Un resumen di Coronavirus - e hechonan di mas importante encuanto e enfermedad COVID-19

Dit item is gearchiveerd op 03-04-2020.

ORANJESTAD - Directie Volksgezondheid Aruba ta informa riba loke ta mas importante pa sa tocante Coronavirus COVID-19 .

Na Aruba NO tin caso di COVID-19. A descubri casonan di Coronavirus (COVID-19) na final di 2019 na China y di cual tin hopi noticia tocante e virus aki den media.

Kico ta e simptomanan di e enfermedad?

No ta tur hende cu tin griep, tin COVID-19.

  • 82% di e casonan actual cu un diagnostico di COVID-19 tin sintoma leve cu ta similar na griep.
  • 18% di e personanan ta manifesta condicion serio of critico.

Pa por papia di probabilidad di keda contagia cu e coronavirus, e persona mester:

  • A bishita den e ultimo 2 siman un pais of region unda tin e coronavirus circulando.
  • Lo a bay den contacto cu un persona cu ta confirma cu e tin COVID-19.

E paisnan cu tin riesgo grandi pa transmision activo di e coronavirus ta China, Sur Corea, Italia, Iran y Hapon.

Kico mester haci si bo ta pensa cu bo tin e virus?

Si bo desaroya sintomanan similar na griep y recientemente a bishita un region di contagio of a bay den contacto cu un persona cu ta diagnostica cu e malesa COVID-19, ta recomenda pa tuma contacto telefonicamente cu bo dokter di cas y no bay personalmente na su consultorio.

Coronavirus COVID-19-virusCon e virus ta wordo transmiti?

E transmision di e virus ta pasa di hende pa hende via e particulanan (droplets) di un persona cu ta sintomatico ora e tosa of niester.

Ta posibel pa traspasa e virus aunke bo no ta sinti malo?

Tin casonan raporta cu un persona cu ta contagia cu e virus y no a presenta ningun sintoma. Gran cantidad di hende cu a wordo contagia ta sinti e sintomanan leve.

No ta conoci ainda con largo e virus ta keda bibo pafor di e curpa humano.

Si un persona keda contagia cu e virus, e persona lo no ripara esey mes. E sintomanan ta manifesta su mes te despues di algun dia (entre 2 pa 14 dia).

Bo lo por wordo contagia door di e virus un biaha mas si bo a wordo contagia caba?

Si bo a wordo contagia pa e virus caba, e ora bo no por wordo contagia di nobo. Bo sistema inmunologico ta reconoce e virus.

Con peligroso ta e virus?

No ta conoci con peligroso e virus aki ta, pero di esnan cu a wordo infecta cu e virus, 3.4% a fayece. Mayoria di esnan cu a fayece tin un condicion di enfermedad existente. Mayoria di hende ta cura di e coronavirus. Di tur persona actualmente infecta mas o menos 18% a sufri di kehonan severo.

Aki nos ta papia di hendenan unda e corona virus a wordo constata. Den realidad por tin mas hende cu a keda infecta cu e virus y eventualmente a cura caba di e virus.

Ta existi un tratamento pa cu e virus?

Na e momento aki no tin un tratamento farmaceutico of remedi oficial contra e corona virus, pero nan ta trahando riba un. E unico cos cu dokternan por haci awor ta pa combati y alivia e sintomanan cerca e personanan confirma cu COVID-19, por ehempel yuda e personanan cu tin keho di dificultad pa hala rosea por medio di suministracion di oxygeno.

Tin un vacuna contra e virus?

Diferente organisacion incluyendo World Health Organization y e autoridadnan cientifico, ta trahando sumamento duro y investigando e maneranan pa yega na vacuna y tambe e metodonan pa combati y mitiga e coronavirus. Esaki lo tuma tempo prome cu e vacuna ta disponibel.

Pa cualkier informacion adicional of pregunta, por contacta Directie Volksgezondheid na 522-4200 y puntra pa nos seccion di Malesanan Contagioso.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options