Maneho di Ministerio di Husticia pa cu rijbewijsnan cu a vence of ta bay vence

ORANJESTAD - En conexion cu e Corona-virus COVID 19, a bira necesario pa introduci un maneho temporal pa renobacion di rijbewijs, den cuadro di articulo 9, inciso 1 (‘eerste lid’), di e Landsbesluit rij- en keuringsbewijzen (AB 1999 no. 61).

A base di dicho seccion por renoba un rijbewijs normalmente denter di un aña cu ela caduca, si e unico motibo ta cu e periodo di validez a expira.

Considerando e situacion excepcional cu mundo henter ta confrontando, Minister di Husticia, mr. Andin Bikker, a determina e proximo maneho temporal.  Un rijbewijs di Aruba cu un fecha riba cual e rijbewijs a of lo vence entre 16 di maart 2019 y 30 di juli 2020, lo wordo considera como un rijbewijs valido pa maneha vehiculonan na Aruba te cu 31 di juli 2020, pa un of mas categoria menciona den e rijbewijs.

E maneho temporal menciona ta solamente aplicabel pa rijbewijs cu normalmente lo por wordo renoba a base di inciso uno (‘eerste lid’) di e articulo 9 menciona, y solamente pa por maneha vehiculonan na Aruba, no den exterior.

Asina cu e circunstancianan mehora, lo por adapta e maneho, observando un periodo di transicion.

Nos ta traha hunto pa un portal Gubernamental pa Aruba, cu ta informativo, accesibel, y facil den uzo. Algo di comenta? Click aki

Page options