Dia di Betico

Un dia nacional na Aruba hopi importante pa nos isla ta Dia di Betico. Riba 25 di januari ta conmemora natalicio di e lider politico Arubano, defunto Gilberto Francois (Betico) Croes.

Gilberto Francois "Betico" Croes a nace na Santa Cruz riba 25 di januari 1938. E la sigui enseñansa avansa na Aruba y despues a sigui su estudio na Pedagogische Academie na Hilversum. Na 1959 e la obtene su hoofdakte como maestro di scol. Despues di su regreso na Aruba e la duna les na Sint Jozef School como tambe na Sint Antonius College na Santa Cruz.
Na 1967 Beticio Croes a inicia su carera politico, prome como miembro di Arubaanse Volkspartij (AVP). E a forma parti di e prome bestuurscollege di Aruba como diputado di enseñansa. Na 1971 e la funda (hunto cu Watty Vos, Daniel Leo y Efrain de Kort) Movimiento Electoral di Pueblo (MEP) Desde fundacion di e partido te na su fayecimento e tabata presidente y lider di partido. No obstante nunca e la sinta como diputado di MEP den Bestuurscollege di Aruba y nunca e tabata diputado den Gabinete Antiano. E tabata consehero general di coalicion Arubano unda MEP tabata forma parti.

Como politico Betico Croes a lucha pa derecho di autodeterminacion di e pueblo Arubano. Na 1976 a acepta su proposicion pa un bandera Arubano y himno nacional propio. Betico Croes y MEP a lucha pa un status aparte denter di Reino Hulandes, los for di Antias Hulandes. Riba 25 maart 1977 riba su iniciativa un referendum a tuma luga (82% a deposita nan voto), unda un mayoria di 57% di pueblo Arubano a vota pa independencia. Despues e lo bira Status Aparte.

Na 1977, tempo cu MEP como e partido mas grandi a keda for di gobierno central, Betico Croes a yama pueblo di Aruba pa protesta contra e dominio di Corsou. E situacion a escala y Corsou a manda riot commando pa Aruba. Gobierno Hulandes a cuminsa realisa cu tin cu tuma exigencia di Aruba hopi na serio y a invita un delegacion pa Den Haag pa discuti e situacion. Eynan Betico Croes a boga exitosamente pa Status Aparte pa Aruba.

Betico Croes tabata lider di e delegacion Arubano durante e Conferencianan decisivo di Mesa Rondo na februari 1981 y na maart 1983, unda e la logra Status Aparte entrante januari 1986. Condicion di Hulanda tabata cu Aruba mester bira completamente independiente despues di dies aña. Na 1990 a scrap e clausula aki.
Riba 31 di december 1985 na e antesala di Status Aparte, Betico Croes tabata tragicamente envolvi den un accidente di auto pisa, unda e la drenta den un coma di cua e lo no lanta mas. Betico a fayece casi 11 luna despues riba 26 di november 1986. Ta considera Betico Croes como e Libertador di Aruba.

Manera ariba menciona, Betico Croes tabata un luchado pa e bandera Arubano y himno nacional “Aruba Dushi Tera”, cu na 1976 a keda oficialmente inaugura. Riba 18 di maart ta celebra Dia di Himno y Bandera como dia di fiesta nacional. Fecha di nacemento di Betico Croes tambe ta un dia di fiesta oficial ‘Dia di Betico’. Despues di su fayecimento a cambia nomber di Nassaustraat, caya principal di e centro di Oranjestad, pa Caya Gilberto François (Betico) Croes, conoci como Caya Betico Croes. E plasa patras di Cas di Cultura den Vondellaan ta yama na su honor “Plasa Libertador Betico Croes”. Eynan tambe tin estatua di dje como tambe riba e plasa banda di cas unda e a nace na e crusada principal di Santa Cruz.  E plasa aki ta conoci como ‘Plasa Status Aparte Betico Croes’.

E frase mas famoso di Betico Croes ta sin duda “Si mi cay na caminda, gara e bandera y sigui cu e lucha".

Fuente: Historia di Aruba