ATA ta presenta su Cuenta Anual 2023

Presente tabata e management di ATA, Board di ATA, management di AHATA, representante di Grand Thorton.
Ta pa remarca cu e indicadornan cu ta midi resultado a demostra cu aña 2023 tabata e miho aña den historia di Aruba pa cu turismo. 

E maneho di turismo ta basa riba: 

1. Trece e turista afluente y di calidad.
2. Diversifica nos turismo innovando producto Aruba.
3. Haci inversionan continuo den mehoracion di producto Aruba.
4. Crece Aruba cu un turismo sostenibel.

ATA a presenta e indicadornan cu a midi aña 2023 su logronan, unda a utilisa 90% di e presupuesto pa mercadeo y promocion di Aruba. Indicador principal cu ta midi e resultadonan ta tourism receipt, tourism arrivals y average daily spend. Tourism receipt a crece cu 13.4% compara cu 2019, indicando un recuperacion fuerte y mas placa den nos economia.   

Loke ta remarcabel ta e crecemento registra for di nos mercado principal cu ta e mercado Norte Americano. ATA ta mercadia den diferente mercado, como Norte Americano, Sur Americano y Europa. Cada mercado tin nan mesun manera pa promove y ta adapta e mensahe y e promocion.

Ministerio di Turismo tin e responsabilidad pa segura cu Aruba su economia ta sigui crece mientrastanto liderando cu practica di un turismo sostenibel. Proyectonan di sostenibilidad y innovacion ta aliniando cu e vision pa un sector turistico mas resistente y innovativo integrando tecnologia nobo pa mehora e experiencia total di e bishitante. 

ATA tambe a presenta su “Destination Development Plan” cu a  ilustra tur e proyectonan cu a cuminsa y lo ehecuta pa un turismo mas sostenibel.