Premier Evelyn-Croes a reuni cu presidente Duque di Colombia

ORANJESTAD – Riba diaranson 5 di januari 2020, Premier Evelyn Wever-Croes a reuni cu Presidente Iván Duque di Colombia y cu  Embahador di Reino ba Bogota, Jeroen Roodenburg.

Premier Wever-Croes y Presidente Duque a delibera riba varios tema di interes mutuo, specialmente e mandatarionan a enfatisa cu e dos paisnan mester estrecha lasonan mas y traha riba mas intercambio comercial, entre otro riba tereno di salud y cultural pa asina crea mas oportunidad y alivio pa ambos comunidad.

Premier Evelyn Wever-Croes a reuni cu Presidente Iván Duque di Colombia y cu Embahador di Reino na Bogota, Jeroen Roodenburg.Premier Wever-Croes a expresa su preocupacion tocante e situacion na Venezuela y e retonan pa nos paisnan. El a expresa cu Aruba lo kier traha mas hunto pa combati crimen organisa. Tambe mas cooperacion riba comercio y turismo y cuido medico.

Presidente Duque a bin cu un iniciativa di ‘Comite Bi-Nacional’ den cual Colombia y Aruba lo scoge algun tema comun y yega na areglo riba nan. Di parti di Colombia nan ta hopi interesa den comercio di Aruba y Aruba ta interesa den inversionista di Colombia. Pa esaki ta trahando tambe riba un tratado pa evita dobel peso di impuesto.

Riba tereno di cuido di salud tambe e mandatarionan a intercambia di idea con pa crea mas posibilidad. Gobierno di Aruba su meta ta pa mehora cuido di salud pa e ciudadanonan di Aruba y mes momento baha gasto medico.

“E tabata un bon reunion den cual nos a estrecha lasonan di amistad entre Colombia y Aruba aun mas”, Premier Wever-Croes a duna di conoce.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options