ORANJESTAD - Recientemente Wardacosta a anuncia cu durante e temporada di Semana Santa nan lo intensiva nan control riba lama cu e meta pa garantisa orden publico. 

Wardacosta ta informa doñonan di boto y waverunners pa percura pa nan tin tur documento valido a bordo cual ta, ‘vaarvergunning’ y ‘vaarbewijs’ di e capitan. Ademas ta urgi cada un pa tene cuante cu e siguiente: 

  • Tur persona riba e vehiculo acuatico motorisa mester tin su vest di salbabida bisti inclui e tripulacion.
  • No ta permiti surpasa e limite di pasahero abordo di un boto mirando cu esaki ta bira un situacion peligroso. 
  • Informa famia unda bo ta bay cu bo boto, pa si acaso haya problema indesea, famia sa unda bo ta y por informa Wardacosta debidamente.
  • Ta bon pa botonan tin un life ring y anker cu suficiente cabuya abordo.
  • Percura pa tin ekipo di seguridad y rescate abordo, EHBO kit, suficiente awa, aparato pa paga candela, radio VHF of telefon celular ku bateria full carga.

Wardacosta lo ta activo cu diferente di su botonan durante Semana Santa pa haci e parti di vigilancia y brinda siguridad maritimo. Vigilancia riba cuido di naturalesa tambe ta parti di control di Wardacosta. Areanan cual lo vigila ta San Nicolasbaai - Commandeursbaai, Barcadera haven - lagoen, Spaans Lagoen, High rise area (Hotel-Arashi-Lighthouse), Rincon, diferente Rif, Baby Beach y Eagle Beach.

Wardacosta ta avisa tur doño di boto pa laga haci mantencion necesario na nan boto y tin esaki den optimal condicion prome cu subi lama. Asina ta minimalisa e chens cu bo boto ta daña riba lama y evita situacion peligroso pa bo y bo pasaheronan.

Den caso di emergencia, yama Wardacosta riba e number 913 of WhatsApp 005999 510 0913.

Wardacosta