Scolnan na Aruba lo participa na Sustainable Education Symposium (SES)

ORANJESTAD – Recientemente Minister di Desaroyo Sostenibel dr. R. Lampe a elabora riba Sustainable Education Symposium (SES) cu lo inicia 4 di september, 2019.

Sustainable Education Symposium (SES)E simposio aki a cuminsa 8 aña pasa como Green Symposium, pero mirando e importancia di e palabra sostenibel, a tuma e decision di cambia e nomber pa Sustainable Education Symposium na unda e scolnan lo participa y enfoca riba e tema di sostenibilidad.

E aña aki e tema lo ta “Community Garden” Hofi di Bario. E idea aki a nace durante un bishita di Minister Lampe na New York y a mira e proyecto aki como algo cu e lo desea di implementa na Aruba. Meta di e tema aki ta pa e barionan na Aruba cuminsa haci uzo di espacionan publico cu no ta uza pa plantacion. E proyecto aki lo beneficia e bario ya cu lo tin un area berde, cu ta produci fruta y cu e bario mes lo ta encarga cune.

SES ta un bon manera pa conscientisa nos hobennan di e importancia di agricultura. E interes pa plantacion na Aruba tambe ta creciendo mas y mas y pa e motibo aki e simposionan aki ta  importante p’asina por brinda informacion necesario na comunidad.

Henter comunidad di Aruba ta invita pa atende e SES riba 4 di september 2019 na Cas di Cultura di 7:00 pm pa 9:30 pm. Lo bay tin diferente oradornan y productonan sostenibel local na benta. Entrada ta completamente gratis.

Nos ta traha hunto pa un portal Gubernamental pa Aruba, ku ta informativo, accesibel, y facil den uzo.
Algu di comenta? Click aki 

Page options