Cuenta anual

E cuenta anual ta refleha e datonan financiero cu ta sali for di e ehecucion di e presupuesto. Ehecucion di e maneho y presupuesto tin su repercusion den e cuenta anual di Pais Aruba. Na final di cada aña presupuestario cada ministro ta traha un lista di (gasto/entrada) operacional di e aña ey y e ta mand’e hunto cu un splicacion, prome cu e fecha di prome di april di e siguiente aña presupuestario pa e ministro di Finansas.

Cada aña Ministro di Finansas ta compila e cuenta anual di Pais Aruba di e aña presupuestario cu a caba di transcuri y ta manda esaki prome cu e fecha di prome di juni pa Controlaria General (Algemene Rekenkamer). Asina’ki ta para den capitulo VIII di e Comptabiliteitsverordening 1989. Controlaria General ta redacta raportnan cu ta contene e evaluacion di e cuenta anual.

E cuenta anual di Pais Aruba ta consisti en todo caso di:

  1. balans;
  2. cuenta di operacion (exploitatierekening);
  3. estado di inversion;
  4. estado di procedencia y gastamento di recurso;
  5. un lista di gasto di operacion pa cada ministerio;
  6. un splicacion pa e parti 1 te cu 3.

Pa mas tarda prome di september di e siguiente aña di e cuenta anual di Pais Aruba, ministro ta entrega na Parlamento, un concepto di ley pa determina e saldo di e cuenta di operacion (exploitatierekening). E nota di splicacion (memorie van toelichting) di e concepto di ley pa ceramento di e cuenta di operacion ta bay Parlamento, hunto cu e cuenta anual y e rapport di Controlaria General. Ta responsabilisa e poder di capital di Pais Aruba durante un paar di aña presupuestario pa medio di e cuenta anual. Ta resulta for di esaki cu e dunamento di rason tocante finansas publico no ta sosode pa cada ministerio sino pa henter gobierno den su totalidad.

Parlamento tin cu trata e cuenta anual conhuntamente cu e raport di Controlaria General y ta duna e minister reponsabel décharge, loke ta nifica aproba e cuenta anual y exonera e minister concerni di responsabildad. Di e forma aki gobierno tin cu duna cuenta di e maneho financiero cu e ta hiba.