Visa ta forma parti integral di un serie di medida pa controla e fluho migratorio regular di Venezuela

ORANJESTAD – Durante e conferencia di prensa di Gobierno di Aruba di 7 di october 2019, Prome Minister di Aruba mr. Evelyn Wever-Croes a informa cu no tin mucho cambio den situación di Venezuela,  pero e ta sigui ta hopi delicado.

Prome Minister y e Crisis Team apunta pa Gobierno di Aruba a reuni na comienso di siman pa conseha Prome Minister riba e situacion di Venezuela. Prome Minister a informa cu frontera ta keda cera te cu december segun e fecha stipula na comienso di luna pasa, mientras cu Gobierno ta evalua e pasonan cu lo mester tuma.

Siman pasa diabierna, Aruba y tur otro país den Reino a anuncia e introduccion di un visa como rekisito pa esnan di nacionalidad Venezolano cu kier biaha pa paisnan di Reino. Despues di varios luna di consulta intensivo entre e Minister di Relacionnan Exterior di Reino y e Minister-Presidentnan di Aruba y Corsou, a yega na e decision cu lo introduci un visa temporal pa tur bishitante portador di un paspoort Venezolano. E medida aki ta uno cu ta competencia di e Ministro di Relacionnan Exterior di Reino, ya cu maneho di visa ta un asunto cu ta regarda Reino Hulandes.

A yega na e decision aki despues di a constata cu e situacion na Venezuela a empeora, ademas cu e incidencia di migracion iregular for di e pais aki den direccion di paisnan bisiña a conoce un aumento alarmante. Tur esaki a conduci cu ya caba varios pais, e.o. Peru, Panama, Ecuador, Guyana, Trinidad & Tobago y Chile a dicidi di introduci un visa pa tur portador di un paspoort Venezolano.

Introduccion di e visa aki ta forma parti integral di un serie di medidanan cu ta tuma pa controla e fluho migratorio regular di Venezuela den direccion di nos islanan. E tempo cu e medida aki lo keda na vigor ta depende di e desaroyonan na Venezuela. Na momento cu e condicionnan aki mustra cambionan faborabel, lo por elimina e medida. Introduccion di e visa lo tuma 6 luna. E proceso di su introduccion ta exigi tempo, pa motibo cu lo mester aloca e medio y personal adicional necesario na e Embahada di Reino na Caracas pa por procesa e peticionnan pa visa.

Otro medidanan complementario pa contra-aresta e fluho migratorio ta consisti di e.o.:

  • un ESTA-A, pa autorisacion di e viahe;
  • e Advanced Passenger Information system pa controla e informacion adelanta di tur biahero;
  • introduccion di Pre-boarding checks, cual ta un procedura pa controla tur biahero previo na borda e avion.

Ta importante menciona cu e medida di visa lo conoce algun excepcion. Pasaheronan cu ta den posesion di un visa valido of un permiso di estadia pa e paisnan Merca, Canada, Inglatera (Reino Uni) y Irlandia, no tin mester di un visa pa biaha pa Aruba, Corsou of Boneiro.

E situacion di Sint Maarten ta un poco diferente, debi na e particularidad cu e isla ta uno dividi den un parti Frances y e otro Hulandes. Pa e introduccion di e visa ta efectivo, lo negocia cu e autoridadnan Frances pa por efectua e control necesario di e medida di visa. Na final Sint Maarten tambe lo forma parti di e programa di visa.

Prome Minister Evelyn Wever-Croes a enfatisa cu e peticion pa e visa mester haci na Embahada di Reino na Venezuela. Aruba mes no tin ningun papel pa hunga den esaki pa motibo cu e maneho di visa ta un asunto di Reino Hulandes y ta cay bou di Ministro di Relacionnan Exterior di Reino. Esakinan ta pasonan cu ta tuma si acaso yega na apertura di frontera, lo tin un miho control di e bishitantenan. Gobierno ta keda monitor e situacion aki tur dia.

Nos ta traha hunto pa un portal Gubernamental pa Aruba, ku ta informativo, accesibel, y facil den uzo.
Algu di comenta? Click aki 

Page options