Vacuna di influenza pa temporada 2019/2020 ta disponibel na servicio di Malesanan Infeccioso

ORANJESTAD -  Tur aña di nobo entre november pa december ta un custumber cu e grupo di riesgo den nos comunidad ta acudi na Departamento di Salud Publico pa busca nan vacuna contra influenza (griep).

Bou di grupo di riesgo ta referi na e personanan cu ta na risico pa desaroya complicacion grave manera bronkitis y pulmonia pa motibo di griep. E personanan aki ta hende grandi riba 60 aña, mucha bou di 2 aña, personanan cu ta sufri di malesanan cronico of malesa di nan sistema respiratorio. Tambe personaobeso, na estado of cu tin un sistema inmunologico abou door di malesa, manera cancer y HIV.

Vacuna contra Influenza/griepInfluenza ta un infeccion viral cu ta afecta principalmente nos nanishi, garganta y pulmon. E infeccion ta dura generalmente un siman y ta caracterisa su mes door di síntoma manera:

  • Keintura;
  • dolor di musculo;
  • dolor di cabes;
  • calafriu y sodamento
  • malestar general, cansancio y ta sinti debil;
  • tos seco y cu ta persisti;
  • dolor di garganta y rinitis (inflamacion di e membrana di e nanishis cu ta causa niestermento, nanishi cera y picamento) .

E virus cu ta causa influenza ta transmiti facilmente di un persona pa otro door di particulanan expulsa den aire na momento cu un persona cu influenza/griep tosa of niester.

Departamento di Salud Publico kier informa comunidad completo, pero cu extra atencion na e grupo di riesgo cu e vacuna contra influenza ta disponibel na nos servicio di malesanan infeccioso. Esnan cu ta cay bou e grupo di riesgo por pasa busca nan vacuna completamente gratis cu nan carnet di AZV y un recept di nan docter di cas. Adulto riba 60 aña por haya e vacuna completamente gratis presentando solamente cu nan carnet AZV y esnan cu no ta cay bou e grupo di risico pero kier e vacuna por haya esaki na un balor di Afl 20,- . Orario pa vacuna ta di dialuna pa diabierna for di  7:45 – 11:45 y 13:15 – 15:30.

Alabes Departamento di Salud Publico ta recorda cu e miho manera pa preveni influenza ta door di tene cuenta cu e siguiente medidanan preventivo:

  • Vacuna contra influenza;
  • evita contacto di cerca cu personanan cu ta malo;
  • si bo ta malo keda cas;
  • tapa boca ora bo ta tosa of nister;
  • desinfecta man of laba man frecuentemente cu habon;
  • purba di no mishi cu bo wowo, nanishi ni boca
  • mantene custumber saludabel manera drumi suficiente, sea fisicamente activo, bebe hopi likido y come alimento nutritivo y saludabel.

Pa mas informacion por tuma contacto cu servicio di Malesanan Infeccioso di Departamento di Salud Publico na 5224200.

Nos ta traha hunto pa un portal Gubernamental pa Aruba, ku ta informativo, accesibel, y facil den uzo.
Algu di comenta? Click aki 

Page options