Departamento di Enseñansa Aruba cu e di 4 encuentro di Alfabetisacion na Papiamento

Entrante augustus 2024 e alumno di klas 1 lo siña lesa y skirbi na Papiamento. A organisa un trayecto di preparacion pa asina ekipa e cabesante y e maestronan di klas 1 di scolnan basico cu e hermentnan necesario pa por implementa e parti aki di e maneho nobo di idioma den scol.

E trayecto di preparacion a cuminsa dia 17 november 2023 y lo termina 31 mei 2024. Den e trayecto di preparacion aki ta organisa comunidad di educacion professional. E maestronan ta forma parti di e comunidadnan den cua ta crea espacio pa conecta cu otro, intercambia ideanan, crea material y comparti conocemente. Parti di e preparacion ta encera analisis, revision y reproduccion di diferente material y ampliacion di e material digital. Ademas e trayecto di preparacion ta brinda e cabesante- y maestronan di klas 1 e oportunidad pa profesionalisa mas ainda. Dentro di poco lo cuminsa cu e trayecto dirigi riba maestronan di klas 2 y otro actornan di cuido p.e. IB’ers.

E dianan di estudio ta tuma lugar den consulta cu directivanan di scol y bou guia di Departamento di Enseñansa Aruba (DEA) conhuntamente cu Centro di Desaroyo Profesional Continuo (CDPC) di Instituto Pedagogico Arubano (IPA). Durante e di cuater encuentro a reina un ambiente placentero yena cu entusiasmo, animo y dinamismo bou e cabesantenan y e maestronan di klas 1. Algun grupo a desaroya material audio-visual, otro a dirigi nan mes riba material visual y otro a traha riba un plan di implementacion segun e necesidad di nan scol.

DEA y CDPC ta gradici tur maestro y cabesante cu tabata presente pa nan tremendo participacion.
Pa mas informacion relaciona cu Enseñansa na Aruba por acudi na nos website www.ea.aw.
Tambe por sigui nos den medio social via facebook y instagram pages @educationaruba pa
keda na altura di tur informacion.