Minister Chris Romero ta anuncia medidanan preventivo pa COVID-19 den Transporte Publico

ORANJESTAD - Aruba a confirma e prome 2 caso di e virus COVID-19, cual ta un pandemia mundial.

Inmediatamente Gobierno di Aruba a activa e diferente protocolnan di accion pa cu e situacion aki.

Teniendo na cuenta e medidanan preventivo y di accion cu a keda decreta pa nos Minister President y e responsabilidad di tur sector publico pa preveni cu e virus aki sigui plama na nos pais, Minister Transporte, Minister Chris Romero, ta informa riba e medidanan preventivo cu tur compania y persona individual den posecion di un permiso di Transporte Publico mester tuma di awor pa dilanti:

  1. Tur compania of persona individual den posecion di un permiso di Transporte Publico mester sigura di por desinfecta su vehiculo(nan) diariamente.
  2. Pone “hand sanitizer” na disponibilidad di e usuarionan y di e trahadornan na tur momento.
  3. Pone informacion tocante e COVID-19 den bista y na disposicion di e usuarionan na tur momento y alcanse.
  4. Por busca material na Departamento di Salud Publico.

Den caso cu durante ta brindando servicio di Transporte Publico topa cu un caso sospechoso di COVID-19, instrui e persona pa yama na e liña telefonico specialmente apunta pa casonan asina: 280-0101.

Ta pidi tur compania y persona individual cu ta dispone di un permiso di Transporte Publico, pa tene bon cuenta cu e medidanan di prevencion y accion stipula, pa asina preveni lo mas posibel pa e virus COVID-19 sigui plama na nos pais.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options