Lista di candidato

Partido polico

Un partido politico ta un organisacion estableci na Aruba di personanan cu tin como meta contribui na e formacion di idea tocante e desaroyo politico y social, pa promove e interes politico y formacion di e sentido di proposito y boluntad di e ciudadano y pa selecta y pone candidatonan pa participa na e eleccion pa miembronan di Parlamento.

Pa por participa na eleccion un partido politico mester ta registra na Conseho Electoral. Ademas e partido politico mester ta estableci pa medio di un acta notarial den cua e statutonan di e organisacion ta inclui.

E statuto ta contene stipulacion tocante:

  • Nomber di e partido político;
  • Meta di e partido;
  • Obligacion cu cada miembro tin cu e partido of e manera con por impone tal obligacion;
  • Procedura con pa bira miembro of pa sali for di partido;
  • Procedura pa yama un reunion general;
  • Competencia di un reunion general;
  • Procedura pa nombra y retira e dirigentenan;
  • Autorisacion pa cu representacion;
  • Maneho financiero;
  • Limitacion di miembrecia (cu derecho di voto) na e personanan cu tin derecho di voto pa eleccion pa miembro di Parlamento;
  • Obligacion pa publica un programa di gobernacion na tempo y prome cu e eleccion pa miembro di Parlamento;
  • Procedura pa traha lista di candidato pa e eleccion pa miembro di Parlamento;
  • Autoridad pa cambia statuto y disolve e organisacion.

Entregamento di lista

E entregamento di lista di candidato pa eleccion pa miembronan di Parlamento ta tuma luga riba e fecha di entre e di nobenta y di ochenta dia prome cu e aña legislativo di Parlamento termina of prome cu disolve Parlamento. 

Riba e dia aki e partidonan politico ta entrega nan lista di candidato y e demas documentonan na Conseho Electoral. 

Tur apoderado di cada partido politico ta haya un carta for di Registro Civil/Censo den cua ta fiha e dia y e ora pa entrega lista. Den e carta ta duna un splicacion di e rekisitonan pa entregamento di lista. Tambe ta duna e formulario pa yena e lista di candidato hunto cu e carta.

E lista di candidato mester contene informacion corecto manera fam, nomber, inicial, fecha di nacemento y adres. Tambe e secuencia cu e candidatonan ta aparece riba e lista mester ta determina. Ora di entrega lista di candidato mester entrega tambe e siguiente documentonan:

  • Un declaracion di consentimento, e candidato mester agrega un declaracion unda e ta bay di acuerdo pa aparece ariba e lista;
  • Un potret preto y blanco di cuatro pa seis cm, cu ta duna un bon imagen di e candidato cu ta aparece mas ariba riba e lista;
  • Un comprobante di pago di Afl.1000,00 na Directie Financien. E suma aki den principio tin e meta pa evita participacion den un forma superficial na eleccion.

E lista di candidato mester cumpli cu diferente rekisito:

  1. Riba un lista mag di aparece maximalmente 29 candidato, 8 mas cu e total di miembronan di Parlamento cu por eligi;
  2. Partido politico cu no tin representacion den Parlamento mester colecta un total di firma di votado pa por participa na e eleccion, cu ta igual na por lo menos un porciento (1%) di e total di e votonan valido, cu e Conseho Electoral a determina durante e eleccion pasa, afgerond pa riba te na un cifra completo);
  3. Un candidato mag di aparece unicamente riba un lista di candidato;
  4. Un votado por sostene solamente un lista di candidato.

Controla lista di candidato

Conseho Electoral ta tene un reunion pa controla e listanan. Conseho Electoral por notifica un partido por escrito tocante omision cu a constata, por ehempel si falta documento. E partido tin oportunidad pa coregi loke falta, manera cu ta indica den e carta, door di entrega na Conseho Electoral e documentonan cu tabata falta of no tabata completo. Cu omision kiermen:

  • Lista no ta sostene door di e cantdad di votado rekeri;
  • Cu un candidato no ta para cu su nomber (corecto), faam, nomber, inicial, fecha di nacemento, luga di biba y adres;
  • Cu un muher casa of viuda cu no ta menciona cu nomber di su casa (of casa difunto) bou di agregación di su propio nomber precedi cu e palabra naci of solamente cu su nomber; 
  • falta e declaracion di consentimento;
  • e potret entrega no ta cumpli cu exigencia;
  • cu riba e lista no tin indicacion di partido politico of un indicacion cu ta desvia di e indicacion registra.

Conseho Electoral ta tene un reunion publico den cual nan a declara e listanan di candidato valido. Segun articulo 31 di Ley Electoral, Conseho Electoral ta publica e listanan di candidato. Registro Civil/Censo ta pone e  listanan aki disponibel na su oficina pa tur hende por wak.

Numeracion di lista y dunamento di color

Den caso cu no tin apelacion, e ora ey Conseho Electoral lo bay na numeracion di e listanan y dunamento di color den un session publico. Finalmente ta publica e lista valido di candidato cu nan number y color.
Den un reunion publico riba 2 di september 2009 Conseho Electoral a duna e siguiente numbernan pa medio di sorteo. Tambe a duna e colo di preferencia  na cada lista.
 

Programa di Partido

Den nan programma di partido, e partido politiconan ta duna nan punto di bista di conoce y ta publica loke cu nan kier logra si nan drenta gobierno.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki