Na april 2020 ta introduci Visa y ESTA pa personanan di nacionalidad Venezolano

ORANJESTAD - Entrante 1 di april venidero ta e intencion a base di Rijksvisumwet di Reino pa introduci Visa pa personanan di nacionalidad Venezolano.

Na mesun momento Minister di Husticia mr. Andin Bikker ta cabando cu e ultimo cambionan den e Leisure besluit pa introduci tambe e ESTA comparabel cu e ESTA di Canada y Merca. ESTA, cu te e Electronic System for Travel Authorization, tambe ta bay ta aplicabel specificamente pa hurisdiccion di Venezuela. Riba e cambionan aki, Minister di Husticia mr. Andin Bikker a haya hopi pregunta, entre otro cu si un persona di nacionalidad Venezolano cu permiso tambe mester di un Visa of un ESTA.

Minister Bikker a splica cu esaki no ta e caso pasobra un Visa y un ESTA ta un permiso pa biaha como turista. Den caso di un persona di nacionalidad Venezolabo ta residencia na Aruba y tin su permiso di trabou of otro tipo di permiso cu derecho di residencia pa largo tempo na Aruba, e Visa no ta aplicabel pe. Den articulo 5 di Toelatingsbesluit ta reglamenta cu esunnan cu ta biba aki na Aruba no mester di Visa pa drenta Aruba, pasobra nan tin permiso di trabou.  Introduccion di e cambionan aki lo bay tin nan impacto y den e proximo simannan Minister Bikker lo keda informa riba e tema aki.

Solamente e personanan cu ta bin Venezuela como turista mester aplica pa Visa of pa ESTA. Lo bay haci un screening si e personanan enberdad kier bishita Aruba como turista y despues regresa nan pais of cu nan tin otro intencion. E Visa y e ESTA netamente ta e instrumento pa controla kendenan ta bin como turista pasobra na final di dia Aruba ta un isla di mas of menos 115 mil habitante mientras cu Venezuela tin 19 miyon habitante. Aruba no por importa problema di Venezuela y esey Aruba ta haci cu mester salvaguardia Pais Aruba, su infrastructura y su industria turistico.

Mapa di Venezuela

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options