A.T.A ta firma acuerdo strategico cu Fundacion Parke Nacional Aruba (FPNA)

A.T.A. ta reconoce cu e necesidad pa enfoca riba un desaroyo turistico duradero y sostenibel ta di suma importancia como un esfuerso comun. Uniendo forsa, por garantisa cu nos unico pilar economico ta keda un fuente di entrada vital pa futuro. E vision di A.T.A. ta basa riba e modelo di ‘High Value – Low Impact’ cu ta para pa un balansa entre cuater pilar cu ta e ‘Calidad di Bida di e residente’, ‘Calidad di Experiencia di e Bishitante’, Proteccion y Preservacion di Naturalesa & Medio Ambiente, y Contribucion Economico di e Sector Turistico’.

Pa hopi aña caba A.T.A. ta duna sosten na FPNA pa cu inversionanan den proyectonan unda turismo y naturalesa por co-existi. Ademas A.T.A. lo sigui pone fondonan disponibel pa mantencion y renobacion di diferente sitio turistico, asina mehorando siguridad, accesibilidad y experencia di e local y bishitantenan di e isla y alabes maneha e impacto di e bishitantenan riba naturalesa. E acuerdo cu a firma ta enfoca riba proyectonan infrastructural, manera e proyecto di mantencion di railing, trapinan y otro facilidadnan na entre otro Conchi, Dos Playa, Boca Prins, Grot Fontein y Grot Quadirikiri den Parke Nacional Arikok, y tambe lo coloca baranca na saliña Malmok pa limita trafico.

A.T.A. como entidad encarga cu maneho y mercadeo di nos isla, lo asisti den promocion corecto di experencianan autentico den y rond di e areanan cu ta resorta bou di FPNA. Particularmente lo percura pa alinea e maneho di comunicacion, lo enfoca riba codigo di conducta, informando bishitantenan di entre otro reglanan y ley, y lo brinda mas informacion y educacion di nos parhanan y nos naturalesa.

Lo sigui traha di cerca cu FPNA pa maneha bishitantenan di un manera cu ta minimalisa daño na naturalesa y medio ambiente mientras ta promove sostenibilidad. Esaki mescos cu a bin ta haci, unda entre otro a inverti den Mangel Halto, y tambe a coloca baranca na e duinen (sand dunes) di Sasarawichi.

E colaboracion aki ta nifica cu A.T.A. lo haya informacion y data mas concreto di bishitantenan a traves di un proyecto nobo cu lo lansa dentro di poco, esta e eco-counter cu lo midi e fluho di bishitantenan na e areanan natural di Aruba y lo yuda adapta e maneho den futuro. A traves di instalacion di Eco-Counter na diferente localidad cu trafico halto di bishitante, A.T.A lo por comparti data cu lo yuda cu miho planificacion. E Eco-counter ta ofrece un solucion cu ta conta y analisa peaton a traves di un scan cu ta garantisa e privacidad di e bishitante. E areanan cu lo haya e Eco-counter ta inclui Conchi, Grot Fontein y Spaans Lagoen cu ta cay bao maneho di FPNA.

E colaboracion aki ta reenforsa FPNA su obhetivo manera ta poni den nan Multi Annual Corporate Strategy 2023 – 2032 di traha pa yega y atrae un tipo di turismo cu ta mas consciente di nan impacto riba naturalesa. E strategia ta pa informa, educa y ofrece experiencianan sostenibel cu ta crea e transformacion den nos bishitantenan cu tin aprecio y un sentido di responsabilidad pa nos naturalesa.