di tur obheto cu ta los manera decoracion y pochi di colga mata;
  10. Sigura y tapa hokinan of casitanan di bestia di cas. Si ta posibel pasa nan paden;
  11. Desconecta tur sorto di instalacion electrico cu ta pafo di bo cas, manera pomp di pos, luz y fontein;
  12. Pa tin coriente di emergencia, un delco chikito (1200 Watt) ta suficiente pa tene un frigidaire of freezer cendi. Prepara e delco bon y warda su extra fuel den un luga sigur. Nunca conecta tipo di delconan chikito asina riba e instalacion di coriente di cas.

 Pa loke ta trata e delaster preparacionnan cu mester haci den cas, den caso di alarma fase dos, aviso di horcan, mester tuma e siguiente medidanan.

  1. Pone e termostat di bo frigidaire y freezer riba maximo. Aumenta bo reserva di ijs;
  2. Prepara awa di bebe pa tres dia pa bo y bo famia. Corda cu un persona por bebe mita galon di awa pa dia;
  3. Mester warda awa di bebe of pa cushina den containernan cu tapadera. Prome cu yena e container cu awa, sterilisa nan cu clorox y laga nan seca;
  4. Por warda awa pa uzo general, awa pa laba y pa baña, den hemchi, tobo y wea;
  5. Organisa tur comestibel cu no mester ta friu y warda nan den un luga sigur;
  6. Seya bo articulonan di balor manera potret, joyas y documentonan, den plastic fuerte (ziplocks) y warda nan den un luga sigur;
  7. Desconecta tur ekipo electronico manera por ehempel ekipo di zonido, television y computer. Seya nan den plastic fuerte y warda nan den un luga sigur;
  8. Bentana y porta di glas cu no a keda tapa, mester tape nan di paden den forma di “+” y “X”;
  9. Cera e cortinanan y baha e blindsnan como proteccion extra. Un paña pisa of un deken tambe ta sirbi;
  10. Kita tur obheto cu ta los den cas manera cuadra, pronkstuk, florero, lampi y piesanan los den cushina y warda nan den cashi of un luga mas sigur;
  11. Sigura bo mes cu tur bentana y porta ta bon cera y seya esunnan cu por laga awa pasa, cu tape;
  12. Prepara un aparato di paga candela of dos hemchi yena cu santo den caso di candela.

Ora caba cu tur e preparacion manera aki ariba menciona, ofrece bo yudansa na bisiñanan, particularmente na famianan cu poco recurso, na personanan di edad halto y na personanan cu tin un of otro handicap.

Si pa motibo personal bo ta bandona bo cas of pasobra di siguridad of si finalmente autoridad ta consehabo, bo mester bandona bo cas, mester tuma e siguiente medidanan.

  1. Desconecta coriente, cera e meter di awa, cera e boter(nan) di gas y tuma tur medida necesario pa bo cas keda bon proteha atras;
  2. Percura pa bo tin un maleta chikito cla cu cosnan necesario pa haci e estadia na cas di otro hende mas comodo. Manera por ehempel: paña limpi, serbete y articulonan pa uzo personal;
  3. Hiba bo articulonan di balor manera; joyas, placa y documentonan importante;
  4. Hiba bo bestianan di cas of laga nan cerca hende cu por keda cu nan;
  5. Ora bo laga bo cas, corda avisa bo bisiña(nan) of e famia na unda bo ta bay keda. Sali na tempo for di cas y preferibel durante oranan di dia y cu ta cla ainda;
  6. Core cu cuidou, no pasa den inundacion grandi y purba yega bo destinacion lihe;
  7. Si bo ta na pia, no pasa den rooi(nan) of coriente(nan) di awa cu ta mas halto cu bo rudia.

Bario inumda despues di awacero pisa

Durante horcan

E momento cu un horcan a alcansa Aruba y cu e ta asota nos isla, ta recomendabel pa tuma e siguiente recomendacionnan na serio.

  1. Sintonisa radio (portatil) pa e boletinnan oficial;
  2. No drenta den panico y no uza bebida alcoholico;
  3. Uza telefon solamente pa caso di urgencia;
  4. Si bo cas ta haya hopi daño, corda pa controla si e coriente ta kita;
  5. Keda paden y si bo ta haya necesario of e situacion ta bira critico, bay hunto cu bo famia den e luga di sconde (shelterbox);
  6. Keda leu for di portanan y bentananan di glas;
  7. No sali for di cas, a menos cu bo cas ta yenando hopi cu awa. Bo ta mas sigur den un refugio (shelterbox) di un cas cu horcan a ranca e dak, cu si bo sali den biento fuerte, awa y obhetonan skerpi ta bula rond den cayanan inunda, pa busca otro caminda pa sconde;
  8. Si biento cay di golpi y hasta solo ta sali door di e nubianan, ta posibel cu e wowo di e horcan ta pasando ariba Aruba, pa despues di golpi e horcan cuminsa atrobe cu tur su forsa di un otro direccion acompaña pa yobidanan pisa; No sali for di bo cas tanten cu autoridad no duna permiso pa haci esaki.

Despues di horcan

Despues cu un horcan a pasa, mester tene cuenta cu e siguiente recomendacionnan.
Tene cuenta cu tin mas victima ta cay despues di un horcan cu durante di un horcan.

  1. Busca informacion via radio y convence bo mes cu e peligro a pasa. Sigui tur instruccion di autoridad;
  2. Uza telefon solamente pa casonan di emergencia y tene bo yamadanan cortico;
  3. Den caso di accidente of malesa, busca asistencia na e puesto medico mas cerca;
  4. Den caso di interupcion of scarsedad di awa, uza awa na boter pa bebe of pa cushina. Si no tin awa disponibel na boter, anto mester herbe e awa prome cu uz’e;
  5. Den caso di interupcion di coriente, limita habrimento di frigidaire;
  6. Si corriente bay, come cuminda di frigider y despues esun di freezer, laga cumindanan di bleki y cumindanan seco di paki pa ultimo;
  7. Revisa si na bo cas tin daño structural y na instalacionnan y limita e peligronan;
  8. Den caso cu tin daño pa reclama (claim) na seguro; documenta e daño cu potret of video. Circunstancia por retrasa chekeo di bo cas door di e compania di seguro;
  9. Despues di un horcan, rond di bo cas y riba caya por ta hopi peligroso. Tin hopi glas kibra, clabo, splinter y metal skerpi tira y plama rond; Tene cuidou, particularmente cu muchanan;
  10. Tene cuidou pa wayanan di coriente cu ta colga abou of cu ta tira riba caya y/of den awa. Si trapa of bay den awa sin proteccion tin chens grandi di electrocucion;
  11. Check cerca bisiñanan si tur cos ta OK, si no, ofrece bo yudansa;
  12. Si no ta necesario no bay core rond den auto. Tin cayanan cu ta inunda cu bo ta kere cu bo conoce bon pero por a keda coba cu buraconan hundo;
  13. Si bo presencia no ta necesario, keda leu for di area (nan) unda ta duna asistencia. Aglomeracion di hende y auto ta stroba e trabounan di rescate y assistencia.

Haci uzo di auto den camindo inunda

E dia(nan) y siman(nan) despues di un horcan ta un periodo cu mentalmente ta mas dificil y duro pa enfrenta y supera. No laga e destruccionnan rond di bo, kibra bo moral. Tampoco e comodidad y facilidadnan cu temporalmente bo a perde. Por reemplasa tur material, bida di hende ta mas importante.

Observacion
Na Merca, den e area cu un horcan ta subi tera, evacuacionnan masal ta tuma luga pa motibo di e fenomeno cu yama “storm surge”. Esaki ta un lama halto cu ta subi tera hunto cu horcan y ta penetra miyanan mas paden di costa. E fenomeno aki ta causa hopi destruccion y perdida di bida. Den Caribe durante un horcan, lama por subi tera pero no di e grado manera cu e fenomeno aki ta pasa na Merca.
Na Aruba no tin motibo pa un evacuacion masal.

Numbernan di alarma

Pa cualke caso di emergencia por yama e siguiente numbernan.

 Number di alarma general                                                             911

 Ambulance                                                                                   911

 Cuerpo di Bombero                                                                       911

 Polis (via post central)                                                                   911

 Polis, Oranjestad                                                                           100

 Polis, San Nicolas                                                                         104

 Polis, Noord                                                                                    107

 Polis, Sta. Cruz                                                                              105

                                                                                                 

 Hospital                                                                                         527 4000

 Centro Medico San Nicolas                                                           524 8833

Otro number di teleffon importante

Kustwacht                    913
WEB                              525 4600
Setar                             117
Dienst Openbare Werken (D.O.W.) 528 4700
Servicio Meteorologico Aruba 582 6497
www.meteo.aw 
Serlimar                         584 5080
F.C.C.A                          522 3222