Pakete di Flexibilisacion pa e temporada di COVID-19

ORANJESTAD – Relaciona cu e impacto di e pandemia COVID-19 riba economia di Aruba, Gobierno a dicidi di introduci un pakete di flexibilisacion pa un periodo di 3 luna.

E pakete ta drenta na vigor cuminsando entrante 1 di april 2020, pa asina brinda tanto e dunador di trabou como e trahador, e sosten necesario pa surpasa e periodo critico aki.

Punto di salida di Gobierno di Aruba ta keda cu un y tur, sin excepcion, tin cu carga consecuencia di e crisis aki y e ta un responsabilidad colectivo. Gobierno di Aruba, entre otro, ta duna posibilidad na e dunador di trabou y trahado pa aplica pa un compensacion for di e Fondo di Asistencia Social di Emergencia (FASE) pa cubri entrada di trahadornan cu como consecuencia di reduccion di oranan di trabou ta bay ricibi menos di Awg. 950,00 pa luna.
Pa un dunador di trabou por haci uzo di e diferente medidanan cu Gobierno di Aruba a introduci recientemente, incluyendo e posibilidad di aplica pa e Fondo di Asistencia Social di Emergencia (FASE) pa su trahadornan, mester tene na cuenta cu e dunador di trabou primeramente tin un responsabilidad social di duna maximo siguridad na su trahadornan.
Pa por aplica pa FASE como tambe haci uzo di e pakete di medida Gobierno di Aruba, pa medio di e diferente instancianan, lo bin cu e siguiente condicionnan pa e dunador di trabou:

  • E dunador di trabou ta paga e empleado su salario pa luna di maart 2020;
  • E dunador di trabou mester presenta un plan di accion concreto con e ta pensa di atende cu e consecuencia financiero causa door di COVID-19, tumando na cuenta e interes di su
    empleadonan;
  • E dunador di trabou, segun su forsa financiero, mester demostra di por aplica flexibilisacion di
    orario di trabou parcial prome cu aplica reduccion di ora completo;
  • Den caso cu no cumpli cu e puntonan antes menciona no lo bin na remarca pa e compensacion a base di FASE y e trahador lo mantene e derecho di reclama pago di su salario for di e dunador di trabou.
  • Tumando na cuenta cu a cumpli cu tur e condicionnan stipula ariba, e pakete di flexibilisacion ta consisti di lo siguiente.
     

Ley Laboral:

  • Flexibilidad di oranan di trabou a base di necesidad individual demostra door di e empresa;
    E trahador ta mantene e derecho pa ricibi pago pa e ora cu e traha – esaki di mutuo acuerdo entre e dunador di trabou y e trahador; Ta urgi e dunadornan di trabou pa mantene contractonan laboral vigente; Ta recomenda pa duna trahadornan vakantie cu pago prome cu aplica pa flexibilidad di orario di trabou, esaki manteniendo un ‘buffer’ di 5 dia di vakantie pa e trahador; Sin cumpli cu tur e condicionnan ariba menciona, y si no por demostra e necesidad (financiero) pa termina e contratonan laboral, Directie Arbeid en Onderzoek lo no honra e peticionnan pa ontslagvergunningen entrega;
  • Temporada di e pakete: di 1 april 2020 te cu 30 di juni 2020.

Nota: Fecha limite (deadline) pa entrega  aplicacion (pa bin na remarca pa e asistencia social den luna di juni 2020 ainda) lo ta 1 juni 2020.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options