Derecho di voto

Derecho di voto ta un derecho hopi importante pa e pueblo Arubano por eherce su influencia riba e constelacion di e organonan representativo, cu otro palabra pa particpa den e decision politico (derecho di voto activo) como tambe pa por ser elegi (derecho di voto pasivo). Na Aruba solamente Parlamento ta pertenece na e organo representativo. E derecho di voto ta un derecho politico participativo cu ta ancra como derecho fundamental den nos Constitucion y ta stipula mas detaya den entre otro e Ley electoral, e Decreto electoral y e Ley pa partido politico.

 Siguientemente e lista di e legislacion electoral cu ta aplicabel pa eleccion di e 21 miembronan di Parlamento di Aruba:

  • Ley electoral (stipula pa AB 1987 no. 110), cu ta contene stipulacion tocante e derecho di voto y eleccion di miembronan pa Parlamento.  Pa Eleccion pa miembronan di Parlamento 2013 a adapta e Ley Electoral riba 18 di september 2013. Den Boletín Oficial di Aruba 2013 no.65 (Afkondigingsblad 2013 no.65) e amienda cu ta encera mehoracion di e posibilidad pa eherce derecho di voto y ahustacion tecnico.di e Ley Electoral,  ta ilustra;
  • Decreto electoral (stipula pa A.B. 1987 no.115 ), cu ta contene prevision pa stipula e modelo di formularionan y districtonan electoral pa ehecuta e ley electoral (AB 1987 no. 110).  Pa Eleccion pa miembronan di Parlamento 2013, a adapta e Decreto Electoral riba 23 di september 2013.  Boletin Oficial di Aruba 2013 no. 70 (Afkondigingsblad 2013 no. 70) ta contene reglamentación adicional tocante urna electoral ambulante y otro cambionan; 
  • Ley pa partido politico (stipula pa AB 2001 no.96), cu ta contene regla tocante partidonan politico (lo tin cambionan den e texto di ley pa eleccion 2013).

Pakico eleccion?

Aruba tin un democracia representativo y nos constitucion conoce un sistema parlamentario. Den un democracia basa riba representacion di pueblo ta tene eleccion regularmente. Esaki kiermen cu e eleccion en principio ta tuma luga cada cuatro aña. Solamente den e caso cu gobierno haci uzo di su derecho pa disolve Parlamento, eleccion provisional/adelanta ta tuma lugar. Un eleccion ta esencial pa garantisa e funcionamento di un democracia y pa evita abuso di poder. Ademas un eleccion ta percura pa e pueblo via di e partidonan politico ta representa den e organonan legislativo, manera Parlamento di Aruba.

E principio basico di e sistema electoral di Aruba ta ancra den nos Constitucion.

  • E eleccion ta tuma lugar segun e sistema di representacion proporcional, na unda ta conta e cantidad total di e votonan emiti y ta dividi'e door di e cantidad di asiento (21). E resultado yama e kiesdeler. E asientonan asina ta ser reparti den forma proporcional entre e listanan.
  • Cada votado por emiti solamente un voto;
  • E votacion ta secreto. E stipulacion aki kiermen cu ningun hende por ser obliga pa bisa pa kende el a vota;
  • E votacion ta liber. E votado no por ser influencia na un forma inadmitibel ora di voto.

Ademas Aruba no conoce un obligacion pa vota. Tur hende cu haya un yamada pa eleccion por dicidi si e ta bay vota of no. Pesey nos ta papia na Aruba di e derecho di voto.

Laga bo voz resona y haci uzo di bo derecho di voto!

Derecho di voto activo – Ken por vota?

Pa por vota den e eleccion venidero, segun e articulo 3 di e ley electoral, mester por cumpli cu e siguiente rekisitonan:

  • Mester tin nacionalidad Hulandes;
  • Mester ta inscribi den e Registro Civil/Censo y e registro di vota. Mester a cumpli cu e condicion aki no mas tarda cu 10 di juli 2013;
  • Mester tin minimo 18 aña di edad riba e dia di eleccion;
  • No mester ta exclui di e derecho di voto.

Ademas pa por participa na e eleccion mester:

  • tin e carchi di voto rekeri cu bo;
  • por identifica bo mes cu:
    • un cedula valido;
    • un paspoort Hulandes of
    • un rijbewijs Arubano, Antiano of Hulandes.

 

Derecho di voto pasivo - Ken por wordo eligi?

Pa por keda elegi e camdidato en cuestion mester aparece riba un lista di candidato cu a wordo declara valido. Otro rekisitonan por bira miembro di Parlamento ta cu e persona mester tin nacionalidad Hulandes, e mester ta un habitante di Aruba, e mester a alcansa e edad di bintiun aña y e no ta exclui di e derecho di vota. E resultado di eleccion ta conta en principio pa un periodo di cuater aña. Si un persona keda elegi, e ora ey e por fungi pa un periodo di cuatro aña como miembro di Parlamento di Aruba.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki