Novel Coronavirus 2019-(nCoV) Departamento di Salud Publico (DVG) ta sigui cu su vigilancia

Dit item is gearchiveerd op 12-03-2020.

ORANJESTAD - E transmision di 2019-nCoV ta sigui di hende pa hende.
Apesar di tur e medidanan cu China a tuma y ta tumando pa contene esaki, nos por mira cu e cifranan di caso positivo y fayecimento ta sigui aumenta poco poco principalmente na China.

Segun definicion internacional un persona por tin 2019- nCoV of ta consider’e sospechoso di tin e virus si:

  1. E persona desaroya un infeccion respiratorio agudo/ severo cu mester admit’e den hospital despues di un biahe pa China; 14 dia prome cu e desaroya sintoma.
  2. E persona desaroya cualkier infeccion respiratorio pero:
    1. mester tawata tin contacto cu un persona confirma cu 2019-nCoV
    2. ta traha den un facilidad di cuido caminda ta atende/ trata/cuida personanan confirma cu  2019-nCoV.

Departamento di Salud Publico di Aruba ta sigui e desaroyo aki di cerca. Ultimo cifranan cu DVG a ricibi di World Health Organisation (WHO) ta cu e cantidad di casonan raporta ta suma 40.484 y e cantidad di fayecidonan ta 910. E cantidad di fayecido ta representa 2.3% di e cantidad total di e casonan regista. Pa WHO esaki ta nifica cu e virus no ta asina mortal si compara esaki cu e virus di influenza cu pa aña ta causa miles di morto of si compara esaki cu e virus di  SARS, MERS y EBOLA cu a causa bastante mas morto tempo cu nan a presenta nan mes.

CoronavirusNa Aruba no tin ningun caso sospechoso of confirma di 2019-nCoV. Como pais Aruba, nos ta vigila y monitor  e situacion door di controla nos puertonan di entrada, esta aeropuerto (AAA) y waf (APA). Esaki ta un sistema di vigilancia existente cu DVG ta reenforsando. Tin protocol nan existente cu ta actualisa pa e 2019-nCoV y ta sigi conseho nan internacional di organisacion di salud nan manera WHO-PAHO-CDC-RIVM-ECDC.

Na e momentonan aki e expertonan y organisacionnan internacional ta studiando e virus aki su caracteristicanan pa por ofrece un forma di proteccion contra dje. Te na e momento aki e expertonan por a conclui cu e virus ta pasa di hende pa hende atrabes di e particulanan cu ta keda den aire of riba superficie na momento cu un hende malo cu sintomanan respiratorio, manera griep, tosa of nister. P’esey e expertonan y DVG ta recomenda como medida di prevencion :

  1. Evita contacto directo cu personanan cu tin un infeccion respiratorio
  2. Laba man frecuentemente cu awa y habon of uza “hand sanitizer” principalmente prome cu come y evita di mishi cu bo wowo, nanishi y boca mirando cu esaki ta e ruta cu e virus ta uza pa drenta bo curpa y sigui reproduci su mes.
  3. Tambe ta haci un suplica na esnan cu ta malo cu sintomarespiratorio manera griep. Pa evita bay den publico, keda cas y proteha otronan. Esnan cu sintomanan respiratorio, practica etiketa di tosa (tosa of niester den elleboog of den un napkins; laba man despues)
  4. Si bo persona a regresa di un biahe di China y den 14 dia of menos desaroya sintomanan respiratorio, tuma contacto preferiblemente via telefon cu bo dokter di cas y comparti bo historia di biahe.

Informacion ricibi for di WHO ta indica cu tur hende di tur edad por haya e infeccion aki pero esnan mas vulnerable pa haya complicacion ta personanan di edad halto cu un condicion medico existente (esnan diabetico, ta sufri di cancer of cu un malesa di curason)

Si tin cualkier pregunta tocante e 2019-nCoV aki, por fabor tuma contacto cu Servicio di Malesanan Infeccioso na number di telefoon 5224224/5224236/5224237/5224261/5224264 of na Departamento di Epidemiologia y Investigacion na 5224285.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options