Ministernan di Asuntonan Economico di Aruba cu Corsou a reuni tocante cooperacion economico entre e islanan

ORANJESTAD  – Recientemente Minister di Finansa,  Asunto Economico, y Cultur mr. Xiomara Ruiz-Maduro a reuni  cu Minister di Desaroyo Economico di Corsou, Minister Mc William durante cual a discuti algun punto di importancia pa cooperacion economico entre Aruba y Corsou.

Certificado di Origen

Minister Maduro ta anuncia cu hunto cu Minister Mc William a yega na un consensus riba e Certificado di Origen. Esaki  ta un formulario cu lo facilita e comercio entre Aruba y Corsou. Antes tabata uza un formulario di Europa, cu awor lo bira obsoleto.

E Certificado di Origen lo ta di un forma digital pa asina facilita e proceso di comercio y lo drenta na vigor entrante 1 di januari 2020. Lo uza e formulario aki den cuadro di e zona di comercio liber entre Aruba y Corsou. E mandatario a enfatisa cu esaki sigur ta un bon noticia pa e comerciantenan di Aruba y Corsou.

Minister di Finansa, Asunto Economico, y Cultura mr. Sra.  Xiomara Ruiz-Maduro, Minister di Desaroyo  Economico di Corsou, Minister Giselle Mc William, Prome Minister Sra. Evelyn Wever-Croes y Minister di Transporte, Comunicación y Sector Primario Sr. Chris Romero.Onderlinge Regeling Vrijhandel

Minister Maduro a informa tambe cu a finalisa e proceso di negociacion di e zona liber di comercio entre Aruba y Corsou pa asina pronto por firma un Onderlinge Regeling Vrijhandel. Esaki ta encera cu por exporta producto traha na Aruba sin barera na Corsou y vice versa.

Esaki ta un noticia positivo pa economia di Aruba y Corsou, ya cu esaki lo genera mas actividad economico y tin oportunidad pa crea mas trabou.

Conexion maritimo entre e islanan y Fast Ferry

A reuni tambe cu Minister President Sra. Evelyn Wever- Croes y Minister di Transporte, Comunicaion y Sector Primario Sr. Chris Romero pa asina por a discuti e posibilidad di por haci uzo di e conexion maritimo di e barco Don Andres.

Esaki ta e barco cu ta navega entre e islanan ABC. Pronto Don Andres lo bay cuminsa cu su ruta nobo for di Sto. Domingo pa Corsou pa asina por trece fruta y berdura for di Sto. Domingo pa Corsou y cu Aruba por haci uzo di e oportunidad aki.

Alabes a discuti e desaroyo di e proyecto di Fast Ferry y Minister Mc William a informa cu e parti financiero a ser regla y cu pronto e ta spera cu por formalisa esaki.

A trata varios punto pa asina awor por sigui traha pa concretisa esakinan. Minister Ruiz-Maduro a gradici Minister Mc William y su conseheronan pa a tuma e iniciativa pa bini Aruba pa asina por a atende e puntonan di importancia aki. Tambe a gradici e expertonan di Departamento Economico y di Aduana cu a guia e proceso.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options