Bestuurskantoor ilumina cu luz blauw pa lucha contra abuso di mucha

Gobierno su compromiso ta pa proteha derecho y bienestar di cada mucha cu ta biba riba nos isla.

Presente pa e ceremonia aki tawata Prome Minister Evelyn Wever-Croes, Minister di Husticia y Asunto Social Rocco Tjon, Minister di Finansa y Cultura Xiomara Maduro, varios Parlamentario, Fundacion Respeta Mi, Fundacion Mi Voz ta Bo Voz y Bureau Sostenemi. E publico tambe a bisti na blauw mustrando sosten na e lucha contra abuso di mucha.

Gobierno ya a aumenta e castigonan pa abuso di mucha, e abuso sexual di mucha. Den caso cu e abuso resulta den fayecimento di e mucha, e abusado lo haya un castigo di maximo 24 aña. E castigonan na Aruba pa abuso y abuso sexual di mucha ta e maximo den Reino Hulandes. Importante pa por duna castigo halto ta e parti di investigacion. Tur stakeholder tin e hermentnan pa por prepara cada caso adecuadamente pa presenta esaki miho dilanti un hues y asina mas lihe e abusado haya e castigo cu e merece.

Apesar cu kier depende riba Gobierno den e lucha contra abuso di mucha, mayoria caso ta sosode den seno familiar of circulo di amistad di e propio victima. Prome Minister a enfatisa cu Gobierno ta haciendo su parti y lo sigui duna di su parti, pero mester di ayudo di nos propio ciudadanonan pa combati maltrato of abuso di mucha. Mester ta mas cauteloso cerca ken ta laga e yiu (nan), pero tambe alerta pa cualkier señal cu e mucha ta duna na momento cu abuso a tuma luga. E abuso cu mas tin na Aruba ta negligencia di un mucha, abuso emocional y abuso sexual di cual 99% ta door di personanan cerca di e famia.

Prome Minister a gradici di curason tur e profesionalnan cu ta traha riba e tereno aki, y a reconoce cu e tereno aki ta uno difícil y pisa. E trabou importante cu nan ta haci ta yuda e futuro generacion pa mañan Aruba tin hobennan sano cu iniciativa pa hiba nos pais padilanti.