Ta bay cuminsa cu e pilar economico nobo di produccion y cultivo di canabis pa uzo medicinal

Dit item is gearchiveerd op 03-04-2020.

ORANJESTAD – Riba 2 di maart 2020, Prome Minister Evelyn Wever-Croes hunto cu Minister Dangui Oduber, den nomber di Gobierno di Aruba a anuncia cu Gobierno ta bay cuminsa cu e pilar economico nobo di produccion y cultivo di canabis pa uzo medicinal.

Gobierno lo bay otorga licencia pa produccion y cultivo di cannabis medicinal bou condicionnan hopi estricto pa esnan cu por cumpli cu e condicionnan. Ta trata aki di produccion y cultivo na luganan cu Gobierno lo asigna, cu exigencianan di siguridad hopi estricto y halto. Produccion y cultivo ta destina solamente pa exportacion y pa uzo medicinal. E proceso di legislacion ya a cuminsa y desde e momento aki Gobierno ta invita esnan interesa pa expresa nan interes, (Expression of Interest).

Imagen cannabis medicinalProme Minister enfaticamente a expresa cu Gobierno no ta legalisa plantacion di cannabis unda cu ta y pa tur hende. Solamente esnan cu por cumpli cu e condicionnan hopi estricto por bin na remarke pa haya un licencia y solamente por planta den e areanan designa pa Gobierno cu lo tin exigencianan di siguridad hopi halto.

E desaroyo aki por bira un pilar economico cu ta trece desaroyo y por trece entrada den caha di Gobierno, si nos haci’e bon bou tur condicion mara na esaki. Pa e aña aki e calculacion ta cu lo tin entrada di 15 miyon florin na licencia. Pa e añanan siguiente, siendo cauteloso, e entrada por yega te na 50 miyon florin. Di e manera aki, poco poco lo cuminsa reemplasa e crisis tax.

Esaki ta un desaroyo nobo cu ta genera entrada pa caha di Gobierno y lo crea cupo di empleo. Gobierno lo cuminsa registra esakinan na di e desk cu Minister di Labor lo habri na Departamento di Progeso Laboral (DPL) pa asina percura cu esnan cu ta interesa pa traha den e area aki, por haya trabou.

“Laga mi bolbe enfatisa: Esaki ta un di e acuerdonan di gobernacion entre partidonan MEP, POR y RED y esaki ta bira un tipo di industria, pues no un caminda cu hende por bay sinta huma cannabis, esey ta keda castigabel. Esnan cu ta traha na e industrianan aki lo mester atene nan mes na exigencianan estricto di siguridad. E ta un forma safe, e lo no ta pa daña bida di hende. Al contrario, e lo trece desaroyo y progreso pa nos pais. Ta p’esey nos a tuma nos tempo pa prepara esaki miho posibel, pa por garantisa cu e ta un industria y desaroyo serio y sigur cu solamente lo trece cosnan positivo pa Aruba”, Prome Minister Evelyn Wever-Croes.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options