Paspoort

  • Descripcion

    Un paspoort ta un documento rekeri pa por biaha pa exterior. Tur ciudadano di Aruba cu kier biaha pa exterior mester tin un paspoort valido. 

    Fingerprint den paspoort

    Ora di haci peticion pa un paspoort ta tuma dos fingerprint di bo persona. Esaki ta pa preveni fraude y abuso. Conforme regulacion Europeo, Censo/Oficina di Registro Civil, durante peticion di bo paspoort, ta tuma bo fingerprints. Pa esaki ta uza un machine cu ta tuma fngerprints electronico na e balie. Lo registra e marcanan di dede den e chip cu tin den e paspoort. Marcanan di dede ta keda warda unicamente den e chip di e paspoort mes. Fingerprints ta obligatorio ora di pidi un paspoort. Sin fingerprints bo no por pidi un paspoort. Ainda bo tin un paspoort sin fingerprints? E ora ey bo paspoort ta valido te cu e fecha cu e ta caduca.

    Condicionnan

    Pa por tuma fingerprints:

    • Bo dede mester ta limpi. Pa tuma un bon fingerprint, bo dede no mester tin bolonbonchi riba dje, por ehempel resto di verf;
    • Mayor di 12 aña.

    No ta posibel pa tuma fingerprint

    Si no ta posibel por tuma fingerprint durante peticion di bo paspoort, por ehempel door di limitacion fisico temporario, e ora ey bo por:

    • warda te ora ta posibel pa tuma un fingerprint of
    • bou di cierto condicionanan ta haya un paspoort cu un validez di diesdos luna maximo;
    • Si ta trata di un limitacion permanente door di cua ta imposibel pa tuma fingerprints por haya bou di cierto condicion un paspoort sin fingerprint cu un duracion di 5 aña.

    Limitacion fisico

    Si e persona cu ta haci e peticion tin un limitacion fisica y pa e motibo ey no por pidi e paspoort personalmente, e ora ey un miembro di famia of un funcionario di un instituto autorisa (cas di anciano etc.), unda e persona cu ta haci e peticion ta interna, por haci e peticon personalmente na e loket di oficina principal di na Schoolstraat 2. Na yegada ta tuma un number pa haci e peticion pa paspoort.

    Tene cuenta!!!!

    Bo paspoort bieu tin un visa vigente ainda den dje? E ora ey ora di haci peticon pa y ora di busca e paspoort mester informa e funcionario na un forma cla cu e paspoort bieu tin un visa y cu no ta desea pa perfora e pagina concerni.

  • Kico ta e condicionnan?

    • Un paspoort mester pidi personalmente.
    • Mester tin nacionalidad Hulandes y mester ta inscribi na Censo y ta biba na Aruba.
    • Si un persona tin nacionalidad Hulandes pero no ta inscribi na Censo, mester haci un peticion na oficina di Kabinete di Gobernador.
  • Unda pa pidi'e? / Mas informacion na

    1. Acudi personalmente

    Por acudi personalmente na e balie di oficina principal di Censo situa na Schoolstraat 2.

    2. Segun cita

    Por haci un cita pa pidi bo paspoort via Haci un cita. Bo ta haya un cita pa pidi un paspoort cerca oficina di Censo na L.G. Smith Boulevard 66.  

  • Cuanto tempo ta dura pa hay'e?

    Otorgamento di paspoort ta despues di 10 dia (di trabao). Por pasa busca e paspoort despues di 10 dia di trabou na oficina principal na Schoolstraat 2. No por haci afspraak pa busca e paspoort (unicamente pa haci peticion pa paspoort).  Por busca e paspoort personalmente na oficina principal situa na Schoolstraat 2. Ora drenta e oficina ta tuma un number via e  sistema di duna number na cliente. Despues ta yama e number via e pantaya.

  • Cuanto e ta costa?

    E gasto pa obtene un paspoort ta:

    • Pa un paspoort nacional (32 pagina): Awg. 160, - pa persona di 18 aña bay ariba (adulto) (validez 10 aña)  
    • Pa un paspoort pa negociante (zakenpaspoort - 64 pagina): Awg. 190,-  (validez 10 aña) 
    • Pa un paspoort pa persona menor di 18 aña di edad:  Awg. 120,-  (validez 5 aña)

    Den caso di perdemento di paspoort mester paga Awg. 150,- di boet adicional.
    Ta paga pa e paspoort ora cu haci e peticion. Ta suplica pa paga cu placa exacto.

  • Kico mi tin di hiba cu mi?

    Pa haci un peticion pa paspoort (nobo), mester presenta cu e siguiente documentonan:

    • E paspoort cu a caduca;
    • Den caso di prome peticion, un identificacion valido (cedula of rijbewijs);
    • Si ta aplicabel, un decreto of declaracion Real cu ta comproba cu e persona cu ta haci e peticion a haya e nacionalidad Hulandes;
    • Un pasfoto saca na un tienda di saca potret reconoci en conexion cu exigencianan di Ley cu e pasfoto mester cumpli cune (tira un bista tambe riba Fotomatrix
    • model 2007);

    Menor di edad (mucha y hoben te 18 aña)

    • Pa un menor di edad, e mayornan, voogd of esun legalmente responsabel pa bienestar di e mucha, mester ta presente pa duna permiso door di  firma e peticion. E menor tambe mester ta presente pa asina por midi'e;
    • Si un di e mayornan of voogd(nan) no por ta presente mester di un declaracion cu ta duna permiso y un copia di un prueba di identidad valido (paspoort, cedula of rijbewijs) di e mayor of voogd cu no por ta presente. Riba e copia mester tin su firma para. Si un di e mayornan of voogd (nan) ta den exterior, e ora ey mester mail e declaracion unda ta duna permiso, como tambe copia di e prueba di identidad valido (paspoort, cedula of rijbewijs) unda su firma ta para, directamente pa Censo/Registro Civil na info@censo.aw.

    Perde of a horta paspoort

    • Si bo a perde of nan a horta bo paspoort, bo no mester bay polis mas pa traha un procesverbaal pa haci un peticion nobo pa paspoort. Pero bo tin cu informa Censo inmediatamente di robo of perdida di bo paspoort, unda bo mester firma un declaracion segun berdad.  Por haci un peticion pa pasoort mesora. Si bo no tin otro prueba di identidad, pero si bo ya a yega di pidi un paspoort na Censo/Registro Civil, e ora ey nan por identifica bo basa riba esaki. Si no, e ora ey bo mester presenta na Censo/Registro Civil cu dos testigo.

    Persona cu limitacion fisico

    Den caso di persona cu tin limtacion fisica y ta na cama, tin cu trece:

    • E paspoort caduca
    • Un potret reciente na color
    • Prueba di identidad di e peticionario (miembro di famia of funcionario di e instituto unda e persona ta interna/biba).
  • Zie ook